ಲಾಸ್ ಏಂಜಲೀಸ್, ಅಮೆರಿಕ: ಭಾರತೀಯ ಸಿನಿಮಾ ಕ್ಷೇತ್ರಕ್ಕೆ ಆಸ್ಕರ್ 2023 (Oscars 2023)ನಿಜಕ್ಕೂ ವಿಶೇಷ ಕ್ಷಣವಾಗಿದೆ. ಕಾರ್ತಿಕಿ ಗೊನ್ಸಾಲ್ವೆಸ್ ನಿರ್ದೇಶನದ ‘ದಿ ಎಲಿಫೆಂಟ್ ವಿಸ್ಪರರ್ಸ್’ (Elephant Whisperers) ಡಾಕ್ಯುಮೆಂಟರಿ ‘ಆಸ್ಕರ್ನ ಅತ್ಯುತ್ತಮ ಕಿರುಚಿತ್ರ’ವಾಗಿ ಹೊರಹೊಮ್ಮಿದ್ದರೆ, ರಾಜಮೌಳಿ ನಿರ್ದೇಶನದ ಆರ್ಆರ್ಆರ್ ಸಿನಿಮಾದ ಹಾಡು ‘ನಾಟು..ನಾಟು..’ ಬೆಸ್ಟ್ ಒರಿಜಿನಲ್ ಕೆಟೆಗರಿಯಲ್ಲಿ ಆಸ್ಕರ್ ಮುಡಿಗೇರಿಸಿಕೊಂಡಿದೆ. ಭಾರತದ ಸಿನಿಪ್ರಿಯರಲ್ಲಿ ಇದು ದೊಡ್ಡಮಟ್ಟಿಗಿನ ಸಂಭ್ರಮಕ್ಕೆ ಕಾರಣವಾಗಿದೆ.
ಹೀಗೆ ಪ್ರತಿಷ್ಠಿತ ಆಸ್ಕರ್ ಗೆಲ್ಲುತ್ತಿದ್ದಂತೆ ‘ದಿ ಎಲಿಫೆಂಟ್ ವಿಸ್ಪರರ್ಸ್’ ಡಾಕ್ಯುಮೆಂಟರಿಯ ಸಹ ನಿರ್ಮಾಪಕಿ ಗುನೀತ್ ಮೋಂಗಾ ಸೋಷಿಯಲ್ ಮೀಡಿಯಾದಲ್ಲಿ ತಮ್ಮ ಸಂತೋಷವನ್ನು ವ್ಯಕ್ತಪಡಿಸಿದ್ದಾರೆ. ‘ಈ ಸಾಧನೆ ನನ್ನಲ್ಲಿ ನಿಜಕ್ಕೂ ಹರ್ಷ ತಂದಿದೆ. ನಾನಿನ್ನೂ ನಡುಗುತ್ತಿದ್ದೇನೆ’ ಎಂದು ತಮ್ಮಲ್ಲಾಗುತ್ತಿರುವ ಉದ್ವೇಗವನ್ನು ಅವರು ಹೊರಹಾಕಿದ್ದಾರೆ. ‘ನಾವು ನಮ್ಮ ಮೊದಲ ಆಸ್ಕರ್ ಗೆದ್ದಿದ್ದೇವೆ. ಇಬ್ಬರು ಮಹಿಳೆಯರು ಅದನ್ನು ಸಾಧಿಸಿದ್ದಾರೆ. ನಾನಿನ್ನೂ ನಡುಗುತ್ತಿದ್ದೇನೆ’ ಎಂದು ಹೇಳಿಕೊಂಡಿದ್ದಾರೆ.
ಹಾಗೇ, ಇನ್ಸ್ಟಾಗ್ರಾಂನಲ್ಲಿ ಫೋಟೋ ಶೇರ್ ಮಾಡಿಕೊಂಡ ನಿರ್ಮಾಪಕಿ ಗುನೀತ್ ಮೋಂಗಾ, ‘ಆಸ್ಕರ್ ಗೆದ್ದ ಭಾರತದ ಮೊದಲ ಕಿರುಚಿತ್ರ ಎಂಬ ಐತಿಹಾಸಿಕ ಕ್ಷಣಕ್ಕೆ ಈ ರಾತ್ರಿ ಸಾಕ್ಷಿಯಾಯಿತು. ಈ ಕೀರ್ತಿಯನ್ನು ತಂದಿದ್ದು ಭಾರತದ ಇಬ್ಬರು ಮಹಿಳೆಯರು’ ಎಂದು ಹೇಳಿದರು. ಹಾಗೇ, ತಮ್ಮ ತಾಯಿ-ತಂದೆಗೆ, ಅವರ ಸಹ ನಿರ್ಮಾಪಕರಾದ ಅಚಿನ್ ಜೈನ್ರಿಗೆ, ಪತಿಗೆ ಮತ್ತು ಇಡೀ ತಂಡ, ನೆಟ್ಫ್ಲಿಕ್ಸ್ಗೆ ಕೃತಜ್ಞತೆ ಸಲ್ಲಿಸಿದರು. ಹಾಗೇ, ಕಥೆಯನ್ನು ಹೆಣೆದು, ಅದಕ್ಕೊಂದು ರೂಪಕೊಟ್ಟ ನಿರ್ದೇಶಕಿ ಕಾರ್ತೀಕಿ ಅವರಿಗೆ, ಕಿರುಚಿತ್ರ ನೋಡಿದ, ನೋಡುತ್ತಿರುವ ಎಲ್ಲ ಮಹಿಳೆಯರಿಗೆ ವಿಶೇಷ ಧನ್ಯವಾದ ಎಂದೂ ಬರೆದುಕೊಂಡಿದ್ದಾರೆ. ಕೊನೇದಾಗಿ ಜೈ ಹಿಂದ್ ಎಂದೂ ಬರೆದಿದ್ದಾರೆ.
ಅಂದಹಾಗೇ, ದಿ ಎಲಿಫೆಂಟ್ ವಿಸ್ಪರರ್ಸ್ 41 ನಿಮಿಷಗಳ ಕಿರುಚಿತ್ರವಾಗಿದ್ದು, ನೆಟ್ಫ್ಲಿಕ್ಸ್ನಲ್ಲಿ ಲಭ್ಯವಿದೆ. ಒಂದು ಅನಾಥ ಆನೆಮರಿಯನ್ನು, ದಂಪತಿ ಆರೈಕೆ ಮಾಡಿ, ಅದನ್ನು ಕಾಳಜಿ ಮಾಡುವ ಕಥೆಯನ್ನು ಇದು ಒಳಗೊಂಡಿದೆ. ಅದರಲ್ಲಿ ದಂಪತಿ ಮತ್ತು ಅನಾಥ ಆನೆ ನಡುವಿನ ಬಾಂಧವ್ಯ ನೋಡುಗರ ಹೃದಯಸ್ಪರ್ಶಿಸುತ್ತದೆ.