ನವ ದೆಹಲಿ: ಶಿರೋಮಣಿ ಅಕಾಲಿ ದಳ (ಎಸ್ಎಡಿ)ದ ಸಂಸದೆ ಹರ್ಸಿಮೃತ್ ಕೌರ್ ಬಾದಲ್ ಅವರು ಇಂದು ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ವಿರುದ್ಧ ಲೋಕಸಭೆಯಲ್ಲಿ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಪಂಜಾಬ್ನಲ್ಲಿ ಹೆಚ್ಚಿದ ಮಾದಕ ದ್ರವ್ಯ ಬಳಕೆ ನಿಯಂತ್ರಣಕ್ಕೆ ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ ಎಂಬ ವಿಚಾರಕ್ಕೆ ಅವರು ಮಾನ್ ವಿರುದ್ಧ ಕಿಡಿಕಾರಿದ್ದಾರೆ. ಹರ್ಸಿಮೃತ್ ಕೌರ್ ಬಾದಲ್ ಅವರು ಭಗವಂತ್ ಮಾನ್ಗೆ ಹಿಗ್ಗಾಮುಗ್ಗಾ ಬೈಯ್ಯುತ್ತಿದ್ದರೆ, ಗೃಹ ಸಚಿವ ಅಮಿತ್ ಶಾ, ಲೋಕಸಭೆ ಸ್ಪೀಕರ್ ಓಂ ಬಿರ್ಲಾ ಮತ್ತು ಇತರ ಹಲವು ಸಂಸದರೆಲ್ಲ ನಗುತ್ತಿರುವುದು ಕಂಡುಬಂತು.
ಸಂಸತ್ನಲ್ಲಿ ಮಾತನಾಡಿದ ಸಂಸದೆ ಹರ್ಸಿಮೃತ್ ಕೌರ್ ಬಾದಲ್, ‘ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ಕೆಲವೇ ತಿಂಗಳುಗಳ ಹಿಂದೆ ಇದೇ ಸಂಸತ್ತಿನ ಮೂಲೆಯೊಂದರಲ್ಲಿ ಕುಳಿತುಕೊಳ್ಳುತ್ತಿದ್ದರು. ಬೆಳಗ್ಗೆಯೇ ಅದೇನು ತಿಂದು-ಕುಡಿದು ಬರುತ್ತಿದ್ದರೋ ಗೊತ್ತಿಲ್ಲ. ಸದಾ ಅಮಲೇರಿಸಿಕೊಂಡಿರುತ್ತಿದ್ದರು. ಅವರ ಪಕ್ಕ ಕುಳಿತುಕೊಳ್ಳಲು ಯಾರೂ ಮುಂದೆ ಬರುತ್ತಿರಲಿಲ್ಲ. ಅವರ ಪಕ್ಕ ಕುಳಿತುಕೊಂಡವರೆಲ್ಲ ‘ನಮ್ಮ ಸೀಟ್ ಬದಲಿಸಿಕೊಡಿ’ ಎಂದು ಸ್ಪೀಕರ್ ಬಳಿಯೇ ಕೇಳುತ್ತಿದ್ದರು. ಈ ಹಿಂದಿನ ಸ್ಪೀಕರ್ನ ಕೇಳಿನೋಡಿ, ಅವರ ಬಳಿಯಂತೂ ಅದೆಷ್ಟು ಮಂದಿ ಹೋಗಿ, ಮಾನ್ ಬಗ್ಗೆ ದೂರಿದ್ದಾರೆ ಲೆಕ್ಕವಿಲ್ಲ. ಒಟ್ಟಿನಲ್ಲಿ ಜಾಗ ಬದಲಿಸಿಕೊಂಡು ಹೋಗುತ್ತಿದ್ದರು’ ಎಂದು ಹೇಳಿದರು.
ಅಷ್ಟೇ ಅಲ್ಲ, ‘ಕುಡಿದು ವಾಹನ ಚಲಾಯಿಸಬೇಡಿ’ ಎಂಬ ಬೋರ್ಡ್ನ್ನು ಪಂಜಾಬ್ನ ರಸ್ತೆಗಳ ಪಕ್ಕ ಅನೇಕ ಕಡೆ ಹಾಕಿಡಲಾಗಿದೆ. ಆದರೆ ಈ ಭಗವಂತ್ ಮಾನ್ ಮದ್ಯಪಾನ ಮಾಡಿ ಇಡೀ ರಾಜ್ಯವನ್ನು ಡ್ರೈವ್ ಮಾಡುತ್ತಿದ್ದಾರೆ. ಮಾನ್ ಮುಖ್ಯಮಂತ್ರಿ ಅಭ್ಯರ್ಥಿ ಎಂದು ಘೋಷಣೆ ಮಾಡಿದಾಗ, ಅವರು ಕುಡಿತ ಬಿಡುವುದಾಗಿ ತಾಯಿ ಮೇಲೆ ಆಣೆ ಮಾಡಿದ್ದಾರೆ ಎಂದೆಲ್ಲ ಅರವಿಂದ್ ಕೇಜ್ರಿವಾಲ್ ಹೇಳಿದ್ದಾರೆ. ಅದೇನೋ ಮಹಾನ್ ತ್ಯಾಗ ಎಂಬಂತೆ ಬಿಂಬಿಸಿದ್ದಾರೆ. ಕುಡಿತ ಬಿಡುವುದು ತ್ಯಾಗವೇ’ ಎಂದು ಹರ್ಸಿಮೃತ್ ಕೌರ್ ಪ್ರಶ್ನಿಸಿದರು.
‘ಹಿಂದೊಮ್ಮೆ ಸಂಸತ್ತಿನ ಮೇಲೆ ದಾಳಿಯಾಗಿದ್ದು ಭಗವಂತ್ ಮಾನ್ಗೆ ಗೊತ್ತಿತ್ತು. ಪಾರ್ಲಿಮೆಂಟ್ ಭದ್ರತಾ ನಿಯಮಗಳೂ ಗೊತ್ತಿದೆ. ಹಾಗಿದ್ದಾಗ್ಯೂ 2016ರಲ್ಲಿ ಅವರು ಇಡೀ ಸಂಸತ್ತಿನ ಮೂಲೆಮೂಲೆಯನ್ನು ವಿಡಿಯೊ ಮಾಡಿ ಲೈವ್ಸ್ಟ್ರೀಮ್ನಲ್ಲಿ ತೋರಿಸಿದ್ದರು. ಇಂಥವರನ್ನು ಅದು ಹೇಗೆ ಮುಖ್ಯಮಂತ್ರಿ ಮಾಡಿದರು ಎಂದೇ ಅರ್ಥವಾಗುತ್ತಿಲ್ಲ’ ಎಂದೂ ಕೌರ್ ಹೇಳಿದ್ದಾರೆ. ಹೀಗೆ ಹರ್ಸಿಮೃತ್ ಕೌರ್ ಬಾದಲ್ ಅವರು ನಿರರ್ಗಳವಾಗಿ ಭಗವಂತ್ ಮಾನ್ಗೆ ಬೈಯುತ್ತಿದ್ದರೆ, ಅಮಿತ್ ಶಾ, ಓಂಬಿರ್ಲಾ ಮತ್ತು ಉಳಿದೆಲ್ಲ ಸಂಸದರೂ ಜೋರಾಗಿ ನಗುತ್ತಿದ್ದರು. ಪಂಜಾಬ್ ಸಂಸದರೊಬ್ಬರು ಪ್ರಾರಂಭದಲ್ಲಿ ಕೌರ್ಗೆ ವಿರೋಧ ವ್ಯಕ್ತಪಡಿಸಲು ಮುಂದಾದರೂ, ಬಳಿಕ ಅವರು ಸುಮ್ಮನೇ ಕುಳಿತುಕೊಂಡರು.
ಈ ಹಿಂದೆ ಎಸ್ಎಡಿ ಪಕ್ಷ ಎನ್ಡಿಎ ಒಕ್ಕೂಟದಲ್ಲಿ ಇದ್ದಾಗ ಹರ್ಸಿಮೃತ್ ಕೌರ್ ಬಾದಲ್ ಕೇಂದ್ರದಲ್ಲಿ ಮಂತ್ರಿಯಾಗಿದ್ದರು. ಬಳಿಕ ಕೃಷಿ ಕಾಯ್ದೆ ವಿರೋಧಿಸಿ ಎಸ್ಎಡಿ ಪಕ್ಷ ಬಿಜೆಪಿ ಒಕ್ಕೂಟದಿಂದ ಹೊರಬಿದ್ದಿದೆ. ಇವರು ಭಗವಂತ್ ಮಾನ್ ವಿರುದ್ಧ ಆರೋಪಗಳ ಸುರಿಮಳೆ ಸುರಿಸಿದ್ದು ಇದೇ ಮೊದಲೇನೂ ಅಲ್ಲ. ಹಿಂದೆಯೂ ಹಲವು ಬಾರಿ ಮಾನ್ರನ್ನು ಟೀಕಿಸಿದ್ದರು.
ಇದನ್ನೂ ಓದಿ: ಪಂಜಾಬ್ ಪೊಲೀಸ್ ಠಾಣೆ ಮೇಲೆ ಗ್ರೆನೇಡ್ ದಾಳಿ ಮಾಡಿದ್ದ 6 ಮಂದಿ ಬಂಧನ; ಯೂಟ್ಯೂಬ್ ನೋಡಿ ದಾಳಿ ಮಾಡುವುದನ್ನು ಕಲಿತಿದ್ದರು!