ನವ ದೆಹಲಿ: ಬಾಂಬ್ ಬೆದರಿಕೆಯೊಡ್ಡಿ, ಸ್ಪೈಸ್ ಜೆಟ್ ವಿಮಾನ ಹಾರಾಟಕ್ಕೆ ಅಡ್ಡಿ ಉಂಟು ಮಾಡಿದ ಬ್ರಿಟಿಷ್ ಏರ್ವೇಸ್ನ ತರಬೇತಿ ನಿರತ ಟಿಕೆಟ್ ಏಜೆಂಟ್ನನ್ನು ದೆಹಲಿ ಪೊಲೀಸರು ಬಂಧಿಸಿದ್ದಾರೆ. ಬಂಧಿತನ ಹೆಸರು ಅಭಿನವ್ ಪ್ರಕಾಶ್ ಎಂದಾಗಿದ್ದು, ಈತನಿಗೆ 24ವರ್ಷ ಎನ್ನಲಾಗಿದೆ.
ಈ ಸ್ಪೈಸ್ಜೆಟ್ ವಿಮಾನ ಇಂದು ಸಂಜೆ 6.30ರ ಹೊತ್ತಿಗೆ ದೆಹಲಿ ಅಂತಾರಾಷ್ಟ್ರೀಯ ವಿಮಾನದಿಂದ ಟೇಕ್ ಆಫ್ ಆಗಿ ಪುಣೆಗೆ ಹೋಗಬೇಕಿತ್ತು. ಆದರೆ ಅದಕ್ಕೂ ಮೊದಲು ಅಪರಿಚಿತ ಕರೆಯೊಂದು ಬಂದಿತ್ತು. ವಿಮಾನದಲ್ಲಿ ಬಾಂಬ್ ಇದೆ ಎಂದು ಕರೆ ಮಾಡಿದವ ಹೇಳಿದ್ದ. ವಿಮಾನ ಸಿಬ್ಬಂದಿ, ಪ್ರಯಾಣಿಕರನ್ನೆಲ್ಲ ಸುರಕ್ಷಿತವಾಗಿ ಇಳಿಸಿ, ಇಡೀ ವಿಮಾನವನ್ನು ಜಾಲಾಡಲಾಗಿತ್ತು. ಬಾಂಬ್ ಸ್ಕ್ವಾಡ್ನವರು ಅಲ್ಲಿಗೆ ಆಗಮಿಸಿದ್ದರು. ಆದರೆ ಅದರಲ್ಲೇನೂ ಅನುಮಾನಾಸ್ಪದ ವಸ್ತುಗಳು ಕಂಡುಬಂದಿರಲಿಲ್ಲ. ನಂತರ ಇದೊಂದು ಹುಸಿ ಬಾಂಬ್ ಕರೆ ಎಂದು ಪರಿಗಣನೆ ಮಾಡಲಾಗಿತ್ತು.
ಕರೆ ಮಾಡಿದವನನ್ನು ಪತ್ತೆ ಮಾಡಲು ಹೊರಟ ಪೊಲೀಸರು, ಆ ಕರೆ ಟ್ರೇಸ್ ಮಾಡಿದಾಗ ಸಿಕ್ಕಿಬಿದ್ದವನು ಅಭಿನವ್ ಪ್ರಕಾಶ್. ಬ್ರಿಟಿಷ್ ಏರ್ವೇಸ್ನ ಕೌಂಟರ್ನಲ್ಲಿ ತರಬೇತಿ ನಿರತ ಏಜೆಂಟ್ ಆಗಿರುವ ಈತ ಹುಸಿ ಬಾಂಬ್ ಕರೆ ಮಾಡಲು ಕಾರಣವೇನು ಎಂದು ಕೇಳಿದ್ದಕ್ಕೆ ವಿಚಿತ್ರ ಉತ್ತರ ಕೊಟ್ಟಿದ್ದಾನೆ. ‘ನನಗೆ ಕುನಾಲ್ ಸೆಹ್ರಾವತ್ ಮತ್ತು ರಾಕೇಶ್ ಎಂಬ ಇಬ್ಬರು ಬಾಲ್ಯ ಸ್ನೇಹಿತರು ಇಬ್ಬರು ಇದ್ದಾರೆ. ಅವರಿಬ್ಬರೂ ಇತ್ತೀಚೆಗೆ ಮನಾಲಿಗೆ ಭೇಟಿ ಕೊಟ್ಟಿದ್ದಾಗ ಇಬ್ಬರು ಹುಡುಗಿಯರನ್ನು ಭೇಟಿಯಾದರು. ಅವರ ನಡುವೆ ಪ್ರೀತಿಯಾಗಿದೆ. ಅವರೆಲ್ಲ ದೆಹಲಿಗೆ ಬಂದಿದ್ದಾರೆ. ನನ್ನ ಸ್ನೇಹಿತರಿಗೆ ಆ ಹುಡುಗಿಯರ ಜತೆ ಇನ್ನಷ್ಟು ಹೆಚ್ಚಿನ ಸಮಯ ಕಳೆಯುವ ಬಯಕೆ. ಆದರೆ ಅವರಿಬ್ಬರೂ ಇಂದು ಸ್ಪೈಸ್ಜೆಟ್ ವಿಮಾನದಲ್ಲಿ ಪುಣೆಗೆ ಹೊರಟಿದ್ದರು. ಅವರನ್ನು ಹೇಗಾದರೂ ತಡೆಯಬೇಕು ಎಂದು ನನ್ನ ಸ್ನೇಹಿತರು ನನ್ನ ಬಳಿ ಹೇಳಿದರು. ಹೀಗಾಗಿ ಮೂವರೂ ಸೇರಿ ಬಾಂಬ್ ಪ್ಲ್ಯಾನ್ ಮಾಡಿದೆವು. ಯುವತಿಯರು ಹೋಗಬೇಕಿದ್ದ ವಿಮಾನ ಕ್ಯಾನ್ಸಲ್ ಮಾಡುವುದು ಉದ್ದೇಶವಾಗಿತ್ತು’ ಎಂದು ಹೇಳಿದ್ದಾನೆ.
ಇದನ್ನೂ ಓದಿ: Air India | ಅಮೆರಿಕ-ಬೆಂಗಳೂರು ನಡುವೆ ಡಿಸೆಂಬರ್‌ 2ರಿಂದ ಏರ್ ಇಂಡಿಯಾ ನಾನ್‌ಸ್ಟಾಪ್‌ ಹಾರಾಟ