ಕಾಂಗ್ರೆಸ್ ತೊರೆದ ಗುಲಾಂ ನಬಿ ಆಜಾದ್ ಇಂದು (ಸೆಪ್ಟೆಂಬರ್ 4) ಇಂದು ತಮ್ಮ ರಾಜಕೀಯ ಜೀವನದ ಹೊಸ ಅಧ್ಯಾಯ ಪ್ರಾರಂಭಿಸಲಿದ್ದಾರೆ. ತವರು ರಾಜ್ಯ ಜಮ್ಮು-ಕಾಶ್ಮೀರದಲ್ಲಿ ತಮ್ಮ ಹೊಸ ರಾಜಕೀಯ ಪಕ್ಷದ ಮೊದಲ ಘಟಕವನ್ನು ಆರಂಭ ಮಾಡಲಿದ್ದಾರೆ. ಇಂದು ಬೆಳಗ್ಗೆ 11 ಗಂಟೆ ಹೊತ್ತಿಗೆ ಜಮ್ಮು-ಕಾಶ್ಮೀರ ತಲುಪಲಿರುವ ಆಜಾದ್ರನ್ನು ಅವರ ಬೆಂಬಲಿಗರು ಏರ್ಪೋರ್ಟ್ನಲ್ಲಿಯೇ ಸ್ವಾಗತಿಸಲಿದ್ದಾರೆ. ಅಲ್ಲಿಂದ ನೇರವಾಗಿ ಸೈನಿಕ್ ಕಾಲೋನಿಗೆ ತೆರಳಿ ಸಾರ್ವಜನಿಕರನ್ನು ಉದ್ದೇಶಿಸಿ ಮಾತನಾಡುವರು. ಆಜಾದ್ ನಡೆಸಲಿರುವ ಱಲಿಯಲ್ಲಿ ಅಂದಾಜು 20 ಸಾವಿರ ಜನರು ಪಾಲ್ಗೊಳ್ಳುವ ನಿರೀಕ್ಷೆಯಿದೆ.
ಗುಲಾಂ ನಬಿ ಆಜಾದ್ ಅವರು ಕಾಂಗ್ರೆಸ್ ಜತೆಗಿನ ಬಾಂಧವ್ಯವನ್ನು ಆಗಸ್ಟ್ 26ರಂದು ಕಳಚಿಕೊಂಡಿದ್ದಾರೆ. ಇಡೀ ಪಕ್ಷ ಸಂಪೂರ್ಣವಾಗಿ ನಾಶವಾಗಿದೆ. ಇದಕ್ಕೆ ನೇರ ಹೊಣೆ ರಾಹುಲ್ ಗಾಂಧಿ ಎಂದು ಆರೋಪ ಮಾಡಿ, ರಾಜೀನಾಮೆ ಕೊಟ್ಟಿದ್ದಾರೆ. ಸೋನಿಯಾ ಗಾಂಧಿಗೆ ಐದು ಪುಟಗಳ ರಾಜೀನಾಮೆ ಪತ್ರ ಸಲ್ಲಿಸಿ, ‘ಇಂದು ಕಾಂಗ್ರೆಸ್ ಅಧಃಪತನಕ್ಕೆ ಇಳಿದಿದ್ದು ನಿಮ್ಮ ಪುತ್ರನಿಂದಲೇ’ ಎಂಬುದನ್ನು ನೇರವಾಗಿಯೇ ಹೇಳಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಕಾಂಗ್ರೆಸ್ಗೆ ಪದೇಪದೆ ಹೊಡೆತ ಬೀಳುತ್ತಿದೆ. ಗಣ್ಯರು, ಹೆಸರು ಮಾತಿನ ನಾಯಕರೇ ಪಕ್ಷ ಬಿಟ್ಟು ಹೋಗುತ್ತಿದ್ದಾರೆ. ಕಪಿಲ್ ಸಿಬಲ್, ಅಶ್ವನಿ ಕುಮಾರ್ ಮತ್ತಿತರ ಪ್ರಮುಖ ನಾಯಕರು ರಾಜೀನಾಮೆ ಕೊಟ್ಟಿದ್ದಕ್ಕಿಂತಲೂ ಈ ಬಾರಿ ಗುಲಾಂ ನಬಿ ಆಜಾದ್ ಹೊರಟಿದ್ದು ಕೈಗೆ ಜಾಸ್ತಿ ಆಘಾತ ಕೊಟ್ಟಿದೆ.
ಡಿಎನ್ಎ ಬದಲಾಗದು !
ಗುಲಾಂ ನಬಿ ಆಜಾದ್ ಅವರು ಕಾಂಗ್ರೆಸ್ಗೆ ರಾಜೀನಾಮೆ ಕೊಟ್ಟ ಬೆನ್ನಲ್ಲೇ ಆ ಪಕ್ಷದ ನಾಯಕ ಜೈರಾಮ್ ರಮೇಶ್ ತೀವ್ರವಾಗಿ ಟೀಕಿಸಿದ್ದರು. ಟ್ವೀಟ್ ಮಾಡಿದ್ದ ಅವರು, ‘ಆಜಾದ್ ಅವರ ಡಿಎನ್ಎ ಮೋದಿ ಫೈಡ್ (Modi Fied) ಆಗಿದೆ’ ಎಂದು ಹೇಳಿದ್ದರು. ಅದಕ್ಕೆ ಶನಿವಾರ (ಸೆಪ್ಟೆಂಬರ್ 3) ತಿರುಗೇಟು ಕೊಟ್ಟ ಗುಲಾಂ ನಬಿ ಆಜಾದ್ ‘ಪ್ರತಿಪಕ್ಷಗಳ ನಾಯಕರನ್ನು ಭೇಟಿಯಾಗಬಾರದು ಎಂಬ ನಿಯಮವಿಲ್ಲ. ಹಾಗೇ, ಮತ್ತೊಂದು ಪಕ್ಷದ ರಾಜಕೀಯ ನಾಯಕರನ್ನು ಭೇಟಿ ಮಾಡಿದಾಕ್ಷಣ ನಮ್ಮ ಡಿಎನ್ಎ ಬದಲಾಗುವುದಿಲ್ಲ’ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Ghulam Nabi Azad | ಗುಲಾಂ ನಬಿಗೆ ಬೆಂಬಲಿಸಿ ಜಮ್ಮುವಿನಲ್ಲಿ 20 ನಾಯಕರು ಕಾಂಗ್ರೆಸ್ಗೆ ವಿದಾಯ!