ಶಿಲ್ಲಾಂಗ್‌: ಮೇಘಾಲಯ ವಿಧಾನಸಭೆ ಚುನಾವಣೆಯಲ್ಲಿ ಬೃಹತ್‌ ಪಕ್ಷವಾಗಿ ಹೊರಹೊಮ್ಮಿರುವ ನ್ಯಾಷನಲ್‌ ಪೀಪಲ್ಸ್‌ ಪಾರ್ಟಿಯ (NPP) ಕಾನ್ರಾಡ್‌ ಸಂಗ್ಮಾ (Conrad Sangma) ಅವರು ಮಾರ್ಚ್‌ 7ರಂದು ಎರಡನೇ ಬಾರಿಗೆ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ. ಪ್ರಮಾಣವಚನ ಸ್ವೀಕಾರ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರೂ ಭಾಗವಹಿಸಲಿದ್ದಾರೆ ಎಂದು ತಿಳಿದುಬಂದಿದೆ.
ಕಾನ್ರಾಡ್‌ ಸಂಗ್ಮಾ ಅವರ ಎನ್‌ಪಿಪಿಯು ವಿಧಾನಸಭೆಯ ಒಟ್ಟು 60 ಕ್ಷೇತ್ರಗಳ ಪೈಕಿ 26 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿದೆ. ಬಹುಮತ ಸಾಬೀತಿಗೆ 31 ಶಾಸಕರು ಬೇಕಾಗಿದೆ. ಆದರೆ, ಸಂಗ್ಮಾ ಅವರು ತಮ್ಮ ಪರ 32 ಶಾಸಕರಿದ್ದಾರೆ. ಹಾಗಾಗಿ, ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸುತ್ತಿದ್ದೇನೆ ಎಂಬುದಾಗಿ ತಿಳಿಸಿದ್ದಾರೆ. ಬಿಜೆಪಿಯು ಇಬ್ಬರು ಶಾಸಕರನ್ನು ಹೊಂದಿದ್ದು, ಉಳಿದ ಯಾವ ಪಕ್ಷ ಬೆಂಬಲ ನೀಡಿದೆ ಎಂಬುದರ ಕುರಿತು ಸಂಗ್ಮಾ ಮಾಹಿತಿ ನೀಡಿಲ್ಲ.
ರಾಜ್ಯಪಾಲ ಫಾಗು ಚೌಹಾಣ್‌ ಅವರಿಗೆ ಕಾನ್ರಾಡ್‌ ಸಂಗ್ಮಾ ಅವರು ರಾಜೀನಾಮೆ ನೀಡಿದ್ದಾರೆ. ಸರ್ಕಾರ ರಚನೆಗೆ ಹಕ್ಕು ಮಂಡಿಸಿದ್ದಾರೆ ಎಂದು ತಿಳಿದುಬಂದಿದೆ. ಕಳೆದ ಬಾರಿ ಮೈತ್ರಿ ಸರ್ಕಾರದ ಭಾಗವಾಗಿದ್ದ ಯುನೈಟೆಡ್‌ ಡೆಮಾಕ್ರಟಿಕ್‌ ಪಾರ್ಟಿ (UDP)ಯು ಈ ಬಾರಿ 11 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿದ್ದು, ಈ ಬಾರಿಯೂ ಎನ್‌ಪಿಪಿಗೆ ಬೆಂಬಲ ನೀಡುತ್ತದೆ ಎಂಬ ಮಾತುಗಳು ಕೇಳಿಬಂದಿವೆ.
ಇದನ್ನೂ ಓದಿ: Meghalaya Election Result: ಮೇಘಾಲಯ ಚುನಾವಣೆ ಫಲಿತಾಂಶ ಅತಂತ್ರ, ಬಿಜೆಪಿ ಜತೆ ಸರ್ಕಾರ ರಚಿಸಲು ಕಾನ್ರಾಡ್‌ ತಂತ್ರ