ಗುವಾಹಟಿ: ಬಾಲಿವುಡ್‌ ನಟ ಶಾರುಖ್‌ ಖಾನ್‌ ಯಾರಿಗೆ ತಾನೆ ಗೊತ್ತಿಲ್ಲ ಹೇಳಿ. ಆದರೆ, ಅಸ್ಸಾಂನ ಮುಖ್ಯಮಂತ್ರಿ ಹಿಮಂತ್‌ ಬಿಸ್ವಾ ಶರ್ಮಾ (Himanta Biswa Sharma) ಅವರಿಗೆ ಶಾರುಖ್‌ ಯಾರು ಎನ್ನುವುದು ನಿಜಕ್ಕೂ ತಿಳಿದಿರಲಿಲ್ಲವಂತೆ. ಈ ಬಗ್ಗೆ ಅವರೇ ಮಾಹಿತಿ ಕೊಟ್ಟಿದ್ದಾರೆ.
ಇದನ್ನೂ ಓದಿ: Pathaan Movie : ಮುಂಗಡ ಟಿಕೆಟ್‌ಗಳ ಮಾರಾಟದಲ್ಲಿ 20 ಕೋಟಿ ರೂ. ದಾಟಿದ ʻಪಠಾಣ್‌ʼ
ಶಾರುಖ್‌ ಅವರ ʼಪಠಾಣ್‌ʼ ಸಿನಿಮಾದ ʼಬೇಷರಮ್‌ ರಂಗ್‌ʼ ಹಾಡಿನಲ್ಲಿ ನಟಿ ದೀಪಿಕಾ ಕೇಸರಿ ಬಣ್ಣದ ಬಿಕಿನಿ ತೊಟ್ಟಿದ್ದರ ಬಗ್ಗೆ ಭಾರೀ ವಿವಾದ ಉಂಟಾಗಿತ್ತು. ಪಠಾಣ್‌ ಸಿನಿಮಾವನ್ನೇ ಬಹಿಷ್ಕರಿಸುವುದಾಗಿ ಕೆಲವು ಸಂಘಟನೆಗಳು ಹೇಳಿದ್ದವು. ಈ ಸಿನಿಮಾ ಜ.25 ರಂದು ತೆರೆ ಕಾಣಲಿದ್ದು, ಅಸ್ಸಾಂನಲ್ಲಿ ಸಿನಿಮಾ ಬಿಡುಗಡೆಗೆ ತೊಂದರೆ ಏನಾದರೂ ಇದೆಯೇ ಎನ್ನುವುದರ ಬಗ್ಗೆ ಚರ್ಚಿಸಲು ಶಾರುಖ್‌ ಅವರು ಅಸ್ಸಾಂನ ಮುಖ್ಯಮಂತ್ರಿ ಹಿಮಂತ್‌ ಬಿಸ್ವಾ ಅವರಿಗೆ ಕರೆ ಮಾಡಿದ್ದಾರೆ.
ಆದರೆ ಹಿಮಂತ್‌ ಅವರಿಗೆ ಶಾರುಖ್‌ ಯಾರು ಎಂದೇ ತಿಳಿದಿರಲಿಲ್ಲವಂತೆ. ಮೊದಲಿಗೆ ಶಾರುಖ್‌ ತಮ್ಮನ್ನು ತಾವು ಪರಿಚಯ ಮಾಡಿಕೊಂಡು ಮೆಸೇಜ್‌ ಮಾಡಿದ್ದಾರೆ. ಕರೆ ಮಾಡುವುದಕ್ಕೆ ಕೇಳಿದ್ದಾರೆ. ಆದರೆ ಆಗ ಮುಖ್ಯಮಂತ್ರಿಗಳು ಕೆಲಸದಲ್ಲಿದ್ದ ಹಿನ್ನೆಲೆ ಮಧ್ಯರಾತ್ರಿ 2 ಗಂಟೆಗೆ ನಟನೊಂದಿಗೆ ಮಾತನಾಡಿರುವುದಾಗಿ ತಿಳಿಸಿದ್ದಾರೆ.
ಇದನ್ನೂ ಓದಿ: SRK and Deepika Movies: ಇಲ್ಲಿವೆ ಶಾರುಖ್‌ ಖಾನ್‌ – ದೀಪಿಕಾ ಜತೆಯಾಗಿ ನಟಿಸಿರುವ ಚಿತ್ರಗಳು ಮತ್ತು ಅವುಗಳ ಬಜೆಟ್
“ನನಗೆ ನನ್ನ ಕಾಲದ ನಟರು ಗೊತ್ತು. ಆದರೆ, ಶಾರುಖ್‌ ಯಾರೆಂದು ತಿಳಿದಿರಲಿಲ್ಲ. ಅವರೇ ಪರಿಚಯ ಮಾಡಿಕೊಂಡು ಮಾತನಾಡಿದರು. ಇಲ್ಲಿ ಸಿನಿಮಾ ಪ್ರದರ್ಶನಕ್ಕೆ ತೊಂದರೆಯಿದೆಯೇ ಎಂದು ಚರ್ಚಿಸಿದರು. ಇಲ್ಲಿನ ಶಾಂತಿ ಸುವ್ಯವಸ್ಥೆ ಕಾಪಾಡಿಕೊಳ್ಳುವ ಜವಾಬ್ದಾರಿ ಪೊಲೀಸ್‌ ಇಲಾಖೆ ಮೇಲಿದೆ. ಹಾಗಾಗಿ ನೀವು ಚಿಂತಿಸದಿರಿ ಎಂದು ನಾನು ಅವರಿಗೆ ತಿಳಿಸಿದ್ದೇನೆ” ಎಂದು ಸಿಎಂ ಹೇಳಿದ್ದಾರೆ.