ನವ ದೆಹಲಿ: ರಷ್ಯಾದ ಮಾಸ್ಕೋದಿಂದ ದೆಹಲಿಗೆ ಹೊರಟಿದ್ದ ವಿಮಾನವೊಂದರಲ್ಲಿ ಬಾಂಬ್ ಇದೆ ಎಂದು ದೆಹಲಿ ಅಂತಾರಾಷ್ಟ್ರೀಯ ವಿಮಾಣ ನಿಲ್ದಾಣಕ್ಕೆ ಇ-ಮೇಲ್ ಬಂದಿದ್ದರಿಂದ ಅಲ್ಲೀಗ ಹೆಚ್ಚಿನ ಭದ್ರತೆ ಒದಗಿಸಲಾಗಿದೆ. 386 ಪ್ರಯಾಣಿಕರು, 16 ಸಿಬ್ಬಂದಿ ಇದ್ದ ಎಸ್ಯು 232 ನಂಬರ್ನ ವಿಮಾನದಲ್ಲಿ ಬಾಂಬ್ ಇದೆ ಎಂದು ಹೇಳಲಾಗಿತ್ತು. ಇದು ದೆಹಲಿ ಏರ್ಪೋರ್ಟ್ನಲ್ಲಿ ಶುಕ್ರವಾರ (ಇಂದು) ಮುಂಜಾನೆ 3.20ರ ಹೊತ್ತಿಗೆ ಲ್ಯಾಂಡ್ ಆಗಿದೆ. ಇಡೀ ವಿಮಾನವನ್ನು ಕೂಲಂಕಷವಾಗಿ ಪರಿಶೀಲನೆ ಮಾಡಲಾಗಿದ್ದು, ಬಾಂಬ್ ಕಂಡುಬಂದಿಲ್ಲ. ಈ ಬಗ್ಗೆ ತನಿಖೆ ನಡೆಯುತ್ತಿದೆ.
ಮಾಸ್ಕೋದಿಂದ ಈ ವಿಮಾನ ಹೊರಟ ಬಳಿಕ ಸುಮಾರು ಗುರುವಾರ ತಡರಾತ್ರಿ 1.28ರ ಹೊತ್ತಿಗೆ ದೆಹಲಿ ತುರ್ತು ಪ್ರತಿಕ್ರಿಯಾ ಸೇವೆ (Delhi Emergency response services)ಗೆ ಒಂದು ಇ-ಮೇಲ್ ಬಂದಿತ್ತು. ತತ್ಕ್ಷಣವೇ ಏರ್ಪೋರ್ಟ್ನಲ್ಲಿ ಭದ್ರತಾ ವ್ಯವಸ್ಥೆ ಮಾಡಲಾಗಿತ್ತು. ಬಾಂಬ್ ಸ್ಕ್ವಾಡ್, ಪೊಲೀಸ್ ತಂಡಗಳು ಸಜ್ಜಾಗಿ ನಿಂತಿದ್ದವು. ಹಾಗೇ, 3.20ರ ಹೊತ್ತಿಗೆ ವಿಮಾನ ಲ್ಯಾಂಡ್ ಕೂಡ ಆಯಿತು. ಏನೂ ಅಪಾಯವಾಗದಂತೆ, ಪ್ರಯಾಣಿಕರು ಗಾಬರಿಯಾಗದಂತೆ ಎಲ್ಲ ರೀತಿಯ ವ್ಯವಸ್ಥೆಯನ್ನೂ ಮಾಡಲಾಗಿತ್ತು.
ಪ್ರಯಾಣಿಕರನ್ನು ವಿಮಾನದಿಂದ ಕೆಳಗೆ ಇಳಿಸಿದ ಬಳಿಕ ಇಡೀ ವಿಮಾನ ಜಾಲಾಡಿದರೂ ಯಾವುದೇ ಸ್ಫೋಟಕವೂ ಪತ್ತೆಯಾಗಿಲ್ಲ. ಆದರೂ ಸದ್ಯ ಆ ಏರ್ಕ್ರಾಫ್ಟ್ನ್ನು ಒಂದು ಬದಿಗೆ ಇಡಲಾಗಿದೆ. ಇದೊಂದು ಫೇಕ್ ಬಾಂಬ್ ಬೆದರಿಕೆ ಎಂದು ಮೇಲ್ನೋಟಕ್ಕೆ ಗೊತ್ತಾಗುತ್ತಿದೆ. ಬಾಂಬ್ ಹುಸಿಕರೆಯೇ ಆದರೂ ಇಂದು ಬೆಳಗ್ಗೆ ದೆಹಲಿ ವಿಮಾನ ನಿಲ್ದಾಣದಿಂದ ವಿಮಾನ ಕಾರ್ಯಾಚರಣೆ ಸ್ವಲ್ಪ ವಿಳಂಬವಾಯಿತು ಎಂದೂ ವರದಿಯಾಗಿದೆ.
ಇದನ್ನೂ ಓದಿ: ಯೋಗಿ ಆದಿತ್ಯನಾಥ್‌ಗೆ ಬಾಂಬ್ ಬೆದರಿಕೆ, ಭದ್ರತೆ ಹೆಚ್ಚಳ, ವಾಟ್ಸ್‌ ಆ್ಯಪ್‌ನಲ್ಲಿ ಸಂದೇಶ ಕಳುಹಿಸಿದವನಿಗೆ ಶೋಧ