ಅಹ್ಮದಾಬಾದ್: ಶಾರೂಖ್ಖಾನ್-ದೀಪಿಕಾ ಪಡುಕೋಣೆ ಅಭಿನಯದ ಪಠಾಣ್ ಸಿನಿಮಾ ಇದೇ ತಿಂಗಳು 25ರಂದು ಬಿಡುಗಡೆಯಾಗಲಿದ್ದು, ಟ್ರೇಲರ್ ಜನವರಿ 10ಕ್ಕೆ ರಿಲೀಸ್ ಆಗಲಿದೆ ಎಂದು ಹೇಳಲಾಗಿದೆ. ಆದರೆ ಈ ಸಿನಿಮಾ ಈಗಾಗಲೇ ‘ಕೇಸರಿ ವಿವಾದ’ ಸೃಷ್ಟಿಸಿದ್ದು ಅಸಂಖ್ಯಾತ ಹಿಂದುಗಳ ಕೆಂಗಣ್ಣಿಗೆ ಗುರಿಯಾಗಿದೆ. ಪಠಾಣ್ ಸಿನಿಮಾದಲ್ಲಿರುವ ಬೇಷರಮ್ ರಂಗ್ (ನಾಚಿಕೆಯಿಲ್ಲದ ಬಣ್ಣ) ಹಾಡಿನಲ್ಲಿ ದೀಪಿಕಾ ಪಡುಕೋಣೆ ಕೇಸರಿ ಬಣ್ಣದ ಬಿಕಿನಿ ಧರಿಸಿದ್ದೇ ಹಿಂದುಗಳ ಆಕ್ರೋಶಕ್ಕೆ ಕಾರಣವಾಗಿದೆ. ಅನೇಕ ಹಿಂದು ಪರ ಸಂಘಟನೆಗಳು ಈಗಾಗಲೇ ಪಠಾಣ್ ವಿರುದ್ಧ ತಿರುಗಿಬಿದ್ದಿವೆ.
ಈ ಮಧ್ಯೆ ಗುಜರಾತ್ನ ಅಹ್ಮದಾಬಾದ್ನ ಅಲ್ಫಾವನ್ ಮಾಲ್ನಲ್ಲಿ ಪಠಾಣ್ ಸಿನಿಮಾ ಪ್ರಮೋಶನ್ ನಿಮಿತ್ತ ಪೋಸ್ಟರ್ ಹಾಕಿದ್ದಕ್ಕೆ ಕ್ರೋಧಗೊಂಡ ಹಿಂದು ಸಂಘಟನೆ ಬಜರಂಗ ದಳದ ಕಾರ್ಯಕರ್ತರು ಅಲ್ಲಿಗೆ ನುಗ್ಗಿ ದಾಂಧಲೆ ಸೃಷ್ಟಿಸಿದ್ದಾರೆ. ಕೇಸರಿ ಶಾಲು ಹೊದ್ದು, ಗದೆಯನ್ನು ಹಿಡಿದು, ಜೈಶ್ರೀರಾಮ್ ಎಂದು ಕೂಗುತ್ತ ಮಾಲ್ಗೆ ದಾಂಗುಡಿ ಇಟ್ಟ ಬಜರಂಗ ದಳ ಸಂಘಟನೆ ಕಾರ್ಯಕರ್ತರು ಅಲ್ಲಿನ ಪೋಸ್ಟರ್ಗಳನ್ನೆಲ್ಲ ಹರಿದುಹಾಕಿದ್ದಾರೆ. ಆ ಪೋಸ್ಟರ್ಗಳನ್ನು ಕೆಡವಿ, ಅದನ್ನು ತುಳಿದು ತಮ್ಮ ಆಕ್ರೋಶ ತೋರಿಸಿದ್ದಾರೆ. ಅಷ್ಟೇ ಅಲ್ಲ, ಆ ಮಳಿಗೆಯಲ್ಲಿ ಇದ್ದ ಇನ್ನೂ ಹಲವು ವಸ್ತುಗಳನ್ನು ಧ್ವಂಸ ಮಾಡಿದ್ದಾರೆ. ಮಾಲ್ನೊಳಗೆ ಸಿಕ್ಕಸಿಕ್ಕಲ್ಲಿ ದಾಳಿ ನಡೆಸಿದ್ದಾರೆ. ಜನವರಿ 25ರಂದು ಯಾವ ಕಾರಣಕ್ಕೂ ಸಿನಿಮಾ ಬಿಡುಗಡೆ ಮಾಡುವಂತಿಲ್ಲ ಎಂದು ಖಡಕ್ ಎಚ್ಚರಿಕೆ ನೀಡಿದ್ದಾರೆ.
ಈ ಮಾಲ್ ಥಿಯೇಟರ್ನಲ್ಲೂ ಸಿನಿಮಾ ಬಿಡುಗಡೆಗೆ ಸಿದ್ಧತೆ ನಡೆದಿತ್ತು. ಅದೇ ಕಾರಣಕ್ಕೆ ಪೋಸ್ಟರ್ಗಳನ್ನು ಹಾಕಿ ಪ್ರಮೋಶನ್ ಮಾಡಲಾಗಿತ್ತು. ಆ ವಿಚಾರ ತಿಳಿದ ಹಿಂದು ಸಂಘಟನೆ ಕಾರ್ಯಕರ್ತರು ಅಲ್ಲಿಗೆ ಆಗಮಿಸಿ ದಾಂಧಲೆ ಸೃಷ್ಟಿಸಿದ್ದಾರೆ. ಗುಜರಾತ್ನ ಬಜರಂಗ ದಳ ಟ್ವಿಟರ್ ಅಕೌಂಟ್ನಲ್ಲಿ ವಿಡಿಯೊ ಶೇರ್ ಮಾಡಲಾಗಿದೆ.
ಶಾರುಖ್ ಖಾನ್-ಜಾನ್ ಅಬ್ರಾಹಂ ಮತ್ತು ದೀಪಿಕಾ ಪಡುಕೋಣೆ ಅಭಿನಯಿಸಿರವ ಈ ಸಿನಿಮಾದ ‘ಬೇಷರಮ್ ರಂಗ್’ ಹಾಡು ಡಿಸೆಂಬರ್ನಲ್ಲಿ ಬಿಡುಗಡೆಯಾದ ಬೆನ್ನಲ್ಲೇ ವಿವಾದವೂ ಭುಗಿಲೆದ್ದಿದೆ. ರಾಷ್ಟ್ರಾದ್ಯಂತ ಅನೇಕಾನೇಕ ಹಿಂದೂ ಕಾರ್ಯಕರ್ತರು, ಬಲಪಂಥೀಯರು, ವಿವಿಧ ರಾಜಕಾರಣಿಗಳು ಸಿನಿಮಾ ಬಹಿಷ್ಕಾರಕ್ಕೆ ಕರೆ ನೀಡಿದ್ದಾರೆ. ಈ ಮಧ್ಯೆ ಚಲನಚಿತ್ರದಲ್ಲಿ ವಿವಾದಾತ್ಮಕ ಹಾಡು ಮತ್ತು ದೃಶ್ಯಗಳನ್ನು ಕಟ್ ಮಾಡುವಂತೆ ಕೇಂದ್ರ ಚಲನಚಿತ್ರ ಸೆನ್ಸಾರ್ ಮಂಡಳಿ ಸೂಚಿಸಿದೆ.
ಇದನ್ನೂ ಓದಿ: Pathaan Film | ವಿವಾದಿತ ಪಠಾಣ್ ಸಿನಿಮಾ ಟ್ರೇಲರ್ ಬಿಡುಗಡೆ ದಿನಾಂಕ ಪ್ರಕಟ; ಚಿತ್ರ ರಿಲೀಸ್ ಯಾವಾಗ?