ಶಿಶುವಿಹಾರದಲ್ಲಿ ಕಾಮುಕ ಚಾಲಕ; ನಾಲ್ಕು ವರ್ಷದ ಬಾಲಕಿ ಮೇಲೆ ನಿರಂತರ ಅತ್ಯಾಚಾರ ಮಾಡಿ ಜೈಲುಪಾಲಾದ

ಹೈದರಾಬಾದ್: ಜಗತ್ತಿನಲ್ಲಿ ಎಂತೆಂಥಾ ಕ್ರೂರಿಗಳು ಇದ್ದಾರೆ…ಪುಟಾಣಿ ಮಕ್ಕಳನ್ನೂ ಬಿಡದ ಕಾಮುಕರು ಹೆಚ್ಚುತ್ತಿದ್ದಾರೆ. ಮೂರು-ನಾಲ್ಕು ವರ್ಷ ತುಂಬಿದ ಹೆಣ್ಣು ಮಕ್ಕಳ ಮೇಲಿನ ಅತ್ಯಾಚಾರ ಪ್ರಕರಣಗಳು ಏರಿಕೆಯಾಗುತ್ತಿವೆ. ಹೈದರಾಬಾದ್​​ನ ಬಂಜಾರಾ ಹಿಲ್ಸ್​​ನಲ್ಲಿ ಇಂಥದ್ದೇ ಒಂದು ದುರ್ಘಟನೆ ನಡೆದಿದೆ. ಇಲ್ಲಿನ ಶಾಲೆಯೊಂದರ ಶಿಶುವಿಹಾರ ವಿಭಾಗದ ಪ್ರಾಂಶುಪಾಲರ ಕಾರು ಚಾಲಕನೊಬ್ಬ ಅದೇ ಶಿಶುವಿಹಾರಕ್ಕೆ ಬರುತ್ತಿದ್ದ ನಾಲ್ಕು ವರ್ಷದ ಬಾಲಕಿಯ ಮೇಲೆ ಕಳೆದ 2 ತಿಂಗಳಿಂದ ನಿರಂತರವಾಗಿ ದೌರ್ಜನ್ಯ ಎಸಗುತ್ತಿದ್ದ. ಆತನನ್ನು ಈಗ ಪೊಲೀಸರು ಬಂಧಿಸಿದ್ದಾರೆ.

ಚಾಲಕನ ಕಾಮುಕತನ ಬೆಳಕಿಗೆ ಬರುತ್ತಿದ್ದಂತೆ ಆ ಶಿಶುವಿಹಾರಕ್ಕೆ, ಆ ಶಾಲೆಗೆ ಮಕ್ಕಳನ್ನು ಕಳಿಸುತ್ತಿದ್ದ ಪಾಲಕರೆಲ್ಲರೂ ಸೇರಿ ಪ್ರತಿಭಟನೆ ನಡೆಸಿದ್ದಾರೆ. ಶಾಲೆಯ ಆಡಳಿತದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿ, ಕ್ರೋಧ ಭರಿತ ಪ್ರತಿಭಟನೆ ನಡೆಸಿದ್ದಾರೆ. ಹೀಗಾಗಿ ಶಾಲೆ ಸುತ್ತಲೂ ಭದ್ರತೆ ಹೆಚ್ಚಿಸಲಾಗಿದ್ದು, ಮೂರು ದಿನ ರಜಾವನ್ನೂ ಘೋಷಿಸಲಾಗಿದೆ.

ಈ ಬಾಲಕಿಯ ವರ್ತನೆಯಲ್ಲಿ ಕಳೆದ ಎರಡು ತಿಂಗಳಿಂದ ಬದಲಾವಣೆ ಆಗುತ್ತಿತ್ತು. ಒಂದೇ ಸಮ ಅಳುತ್ತಿದ್ದಳು. ಖಿನ್ನತೆಗೆ ಜಾರುತ್ತಿದ್ದಳು. ಅದರಲ್ಲೂ ಸೋಮವಾರ (ಅ.17) ಪ್ರಾಂಶುಪಾಲರ ಕೊಠಡಿ ಎದುರೇ ಇರುವ ಲ್ಯಾಬ್​​ನಲ್ಲಿ ಆಕೆಯ ಮೇಲೆ ಚಾಲಕ ಅತ್ಯಾಚಾರ ಮಾಡಿದ್ದ. ಅಂದೂ ಮನೆಗೆ ಬಂದವಳು ಅಳುತ್ತಿದ್ದಳು. ಆಗ ಆಕೆಯ ತಾಯಿ ಪುಟ್ಟ ಹುಡುಗಿಯನ್ನು ನಂಬಿಸಿ, ಏನೇನೋ ಹೇಳಿ ವಿಷಯ ಕೇಳಿದ್ದಾಳೆ. ಆಗ ಬಾಲಕಿ ಶಾಲೆಯಲ್ಲಿ ನಡೆದ್ದನ್ನು ಹೇಳಿದ್ದಾಳೆ. ಮರುದಿನ ತಂದೆ-ತಾಯಿ ಇಬ್ಬರೂ ಮಗಳೊಂದಿಗೆ ಶಿಶುವಿಹಾರಕ್ಕೆ ಬಂದಿದ್ದರು. ಆಗ ಆ ಹುಡುಗಿ ಆರೋಪಿ ಚಾಲಕನನ್ನು ತೋರಿಸಿದ್ದಾಳೆ. ಕೂಡಲೇ ಪಾಲಕರು ಬಂಜಾರಾ ಹಿಲ್ಸ್​​ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಬಾಲಕಿಗೆ ಭಯ ಹೋಗಲಾಡಿಸಲು ಸದ್ಯ ಕೌನ್ಸಿಲಿಂಗ್​ ಮಾಡಲಾಗುತ್ತಿದೆ.

ಇದನ್ನೂ ಓದಿ: ಬಾಲಕಿ ಅತ್ಯಾಚಾರ, ಕೊಲೆ ಪ್ರಕರಣ ಹಿನ್ನೆಲೆ: ಮಂಡ್ಯ ಜಿಲ್ಲೆಯಲ್ಲಿ ಅನಧಿಕೃತ ಟ್ಯೂಷನ್‌ಗೆ ನಿಷೇಧ