ಉತ್ತರ ಪ್ರದೇಶದಲ್ಲಿ ಕ್ರಿಮಿನಲ್ಗಳನ್ನು ಅಲ್ಲಿನ ಪೊಲೀಸರು ಮುಲಾಜಿಲ್ಲದೆ ಎನ್ಕೌಂಟರ್ (UP Encounter) ಮಾಡಿ ಕೊಂದು ಹಾಕುತ್ತಿದ್ದಾರೆ. ಇದೀಗ ಉತ್ತರ ಪ್ರದೇಶದ ವಿಶೇಷ ಟಾಸ್ಕ್ ಫೋರ್ಸ್ (STF) ಮತ್ತೊಬ್ಬ ಕ್ರಿಮಿನಲ್ನನ್ನು ಎನ್ಕೌಂಟರ್ನಲ್ಲಿ ಹತ್ಯೆ (Uttar Pradesh Encounter) ಮಾಡಿದೆ. ಆತನ ಹೆಸರು ಗುಫ್ರಾನ್ ಎಂದಾಗಿದ್ದು, 13ಕ್ಕೂ ಹೆಚ್ಚು ಕೊಲೆ, ಡಕಾಯಿತಿ, ಕಳ್ಳತನದ ಕೇಸ್ಗಳಲ್ಲಿ ಇವನು ಪೊಲೀಸರಿಗೆ ಬೇಕಾದವನಾಗಿದ್ದ. ಪ್ರತಾಪ್ಗಢ್ ಮತ್ತು ಸುಲ್ತಾನಪುರ ಠಾಣೆಗಳಲ್ಲಿ ಗುಫ್ರಾನ್ ವಿರುದ್ಧ ಕೇಸ್ಗಳು ದಾಖಲಾಗಿದ್ದವು. ಇವನ ತಲೆಗೆ 1,25,000 ರೂ.ಬಹುಮಾನ ಕೂಡ ಇತ್ತು. ಮಂಗಳವಾರ ಮುಂಜಾನೆ ಸುಮಾರು 5ಗಂಟೆ ಹೊತ್ತಿಗೆ ಕೌಶಂಬಿ ಎಂಬಲ್ಲಿ ಪೊಲೀಸರು ಈತನ ಉಸಿರು ನಿಲ್ಲಿಸಿದ್ದಾರೆ. ಗುಫ್ರಾನ್ಗೆ ಮೊದಲು ಗುಂಡು ಹೊಡೆದ ಪೊಲೀಸರು ಅವನನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ಆದರೆ ಅಷ್ಟರಲ್ಲೇ ಅವನ ಜೀವ ಹೋಗಿತ್ತು.
Uttar Pradesh | A criminal identified as Mo. Gufran has been killed in an encounter with UP STF near the Samda sugar mill of Manjhanpur, Kaushambi. He was carrying a reward of Rs 1,25,000: SP Kaushambi Brijesh Srivastava pic.twitter.com/iUdihy1yCe
— ANI UP/Uttarakhand (@ANINewsUP) June 27, 2023
ವಿವಿಧ ಕೊಲೆ, ದರೋಡೆ ಕೇಸ್ನಡಿ ಕಳೆದ ಆರು ವರ್ಷಗಳಿಂದಲೂ ಗುಫ್ರಾನ್ನನ್ನು ಪೊಲೀಸರು ಹುಡುಕುತ್ತಿದ್ದರು. ಮೂಲತಃ ಪ್ರತಾಪ್ಗಢ್ ನಿವಾಸಿಯಾಗಿದ್ದ ಗುಫ್ರಾನ್ ಪೊಲೀಸ್ ಕಣ್ಣಿಗೆ ಬೀಳದಂತೆ ಓಡಾಡಿಕೊಂಡಿದ್ದ. ಇತ್ತೀಚೆಗೆ ಅಂದರೆ ಏಪ್ರಿಲ್ನಲ್ಲಿ ಒಂದು ಜ್ಯುವೆಲರಿ ಶಾಪ್ ಲೂಟಿ ಮಾಡಿದ್ದ. ಇಂದು ಮುಂಜಾನೆ ಗುಫ್ರಾನ್ನನ್ನು ಕೌಶಂಬಿಯ ಸಮದಾ ಎಂಬಲ್ಲಿ ಪೊಲೀಸರು ತಡೆಯಲು ಯತ್ನಿಸಿದ್ದಾರೆ. ಆದರೆ ಗುಫ್ರಾನ್ ಪೊಲೀಸರಿಗೇ ಗುಂಡುಹಾರಿಸಿದ್ದಾನೆ. ಅದಕ್ಕೆ ಪ್ರತಿಯಾಗಿ ಪೊಲೀಸರು ಗುಂಡು ಹಾರಿಸಿದಾಗ ತೀವ್ರವಾಗಿ ಗಾಯಗೊಂಡು ಬಿದ್ದಿದ್ದ. ಅವನಿಂದ 9ಎಂಎಂ ಕಾರ್ಬೈನ್, ಪಿಸ್ತೂಲ್ ಮತ್ತು ಅಪಾಚೆ ಬೈಕ್ನ್ನು ವಶಪಡಿಸಿಕೊಳ್ಳಲಾಗಿದೆ. ಎನ್ಕೌಂಟರ್ ಬಗ್ಗೆ ಉತ್ತರ ಪ್ರದೇಶ ವಿಶೇಷ ಟಾಸ್ಕ್ ಫೋರ್ಸ್ ಡಿವೈ ಎಸ್ಪಿ ಧರ್ಮೇಶ್ ಕುಮಾರ್ ಶಹಿ ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: ಉತ್ತರ ಪ್ರದೇಶದಲ್ಲಿ ಮತ್ತೊಂದು ಎನ್ಕೌಂಟರ್; ಪೊಲೀಸ್ ಗುಂಡಿಗೆ ಬಲಿಯಾದ ಗ್ಯಾಂಗ್ಸ್ಟರ್ ಅನಿಲ್ ದುಜಾನಾ
ಉತ್ತರಪ್ರದೇಶದಲ್ಲಿ ಕಳೆದ ಮೂರ್ನಾಲ್ಕು ತಿಂಗಳುಗಳಿಂದಲೂ ಒಬ್ಬಲ್ಲ ಒಬ್ಬ ಕ್ರಿಮಿನಲ್ನನ್ನು ಎನ್ಕೌಂಟರ್ನಲ್ಲಿ ಹತ್ಯೆ ಮಾಡಲಾಗುತ್ತಿದೆ. ಗ್ಯಾಂಗ್ಸ್ಟರ್ ಮತ್ತು ರಾಜಕಾರಣಿಯಾಗಿದ್ದ ಅತೀಕ್ ಅಹ್ಮದ್ ಪುತ್ರ ಅಸಾದ್ನನ್ನು ಏಪ್ರಿಲ್ನಲ್ಲಿ ಎನ್ಕೌಂಟರ್ನಲ್ಲಿ ಹತ್ಯೆ ಮಾಡಲಾಗಿತ್ತು. ಅದಾದ ಬಳಿಕ ಅತೀಕ್ ಅಹ್ಮದ್ ಮತ್ತು ಅವನ ತಮ್ಮ ಅಶ್ರಾಫ್, ಪೊಲೀಸರ ಎದುರಲ್ಲೇ ದುಷ್ಕರ್ಮಿಗಳ ಗುಂಡಿಗೆ ಬಲಿಯಾಗಿದ್ದರು. ಈ ಹತ್ಯೆಯನ್ನು ಪೊಲೀಸರೇ ಮಾಡಿಸಿದ್ದಾರೆ ಎಂಬ ಆರೋಪ ಕೂಡ ಚಾಲ್ತಿಯಲ್ಲಿದೆ. ಮೇ ತಿಂಗಳಲ್ಲಿ ಗ್ಯಾಂಗ್ಸ್ಟರ್ ಅನಿಲ್ ದುಜಾನಾ ಎಂಬಾತನನ್ನು ಪೊಲೀಸರು ಕೊಂದಿದ್ದು. ಈತನ ವಿರುದ್ಧ 62 ಕ್ರಿಮಿನಲ್ ಕೇಸ್ಗಳು ಇದ್ದವು.