ನವದೆಹಲಿ: ಬೆಳಕಿನ ಹಬ್ಬ ದೀಪಾವಳಿಗಾಗಿ ಗುಜರಾತ್ ಜನತೆಗೆ ಸರ್ಕಾರದ ಕಡೆಯಿಂದ ಒಂದು ಉಡುಗೊರೆ ಸಿಕ್ಕಿದೆ. ಅಂದಹಾಗೇ ಇದು ವಾಹನ ಮಾಲೀಕರು, ಸವಾರರಿಗೆ ಖುಷಿ ಕೊಡುವ ಗಿಫ್ಟ್..! ಗುಜರಾತ್ನಲ್ಲಿ ದೀಪಾವಳಿ ನಿಮಿತ್ತ ಅಕ್ಟೋಬರ್ 21ರಿಂದ 27ರವರೆಗೆ ಯಾರೇ ಸಂಚಾರಿ ನಿಯಮ (ಟ್ರಾಫಿಕ್ ರೂಲ್ಸ್) ಉಲ್ಲಂಘನೆ ಮಾಡಿದರೂ ಅವರಿಗೆ ದಂಡ ವಿಧಿಸುವುದಿಲ್ಲ ಎಂದು ಅಲ್ಲಿನ ಗೃಹ ಇಲಾಖೆ ಸಹಾಯಕ ಸಚಿವ ಹರ್ಷ ಸಾಂಘ್ವಿ ಘೋಷಿಸಿದ್ದಾರೆ. ಹಾಗೇ, ಇದು ಗುಜರಾತ್ ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್ ಅವರ ಜನಪರ ನಿರ್ಧಾರ ಎಂದೂ ಅವರು ಹೇಳಿದ್ದಾರೆ.
‘ದೀಪಾವಳಿ ನಿಮಿತ್ತ 7 ದಿನ ಯಾರೇ ಟ್ರಾಫಿಕ್ ರೂಲ್ಸ್ ಬ್ರೇಕ್ ಮಾಡಿದರೂ ಪೊಲೀಸರು ಅವರಿಗೆ ದಂಡ ವಿಧಿಸುವುದಿಲ್ಲ. ಅವರಿಗೆ ಒಂದು ಹೂವು ಕೊಟ್ಟು ಸಂಚಾರಿ ನಿಯಮಗಳ ಬಗ್ಗೆ ತಿಳಿಸಲಾಗುವುದು. ಇನ್ನೊಮ್ಮೆ ಇಂಥ ತಪ್ಪು ಮಾಡಬೇಡಿ ಎಂದು ಮನವೊಲಿಸಲಾಗುವುದು. ಹಾಗಂತ ಯಾರೂ ಟ್ರಾಫಿಕ್ ನಿಯಮಗಳನ್ನು ಮರೆಯಬೇಡಿ, ಉಲ್ಲಂಘಿಸಬೇಡಿ. ದಂಡ ಇರಲಿ-ಬಿಡಲಿ ಜನರು ಕಾನೂನು ಮೀರಬೇಡಿ’ ಎಂದು ಸಚಿವರು ಹೇಳಿದ್ದಾರೆ.
ಗುಜರಾತ್ ರಾಜ್ಯ ಸರ್ಕಾರದ ಈ ಉಡುಗೊರೆಯಿಂದ ಅಲ್ಲಿನ ಜನರು ಫುಲ್ ಖುಷಿಯಾಗಿದ್ದಾರೆ. ಬೇರೆ ರಾಜ್ಯದವರೂ ಟ್ವಿಟರ್ನಲ್ಲಿ ಈ ವಿಷಯ ಚರ್ಚೆ ಮಾಡುತ್ತಿದ್ದಾರೆ. ‘ಹೀಗೆ ಏಳು ದಿನ ದಂಡ ಇಲ್ಲ ಎನ್ನುವ ಮೂಲಕ ಜನರು ಸ್ವಯಂ ಇಚ್ಛೆಯಿಂದಲೇ ಟ್ರಾಫಿಕ್ ನಿಯಮ ಪಾಲನೆ ಮಾಡಲು ಪ್ರೇರೇಪಿಸಲಾಗುತ್ತಿರುವುದು ಶ್ಲಾಘನೀಯ’ ಎಂದು ಅನೇಕರು ಹೇಳಿದ್ದಾರೆ. ಹಾಗೇ, ಇನ್ನೂ ಕೆಲವರು ಇದು ಒಳ್ಳೆಯ ಉಡುಗೊರೆಯಲ್ಲ. ನಮ್ಮ ಜನ ಅಷ್ಟೆಲ್ಲ ಪ್ರಾಮಾಣಿಕರು, ತಿಳುವಳಿಕಸ್ಥರು ಅಲ್ಲ. ಈ ಏಳು ದಿನದಲ್ಲಿ ಅಪಘಾತದ ಪ್ರಮಾಣ ಹೆಚ್ಚಾಗಬಹುದು’ ಎಂದು ಗುಜರಾತ್ ಸರ್ಕಾರವನ್ನು ಎಚ್ಚರಿಸುವ ಕೆಲಸವನ್ನೂ ಮಾಡಿದ್ದಾರೆ.
ಇದನ್ನೂ ಓದಿ: Narendra Modi | ಗುಜರಾತ್ನಲ್ಲಿ ಮಕ್ಕಳ ಜತೆ ಬೆಂಚ್‌ ಮೇಲೆ ಕುಳಿತು ಪಾಠ ಆಲಿಸಿದ ಪ್ರಧಾನಿ ಮೋದಿ