ಸೂರತ್: ಹೊಟ್ಟೆಯಲ್ಲಿ ಹುಟ್ಟಿದ ಶಿಶುವನ್ನು ಕೊಂದ 15ವರ್ಷದ ಅಪ್ರಾಪ್ತ ವಯಸ್ಸಿನ ‘ಅಮ್ಮ’ನನ್ನು ಪೊಲೀಸರು ಬಂಧಿಸಿದ್ದಾರೆ. ಈಕೆ ಗುಜರಾತ್ನ ಸೂರತ್ನವಳಾಗಿದ್ದು, ಎರಡಂತಸ್ತಿನ ಕಟ್ಟಡದ ಮೇಲ್ಭಾಗದಿಂದ ತನ್ನ ಮಗುವನ್ನು ಎಸೆದು ಹತ್ಯೆ ಮಾಡಿದ್ದಾಳೆ.
ಸೂರತ್ನ ಮಗ್ದಲ್ಲಾ ಎಂಬ ಏರಿಯಾದಲ್ಲಿ ನವಜಾತ ಶಿಶುವಿನ ದೇಹ ರಕ್ತಸಿಕ್ತವಾಗಿ ನೆಲದ ಮೇಲೆ ಬಿದ್ದಿತ್ತು. ಅದನ್ನು ಸ್ಥಳೀಯರು ಲಗುಬಗೆಯಿಂದ ಆಸ್ಪತ್ರೆಗೆ ತೆಗೆದುಕೊಂಡು ಹೋದರು. ಆದರೆ ಅಷ್ಟರಲ್ಲಾಗಲೇ ಅದರ ಜೀವ ಹೋಗಿತ್ತು. ಉಸಿರು ಇಲ್ಲ ಎಂದು ವೈದ್ಯರು ಹೇಳಿದರು. ಕೂಡಲೇ ಪೊಲೀಸರಿಗೆ ಮಾಹಿತಿ ನೀಡಲಾಯಿತು. ಆ ಶಿಶು ಬಿದ್ದ ಸಮೀಪದ ಸಿಸಿಟಿವಿ ಫೂಟೇಜ್ ಪರಿಶೀಲನೆ ಮಾಡಿದಾಗ, ಅದನ್ನು ಕಟ್ಟಡವೊಂದರ ಮೇಲ್ಭಾಗದಿಂದ ಕೆಳಗೆ ಎಸೆದಿದ್ದು ದೃಢಪಟ್ಟಿದೆ. ಈ ಬಗ್ಗೆ ವಲಯ 4ರ ಪೊಲೀಸ್ ಉಪ ಆಯುಕ್ತ ಸಾಗರ್ ಬಾಗ್ಮಾರ್ ಮಾಹಿತಿ ನೀಡಿದ್ದಾರೆ.
ಮಗುವನ್ನು ಎಸೆದ ಹುಡುಗಿಯನ್ನು ಪೊಲೀಸರು ವಶಕ್ಕೆ ಪಡೆದು ಪ್ರಶ್ನಿಸಿದಾಗ ‘ನಮ್ಮ ಮನೆಯ ಸಮೀಪದಲ್ಲೇ ಇದ್ದ ಯುವಕನೊಬ್ಬ ನನ್ನ ಮೇಲೆ ಅತ್ಯಾಚಾರ ಮಾಡಿದ್ದ. ಹೀಗಾಗಿ ಗರ್ಭಿಣಿಯಾಗಿದ್ದೆ. ಅದಕ್ಕಾಗಿಯೇ ಮಗು ಹುಟ್ಟುತ್ತಿದ್ದಂತೆ ಅದನ್ನು ಎಸೆದೆ’ ಎಂದು ಹೇಳಿಕೊಂಡಿದ್ದಾಳೆ. ಆಕೆ ಹೇಳಿಕೆ ಆಧರಿಸಿ ಆ ಹುಡುಗನನ್ನೂ ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದಾರೆ. ಆಕೆ ಮತ್ತು ನನ್ನ ಮಧ್ಯೆ ಸಂಬಂಧ ಇತ್ತು ಎಂದು ಅವನು ಹೇಳಿಕೊಂಡಿದ್ದಾನೆ. ಪೊಲೀಸರು ತನಿಖೆ ಪ್ರಾರಂಭ ಮಾಡಿದ್ದಾರೆ.
ಇದನ್ನೂ ಓದಿ: Crime news | ಆಸ್ತಿ ಕೊಡದೆ ಎರಡನೇ ಮದುವೆಯಲ್ಲಿ ಮಗು ಮಾಡಿಕೊಂಡ ಅಪ್ಪ, ಸುಪಾರಿ ನೀಡಿದ ಮಕ್ಕಳು