ನವ ದೆಹಲಿ: ಭಾರತದಲ್ಲಿ ದೊಡ್ಡ ಮಟ್ಟದ ಮಾದಕ ದ್ರವ್ಯ ವಿರೋಧಿ ಕಾರ್ಯಾಚರಣೆಯೊಂದು ನಡೆದಿದೆ. ಡ್ರಗ್ಸ್ ಹೊಂದಿದ್ದ ಅಫ್ಘಾನಿಸ್ತಾನದ ಇಬ್ಬರು ಪ್ರಜೆಗಳನ್ನು ಅರೆಸ್ಟ್ ಮಾಡಿದ ದೆಹಲಿ ಪೊಲೀಸ್ ವಿಶೇಷ ವಿಭಾಗದ ಸಿಬ್ಬಂದಿ, ಅವರಿಂದ 1200 ಕೋಟಿ ರೂಪಾಯಿ ಮೌಲ್ಯದ ಮಾದಕ ದ್ರವ್ಯವನ್ನು ವಶಪಡಿಸಿಕೊಂಡಿದ್ದಾರೆ. ಅಂದಹಾಗೇ, ಈ ಇಬ್ಬರ ಬಳಿ 312.5 ಕೆಜಿಗಳಷ್ಟು ಮೆಥಾಂಫೆಟಮೈನ್ ಡ್ರಗ್ಸ್ ಮತ್ತು 10 ಕೆಜಿ ಹೆರೋಯಿನ್ ಇತ್ತು.
ಇಂದು ಬಂಧಿತರಾದ ಇಬ್ಬರೂ ಅಫ್ಘಾನಿಸ್ತಾನ ಪ್ರಜೆಗಳು 2016ರಿಂದಲೂ ಭಾರತದಲ್ಲೇ ವಾಸವಾಗಿದ್ದರು. ಉತ್ತರ ಪ್ರದೇಶದ ಲಖನೌನ ಗೋದಾಮಿನಲ್ಲಿ 606 ಬ್ಯಾಗ್ಗಳಲ್ಲಿ ಮೆಥಾಂಫೆಟಮೈನ್ ಡ್ರಗ್ಸ್ ಇತ್ತು. ಇಷ್ಟು ಬೃಹತ್ ಪ್ರಮಾಣದಲ್ಲಿ ಮೆಥಾಂಫೆಟಮೈನ್ ಸಂಗ್ರಹ ಆಗಿದ್ದರ ಉದಾಹರಣೆ ದೇಶದಲ್ಲಿ ಇನ್ನೊಂದಿಲ್ಲ ಎಂದೂ ದೆಹಲಿ ಪೊಲೀಸರು ತಿಳಿಸಿದ್ದಾರೆ.
ಅಂದಹಾಗೇ, ಈ ಮೆಥಾಂಫೆಟಮೈನ್ ಎಂಬುದು ಜಗತ್ತಿನ ಅತ್ಯಂತ ದುಬಾರಿ ಮಾದಕ ವಸ್ತು. ಅನೇಕರು ಇದಕ್ಕೆ ಅಡಿಕ್ಟ್ ಆಗಿದ್ದಾರೆ. ಹಾಗೇ, ಅತ್ಯಂತ ಅಪಾಯಕಾರಿ ಡ್ರಗ್ಸ್ ಕೂಡ ಹೌದು. ಇದು ಮನುಷ್ಯದ ಇಡೀ ದೇಹದ ಕೇಂದ್ರ ನರಮಂಡಲ ವ್ಯವಸ್ಥೆಯನ್ನೇ ಹಾಳು ಮಾಡುತ್ತದೆ. ಇದು ನಿಷೇಧಿತವಾಗಿದ್ದರೂ ಅಕ್ರಮವಾಗಿ ಬಳಕೆ ಮಾಡುವವರು ಇದ್ದೇ ಇದ್ದಾರೆ. ಇತ್ತೀಚೆಗೆ ಮೃತಪಟ್ಟ ಬಿಜೆಪಿ ನಾಯಕಿ, ನಟಿ ಸೋನಾಲಿ ಫೋಗಟ್ ಸಾವಿಗೂ ಮುನ್ನ ಇದೇ ದ್ರವ್ಯ ಸೇವಿಸಿದ್ದು ದೃಢಪಟ್ಟಿತ್ತು. ವಿದೇಶಿ ಮಾರುಕಟ್ಟೆಯಲ್ಲಿ ಮೆಥಾಂಫೆಟಮೈನ್ ಒಂದು ಗ್ರಾಂ. ಗೆ 30 ಸಾವಿರ ರೂಪಾಯಿ ಬೆಲೆಯಿದೆ.
ಸೆಪ್ಟೆಂಬರ್ 4ರಂದು ದೆಹಲಿ ಪೊಲೀಸ್ ಕ್ರೈಂ ಬ್ರ್ಯಾಂಚ್ ಮತ್ತು ಗುಜರಾತ್ ಆ್ಯಂಟಿ ಟೆರರ್ ಸ್ಕ್ವಾಡ್ ಜಂಟಿಯಾಗಿ ಒಂದು ಅಂತಾರಾಷ್ಟ್ರೀಯ ಮಾದಕ ದ್ರವ್ಯ ಕಳ್ಳಸಾಗಣೆ ಜಾಲವನ್ನು ಬೇಧಿಸಿದ್ದರು. ದೆಹಲಿಯ ವಸಂತ್ ಕುಂಜ್ ಏರಿಯಾದಲ್ಲಿ ಅಫ್ಘಾನ್ ಪ್ರಜೆಯೊಬ್ಬನನ್ನು ಬಂಧಿಸಿ, ಆತನಿಂದ 20 ಕೋಟಿ ರೂಪಾಯಿ ಮೌಲ್ಯದ 4 ಕೆಜಿ ಹೆರಾಯಿನ್ ವಶಪಡಿಸಿಕೊಂಡಿದ್ದರು.
ಇದನ್ನೂ ಓದಿ: ವಿಮಾನ ನಿಲ್ದಾಣದಲ್ಲಿ ಅಂತಾರಾಷ್ಟ್ರೀಯ ಡ್ರಗ್‌ ಪೆಡ್ಲರ್‌ ಬಂಧನ; 14 ಕೆಜಿ ಹೆರಾಯಿನ್ ಜಪ್ತಿ