ಹೈದರಾಬಾದ್: ಗೃಹ ಸಚಿವ ಅಮಿತ್ ಶಾ ಇಂದು ‘ಹೈದರಾಬಾದ್ ಲಿಬರೇಶನ್ ಡೇ (ಹೈದರಾಬಾದ್ ವಿಮೋಚನಾ ದಿನ) ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಧ್ವಜಾರೋಹಣ ಮಾಡಿದರು. ಆದರೆ ಈ ವೇಳೆ ಅಮಿತ್ ಶಾ ಭದ್ರತೆಯಲ್ಲಿ ಲೋಪವಾಗಿದೆ. ಟಿಆರ್ಎಸ್ (ತೆಲಂಗಾಣ ರಾಷ್ಟ್ರ ಸಮಿತಿ) ನಾಯಕ ಗೋಸುಲಾ ಶ್ರೀನಿವಾಸ್ ಅವರು ತಮ್ಮ ಕಾರನ್ನು ಗೃಹ ಸಚಿವ ಅಮಿತ್ ಶಾ ಬೆಂಗಾವಲು ವಾಹನದ ಎದುರಿಗೆ ತಂದು ನಿಲ್ಲಿಸಿದ್ದರು. ಅವರನ್ನು ಸೆಕ್ಯೂರಿಟಿ ಸಿಬ್ಬಂದಿ ಬಲವಂತವಾಗಿ ಅಲ್ಲಿಂದ ಕಳಿಸಿದ್ದಾರೆ. ಈ ವೇಳೆ ಶ್ರೀನಿವಾಸ್ ಕಾರಿಗೆ ಹಾನಿಯೂ ಉಂಟಾಗಿದೆ.
ಹರಿತಾ ಪ್ಲಾಜಾ ಹೋಟೆಲ್ ಬಳಿ ಟಿಆರ್ಎಸ್ ನಾಯಕರ ಶ್ರೀನಿವಾಸ್ ಅವರು ಬಳಿ ಅಮಿತ್ ಶಾ ಅವರ ಬೆಂಗಾವಲು ವಾಹನಗಳಿಗೆ ಅಡ್ಡವಾಗಿ ತಂದು ತಮ್ಮ ಕೆಂಪನೆಯ ಕಾರನ್ನು ನಿಲ್ಲಿಸಿದರು. ಆಗ ಸಚಿವರ ಭದ್ರತಾ ಸಿಬ್ಬಂದಿ ಅದನ್ನು ಕೂಡಲೇ ತೆಗೆಯುವಂತೆ ಶ್ರೀನಿವಾಸ್ಗೆ ಹೇಳಿದ್ದಾರೆ. ಆದರೆ ಅವರು ಮೊಂಡಾಟ ಮಾಡಿದರು. ಕಾರನ್ನು ತೆಗೆಯಲಿಲ್ಲ. ಆಗ ಭದ್ರತಾ ಸಿಬ್ಬಂದಿ ಬಲವಂತವಾಗಿಯೇ ಕಾರನ್ನು ಅಲ್ಲಿಂದ ಆಚೆಗೆ ಕಳಿಸಿದ್ದಾರೆ. ಅವರ ಕಾರಿನ ಹಿಂಭಾಗದ ಗಾಜು ಸಂಪೂರ್ಣವಾಗಿ ಒಡೆದು ಹೋಗಿದೆ.
ಆದರೆ ಶ್ರೀನಿವಾಸ್ ಇದನ್ನು ನಾನು ಬೇಕಂತ ಮಾಡಿಲ್ಲ ಎಂದು ಹೇಳಿದ್ದಾರೆ. ‘ನಾನು ಕಾರು ಚಲಾಯಿಸಿಕೊಂಡು ಹೋಗುತ್ತಿದ್ದೆ. ಅಲ್ಲಿ ಅಮಿತ್ ಶಾ ಅವರ ಬೆಂಗಾವಲು ವಾಹನಗಳೂ ಬರುತ್ತಿದ್ದವು. ಸಡನ್ ಆಗಿ ನನ್ನ ಕಾರು ನಿಲ್ಲಿಸಿದೆ. ನನಗೆ ಆಗಲೇ ಟೆನ್ಷನ್ ಆಗಿತ್ತು. ಅಷ್ಟರಲ್ಲಿ ಪೊಲೀಸರು, ಭದ್ರತಾ ಸಿಬ್ಬಂದಿ ಬಂದು ಕಾರು ತೆಗೆಯುವಂತೆ ಹೇಳಿದರು. ಹೋಗುತ್ತೇನೆ..ಬಿಡಿ ಎಂದು ಹೇಳುತ್ತಿದ್ದರೂ ಕೇಳಲಿಲ್ಲ, ಅಷ್ಟರಲ್ಲಿಯೇ ನನ್ನ ಕಾರನ್ನು ಧ್ವಂಸ ಮಾಡಿದ್ದಾರೆ. ವೃಥಾ ಸ್ಥಳದಲ್ಲಿ ಉದ್ವಿಗ್ನತೆ ಸೃಷ್ಟಿಸಿದ್ದಾರೆ’ ಎಂದಿದ್ದಾರೆ.
ಗೃಹ ಸಚಿವ ಅಮಿತ್ ಶಾ ಇತ್ತೀಚೆಗೆ ಮುಂಬೈಗೆ ಭೇಟಿಕೊಟ್ಟಿದ್ದಾಗಲೂ ಅವರ ಭದ್ರತೆಯಲ್ಲಿ ಲೋಪವಾಗಿತ್ತು. ಏಕನಾಥ ಶಿಂಧೆ ಮತ್ತು ದೇವೇಂದ್ರ ಫಡ್ನವೀಸ್ರನ್ನು ಅವರು ಭೇಟಿಯಾದ ವೇಳೆ ಹೇಮಂತ್ ಪವಾರ್ ಎಂಬಾತ ತಾನೂ ಒಬ್ಬ ಭದ್ರತಾ ಸಿಬ್ಬಂದಿ ಎಂದು ಬಿಂಬಿಸಿಕೊಂಡು ಅಮಿತ್ ಶಾ ಸುತ್ತಮುತ್ತ ತಿರುಗುತ್ತಿದ್ದ. ಬಳಿಕ ಆತನನ್ನು ಬಂಧಿಸಲಾಗಿತ್ತು.
ಇದನ್ನೂ ಓದಿ: Cloth Politics | ಅಮಿತ್ ಶಾ ಮಫ್ಲರ್‌ ಬೆಲೆ 80 ಸಾವಿರ ರೂ., ಬಿಜೆಪಿ ಟಿ ಶರ್ಟ್‌ ಏಟಿಗೆ ಕಾಂಗ್ರೆಸ್‌ ಎದುರೇಟು!