ರಾಯ್ಪುರ: ಛತ್ತೀಸ್ಗಢದಲ್ಲಿ ಹಸುವಿನ ಸಗಣಿಗೆ ಅತ್ಯಂತ ಪ್ರಾಮುಖ್ಯತೆ ನೀಡಲಾಗುತ್ತದೆ. ಅಲ್ಲಿ ಗೋಧನ್ ನ್ಯಾಯ ಯೋಜನೆ ಜಾರಿಗೊಳಿಸಲಾಗಿದ್ದು, ಅದರಡಿ ಹಸುವಿನ ಸಗಣಿಯನ್ನು ಕೆಜಿಗೆ 2 ರೂಪಾಯಿ ಕೊಟ್ಟು ಸರ್ಕಾರವೇ ಖರೀದಿ ಮಾಡುತ್ತಿದೆ. ಇನ್ನು ಅಲ್ಲಿನ ಮುಖ್ಯಮಂತ್ರಿ ಭೂಪೇಶ್ ಬಾಘೇಲ್ ಅವರು ಕಳೆದ ಸಾಲಿನಲ್ಲಿ ಬಜೆಟ್ ಮಂಡನೆ ಮಾಡುವಾಗ ಹಸುವಿನ ಸಗಣಿಯಲ್ಲಿ ತಯಾರಿಸಿದ ಬ್ರೀಫ್ಕೇಸ್ನಲ್ಲೇ ಬಜೆಟ್ ದಾಖಲೆಗಳನ್ನು ತಂದು ಸುದ್ದಿ ಮಾಡಿದ್ದರು.
ಈಗ ಛತ್ತೀಸ್ಗಢ್ನಲ್ಲಿ ಮತ್ತೊಮ್ಮೆ ಹಸುವಿನ ಸಗಣಿಯ ಮಹತ್ವ ಸಾರಲಾಗಿದೆ. ಕಂಕೇರ್ ಜಿಲ್ಲೆಯ ಕೊಡಗಾಂವ್ನಲ್ಲಿರುವ ಮಕ್ಕಳ ಸರ್ಕಾರಿ ಶಾಲೆ ಮತ್ತು ಬುಡಕಟ್ಟು ಜನಾಂಗದ ಮಕ್ಕಳ ಹಾಸ್ಟೆಲ್ಗೆ ಹಸುವಿನ ಸಗಣಿಯಿಂದ ನೈಸರ್ಗಿಕವಾಗಿ ತಯಾರಿಸಲಾದ ಬಣ್ಣವನ್ನು ಬಳಿಯಲಾಗಿದೆ. ರಾಜ್ಯದಲ್ಲಿ ಇದೇ ಮೊದಲ ಬಾರಿಗೆ ಹಸುವಿನ ಸಗಣಿಯ ಪೇಂಟಿಂಗ್ ಮಾಡಲಾಗಿದ್ದು, ಇದೂ ಕೂಡ ಗೋಧನ್ ನ್ಯಾಯ ಯೋಜನೆಯ ಉಪಕ್ರಮವೇ ಆಗಿದೆ.
ಈ ಬಗ್ಗೆ ಮಾಹಿತಿ ನೀಡಿರುವ ಕಂಕೇರ್ ಜಿಲ್ಲಾಧಿಕಾರಿ ಪ್ರಿಯಾಂಕಾ ಶುಕ್ಲಾ, ‘ಸದ್ಯ ಕೊಡಗಾಂವ್ನಲ್ಲಿರುವ ಎಸ್ಯುಎಂ ಸರ್ಕಾರಿ ಶಾಲೆ ಮತ್ತು ಕೊಟ್ಟಾರಾ ಎಂಬಲ್ಲಿರುವ ಬುಡಕಟ್ಟು ಜನಾಂಗದ ಮಕ್ಕಳ ಹಾಸ್ಟೆಲ್ಗೆ ಸಗಣಿಯಿಂದ ತಯಾರಿಸಲಾದ ಪೇಂಟಿಂಗ್ ಮಾಡಲಾಗಿದೆ. ಕಂಕೇರ್‌ನ ಸರಧುನವಗಾಂವ್ನ ಮಹಿಳಾ ಸ್ವಸಹಾಯ ಗುಂಪುಗಳು, ಅಲ್ಲಿನ ಗೋಶಾಲೆಯ ಹಸುಗಳ ಸಗಣಿಯನ್ನು ಬಳಸಿಕೊಂಡು ನೈಸರ್ಗಿಕವಾಗಿ ಈ ಬಣ್ಣ ತಯಾರು ಮಾಡಿದ್ದವು. ಹಾಗೇ, ಹಳ್ಳಿಗಳನ್ನು ಸ್ವಾವಲಂಬಿ ಮಾಡಬೇಕು ಎಂಬ ಸದುದ್ದೇಶದಿಂದ ಛತ್ತೀಸ್ಗಢ ಸರ್ಕಾರ ಜಾರಿಗೊಳಿಸಿದ ಮಹಾತ್ಮ ಗಾಂಧಿ ಗ್ರಾಮೀಣ ಕೈಗಾರಿಕಾ ಪಾರ್ಕ್ (RIPA) ಯೋಜನೆಯಡಿ, ಇದೇ ಕಂಕೇರ್ ಜಿಲ್ಲೆಯ ಚರಮಾ ಬ್ಲಾಕ್ನಲ್ಲಿ ಒಂದು ಹಸುವಿನ ಸಗಣಿ ಬಣ್ಣ ತಯಾರಿಕಾ ಘಟಕ ನಿರ್ಮಾಣ ಮಾಡಲಾಗಿದೆ’ ಎಂದು ಹೇಳಿದ್ದಾರೆ.
‘ಸ್ವಸಹಾಯ ಸಂಘದ 20 ಮಹಿಳೆಯರು ಈ ಹಸುವಿನ ಸಗಣಿ ಪೇಂಟ್ ತಯಾರಿಕಾ ಘಟಕದಲ್ಲಿ ಕೆಲಸ ಮಾಡುತ್ತಾರೆ. ಒಂದು ದಿನಕ್ಕೆ 500 ಲೀಟರ್ಗಳಷ್ಟು ಬಣ್ಣ ಸಿದ್ಧವಾಗುತ್ತಿದೆ. ಮುಂಬರುವ ದಿನಗಳಲ್ಲಿ ಇಡೀ ರಾಜ್ಯದ ಎಲ್ಲ ಸರ್ಕಾರಿ ಕಚೇರಿ, ಕಟ್ಟಡಗಳಿಗೂ ಈ ಗೋಬರ್ ಪೇಂಟ್ ಬಳಿಯಲಾಗುತ್ತದೆ’ ಎಂದೂ ಜಿಲ್ಲಾಧಿಕಾರಿ ಪ್ರಿಯಾಂಕಾ ತಿಳಿಸಿದ್ದಾರೆ.
ಗೋಬರ್ ಪೇಂಟ್ ತಯಾರಿಕಾ ಘಟಕದಲ್ಲಿ ಕೆಲಸ ಮಾಡುವ ಮಹಿಳೆ ಜಾಗೇಶ್ವರಿ ಭಾಸ್ಕರ್ (45) ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿ ‘ಸಗಣಿಯ ಪೇಂಟ್ ತಯಾರು ಮಾಡಲು ಪ್ರಾರಂಭಿಸಿದ ಮೇಲೆ ನನ್ನ ತಿಂಗಳ ವೇತನ 3000 ರೂಪಾಯಿಂದ 5000 ರೂಪಾಯಿಗೆ ಏರಿಕೆಯಾಗಿದೆ. ಸಗಣಿಯಿಂದಲೇ ನಾವು ಹಣ ಗಳಿಸುತ್ತಿದ್ದೇವೆ. ಸದ್ಯ ನಮ್ಮ ಪೇಂಟ್ನ್ನು ಲೀಟರ್ಗೆ 125 ರೂ.ಗೆ ಮಾರಾಟ ಮಾಡುತ್ತಿದ್ದೇವೆ ಎಂದು ತಿಳಿಸಿದ್ದಾರೆ.
ಮುಖ್ಯಮಂತ್ರಿ ಆದೇಶ
ಇನ್ನು ರಾಜ್ಯದ ಎಲ್ಲ ಸರ್ಕಾರಿ ಕಚೇರಿ, ಶಾಲಾ-ಕಾಲೇಜುಗಳಿಗೂ ಈ ಸಗಣಿಯಿಂದ ತಯಾರಿಸಲಾದ ಬಣ್ಣವನ್ನೇ ಕಡ್ಡಾಯವಾಗಿ ಬಳಿಯಬೇಕು ಎಂದು ಛತ್ತೀಸ್ಗಢ್ ಸಿಎಂ ಭೂಪೇಶ್ ಬಾಘೇಲ್ ಈಗಾಗಲೇ ಆದೇಶ ನೀಡಿದ್ದಾರೆ. ಯಾರು ಆದೇಶ ಪಾಲಿಸುವುದಿಲ್ಲವೋ ಅವರ ವಿರುದ್ಧ ಕಠಿಣ ಕ್ರಮದ ಎಚ್ಚರಿಕೆಯನ್ನೂ ನೀಡಿದ್ದಾರೆ. ಹೀಗಾಗಿ ಸಗಣಿ ಬಣ್ಣದ ಬೆಲೆ ಏರುವ ಸಾಧ್ಯತೆ ಹೆಚ್ಚಾಗಿದ್ದು, ಸ್ವಸಹಾಯ ಸಂಘದ ಮಹಿಳೆಯರು, ಹಸುಗಳ ಮಾಲೀಕರೆಲ್ಲ ಫುಲ್ ಖುಷಿಯಾಗಿದ್ದಾರೆ.
ಇದನ್ನೂ ಓದಿ: ಗೋ ಸಂಪತ್ತು | ಪ್ರಪಂಚಕ್ಕೆ ಭಾರತ ನೀಡಿದ ದಿವ್ಯ ಔಷಧ ಪಂಚಗವ್ಯ