ಪ್ರಧಾನಿ ಕಾರ್ಯಾಲಯದಲ್ಲಿ ಹೆಚ್ಚುವರಿ ಕಾರ್ಯದರ್ಶಿ ಎಂದು ಹೇಳಿಕೊಂಡು, ವಂಚಿಸುತ್ತಿದ್ದ ಗುಜರಾತ್ ಮೂಲದ ವ್ಯಕ್ತಿಯೊಬ್ಬನ್ನು ಶ್ರೀನಗರದ ಪಂಚತಾರಾ ಹೋಟೆಲ್ನಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಈತನ ಹೆಸರು ಕಿರಣ್ ಜೆ ಪಟೇಲ್. ಬ್ಲ್ಯೂಟಿಕ್ ಮೂಲಕ ದೃಢೀಕರಣಗೊಂಡಿರುವ ಟ್ವಿಟರ್ ಅಕೌಂಟ್ನ್ನು ಹೊಂದಿದ್ದ, ಸಾವಿರಾರು ಜನ ಫಾಲೋವರ್ಸ್ ಕೂಡ ಇದ್ದರು. ತಾನು ಪ್ರಧಾನ ಮಂತ್ರಿ ಕಚೇರಿಯಲ್ಲಿ ಕಾರ್ಯತಂತ್ರ ಮತ್ತು ಪ್ರಚಾರ ವಿಭಾಗದ ಹೆಚ್ಚುವರಿ ನಿರ್ದೇಶಕ ಎಂದು ಹೋದಲ್ಲೆಲ್ಲ ಹೇಳಿಕೊಳ್ಳುತ್ತಿದ್ದ.
ಈ ಕಿರಣ್ ಜೆ ಪಟೇಲ್ ಕಾಶ್ಮೀರದಲ್ಲಿರುವ ಹಲವು ಪ್ರವಾಸಿ ತಾಣಗಳಿಗೆ ಭೇಟಿಕೊಟ್ಟಿದ್ದ. ಕೇಂದ್ರ ಸರ್ಕಾರ ವತಿಯಿಂದ ಪ್ರವಾಸಿ ತಾಣಗಳ ಹೋಟೆಲ್ ವ್ಯವಸ್ಥೆಯನ್ನು ಪರಿಶೀಲಿಸಲು ಬಂದಿದ್ದೇನೆ ಎನ್ನುತ್ತಿದ್ದ. ಅದೆಷ್ಟರ ಮಟ್ಟಿಗೆ ವಂಚಿಸಿದ್ದ ಎಂದರೆ, ಈ ವ್ಯಕ್ತಿ ಜಮ್ಮು-ಕಾಶ್ಮೀರದ ಭೇಟಿ ವೇಳೆ ಝಡ್ ಪ್ಲಸ್ ಭದ್ರತೆ ಪಡೆದಿದ್ದ. ಬುಲೆಟ್ಪ್ರೂಫ್ ಎಸ್ಯುವಿ ಮತ್ತು ಜಮ್ಮು-ಕಾಶ್ಮಿರದ ಫೈವ್ ಸ್ಟಾರ್ ಹೋಟೆಲ್ನಲ್ಲಿ ವಸತಿ ವ್ಯವಸ್ಥೆ ಸಿಕ್ಕಿತ್ತು. ಸರ್ಕಾರದ ಹಣದಲ್ಲಿ ಭರ್ಜರಿ ಎಂಜಾಯ್ ಮಾಡುತ್ತಿದ್ದ!
ಇದನ್ನೂ ಓದಿ: Terror Funding Case: ಜಮ್ಮು-ಕಾಶ್ಮೀರದಲ್ಲಿ ಇಂದು ಬೆಳ್ಳಂಬೆಳಗ್ಗೆ ಕಾರ್ಯಾಚರಣೆಗೆ ಇಳಿದ ಎನ್ಐಎ; ಮುಂದುವರಿದ ಶೋಧ
ಹೀಗೆ ಈತ ಮಾರ್ಚ್ 3ರಂದು ಮೂರನೇ ಬಾರಿಗೆ ಕಾಶ್ಮೀರಕ್ಕೆ ಭೇಟಿ ಕೊಟ್ಟಿದ್ದ. ಈ ವೇಳೆ ಆತ, ‘ದಕ್ಷಿಣ ಕಾಶ್ಮೀರದ ಸೇಬು ತೋಟವನ್ನು ಖರೀದಿಸಲು, ಖರೀದಿದಾರರನ್ನು ಗುರುತಿಸುವ ಸಲುವಾಗಿ ಸರ್ಕಾರ ತನ್ನನ್ನಿಲ್ಲಿ ಕಳಿಸಿದೆ ಎಂದು ಹೇಳಿಕೊಂಡಿದ್ದ. ರಾಷ್ಟ್ರರಾಜಧಾನಿಯ ದೊಡ್ಡದೊಡ್ಡ ರಾಜಕಾರಣಿಗಳ ಹೆಸರು ಇವನ ಬಾಯತುದಿಯಲ್ಲೇ ಇರುತ್ತಿತ್ತು. ಹಾಗಾಗಿ ಕಾಶ್ಮೀರದ ಐಎಎಸ್ ಅಧಿಕಾರಿಗಳು ಕೂಡ ಸಹಜವಾಗಿಯೇ ಭಯದಿಂದ ವರ್ತಿಸುತ್ತಿದ್ದರು. ಆದರೆ ಕಿರಣ್ ಜೆ ಪಟೇಲ್ ಮೇಲೆ ಕಾಶ್ಮೀರದ ಸಿಐಡಿ ತನಿಖಾ ದಳ ಕಣ್ಣಿಟ್ಟಿತ್ತು. ಸಿಐಡಿ ಅಧಿಕಾರಿಗಳು ಪೊಲೀಸರಿಗೆ ಮಾಹಿತಿ ನೀಡಿದ ಬಳಿಕ, ಶ್ರೀನಗರದ ಲಲಿತ್ ಗ್ರ್ಯಾಂಡ್ ಪಂಚತಾರ ಹೋಟೆಲ್ನಿಂದ ಅವನನ್ನು ಬಂಧಿಸಿದ್ದಾರೆ. ಆತನ ವಿರುದ್ಧ ವಂಚನೆ ಮತ್ತು ಫೋರ್ಜರಿ ಕೇಸ್ ದಾಖಲಾಗಿದೆ. ಈಗಾಗಲೇ ಅವನನ್ನು ಶ್ರೀನಗರದ ಕೋರ್ಟ್ಗೆ ಹಾಜರುಪಡಿಸಲಾಗಿದೆ.
ಕಿರಣ್ ಪಟೇಲ್ಗೆ ಟ್ವಿಟರ್ನಲ್ಲಿ ಗುಜರಾತ್ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಪ್ರದೀಪ್ಸಿನ್ಹ್ ವಘೇಲಾ ಸೇರಿ ಹಲವು ಪ್ರಮುಖರು ಫಾಲೋವರ್ಸ್ ಇದ್ದರು. ತಾನು ಕಾಶ್ಮೀರದಲ್ಲಿ, ವಿವಿಧ ಸ್ಥಳಗಳಿಗೆ ಭೇಟಿ ನೀಡಿದ ವಿಡಿಯೊ, ಫೋಟೋಗಳನ್ನು ಟ್ವಿಟರ್ನಲ್ಲಿ ಶೇರ್ ಮಾಡಿಕೊಳ್ಳುತ್ತಿದ್ದ. ಅವನ ಫೋಟೋದಲ್ಲಿ ಭದ್ರತಾ ಸಿಬ್ಬಂದಿ ಇದ್ದೇ ಇರುತ್ತಿದ್ದರು. ಇದೇ ಕಾರಣಕ್ಕೆ ಕಿರಣ್ ಪಟೇಲ್ ಮೇಲೆ ಅನುಮಾನ ಬಂದಿತ್ತು. ಇಷ್ಟೊಂದು ಭದ್ರತೆಯನ್ನು ಪಡೆಯುತ್ತಿರುವ ಇವನ್ಯಾರು ಎಂಬ ಬಗ್ಗೆ ತನಿಖೆ ನಡೆದಿತ್ತು. ಅಂದಹಾಗೇ, ಈ ಪಟೇಲ್, ತಾನು ವರ್ಜೀನಿಯಾದ ಕಾಮನ್ವೆಲ್ತ್ ಯೂನಿವರ್ಸಿಟಿಯಲ್ಲಿ ಪಿಎಚ್ಡಿ ಮಾಡಿದ್ದೇನೆ, ಕಂಪ್ಯೂಟರ್ ಇಂಜಿನಿಯರಿಂಗ್ನಲ್ಲಿ ಬಿಇ, ಕಂಪ್ಯೂಟರ್ ಸೈನ್ಸ್ನಲ್ಲಿ ಎಂ.ಟೆಕ್ ಮಾಡಿದ್ದೇನೆ ಎಂದು ತನ್ನನ್ನು ತಾನು ಪರಿಚಯಿಸಿಕೊಂಡಿದ್ದ.