ನವ ದೆಹಲಿ: 102ನೇ ವರ್ಷದ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿರುವ ನಿವೃತ್ತ ಸ್ಕ್ವಾಡ್ರನ್ ಲೀಡರ್ ದಲೀಪ್ ಸಿಂಗ್ ಮಜಿತಿಯಾ ಅವರಿಗೆ ಭಾರತೀಯ ವಾಯು ಸೇನೆ ಮುಖ್ಯಸ್ಥ, ಏರ್ ಚೀಫ್ ಮಾರ್ಷಲ್ ವಿ.ಆರ್. ಚೌಧರಿ ಮತ್ತು ಇಡೀ ವಾಯುಪಡೆಯ ಎಲ್ಲ ಸಿಬ್ಬಂದಿ ಶುಭಾಶಯ ಕೋರಿದ್ದಾರೆ. ದಲೀಪ್ ಸಿಂಗ್ ಅವರು ಕೇಕ್ ಕತ್ತರಿಸುತ್ತಿರುವ ಮತ್ತು ವಾಯುಪಡೆಯ ಮೂವರು ಸಿಬ್ಬಂದಿ ಅವರ ಸುತ್ತ ನಿಂತು ಹಾರೈಸುತ್ತಿರುವ ಫೋಟೋವೊಂದನ್ನು ಕೂಡ ಭಾರತೀಯ ವಾಯು ಸೇನೆ ಟ್ವಿಟರ್ನಲ್ಲಿ ಶೇರ್ ಮಾಡಿಕೊಂಡಿದೆ.
ದಲೀಪ್ ಸಿಂಗ್ ಮಜಿಥಿಯಾ ಅವರು ಭಾರತದ ಅತ್ಯಂತ ಹಳೇ ಫೈಟರ್ ಪೈಲಟ್ ಎಂದೇ ಖ್ಯಾತರಾಗಿದ್ದಾರೆ. ಇವರು ಸ್ವಾತಂತ್ರ್ಯ ಪೂರ್ವದಲ್ಲಿ ವಾಯುಸೇನೆಯಲ್ಲಿ ಇದ್ದವರು. 1940ರಲ್ಲಿ ತಮ್ಮ 20ನೇ ವರ್ಷದಲ್ಲಿದ್ದಾಗ ಮೊಟ್ಟ ಮೊದಲಿಗೆ ಟೈಗರ್ ಮಾಥ್ ತರಬೇತಿ ಏರ್ಕ್ರಾಫ್ಟ್ನ್ನು ಲಾಹೋರ್ನ ವಾಲ್ಟನ್ ಏರ್ಫೀಲ್ಡ್ನಿಂದ ಏಕಾಂಗಿಯಾಗಿ ಹಾರಿಸಿದ್ದರು. ಆಗ ಅವರಿಗೆ ಇಬ್ಬರು ಬ್ರಿಟಿಷ್ ಅಧಿಕಾರಿಗಳು ಮಾರ್ಗದರ್ಶನ ಮಾಡಿದ್ದರು. ಬಳಿಕ 1947ರ ಆಗಸ್ಟ್ನಲ್ಲಿ ನಿವೃತ್ತರಾಗಿದ್ದಾರೆ.
ತಮ್ಮ 100ನೇ ವರ್ಷದ ಹುಟ್ಟುಹಬ್ಬದ ವೇಳೆಯಲ್ಲಿ ಮಾತನಾಡಿದ್ದ ದಲೀಪ್ ಸಿಂಗ್ ಮಜಿಥಿಯಾ, ‘ನನ್ನನ್ನು ಈಗಲೂ ವಾಯುಪಡೆಯ ಅಧಿಕಾರಿಗಳು, ಸಿಬ್ಬಂದಿ ಭೇಟಿ ಮಾಡುತ್ತಾರೆ. ಆಗೆಲ್ಲ ನಾನೂ ಸಹ ಇನ್ನೂ ಭಾರತೀಯ ವಾಯುಪಡೆಯಲ್ಲೇ ಇದ್ದೇನೆ ಎಂಬ ಭಾವ ಮೂಡುತ್ತದೆ. ನನ್ನ ಬ್ಯಾಚ್ನವರು ಈಗ ಯಾರೂ ಬದುಕಿಲ್ಲ. ಅವರೆಲ್ಲ ಇದ್ದಾಗ ತುಂಬ ಚೆನ್ನಾಗಿತ್ತು. ಪ್ರತಿವರ್ಷವೂ ಆಗಸ್ಟ್ 1ರಂದು ನಾವೆಲ್ಲ ಭೇಟಿಯಾಗಿ ಖುಷಿಯಾಗಿ ಕಾಲ ಕಳೆಯುತ್ತಿದ್ದೆವು. ಕಷ್ಟ-ಸುಖ ಹಂಚಿಕೊಳ್ಳುತ್ತಿದ್ದೆವು’ ಎಂದು ಹೇಳಿದ್ದರು.
ದಲೀಪ್ ಸಿಂಗ್ ತಮ್ಮ ವೃತ್ತಿ ಜೀವನದಲ್ಲಿ ಹಲವು ಸಾಧನೆ ಮಾಡಿದ್ದಾರೆ. ಇವರ ವೃತ್ತಿಜೀವನ ನಂಬಿಕೆ, ಧೈರ್ಯ ಮತ್ತು ಸಾಹಸದಿಂದ ಕೂಡಿತ್ತು ಎಂದು ಏರೋಸ್ಪೇಸ್ ಇತಿಹಾಸಕಾರರು ಹೇಳುತ್ತಾರೆ. ಎರಡನೇ ಮಹಾಯುದ್ಧದ ಸಂದರ್ಭದಲ್ಲಿ ಹಾಕರ್ ಹರಿಕೇನ್ ಯುದ್ಧವಿಮಾನವನ್ನು ಹಾರಿಸಿದ್ದರು. ಅದಾದ ದಶಕಗಳ ಕಾಲ ನೇಪಾಳದ ಖಾಟ್ಮಂಡು ಕಣಿವೆಯಲ್ಲಿ ವಿಮಾನವನ್ನು ಲ್ಯಾಂಡ್ ಮಾಡಿದ ಮೊದಲಿಗ ಎಂಬ ಹೆಗ್ಗಳಿಕೆಗೂ ಪಾತ್ರರಾದರು. 1979ರಲ್ಲಿ ಕೊನೇ ಬಾರಿಗೆ ಏರ್ಕ್ರಾಫ್ಟ್ ಹಾರಿಸಿದ್ದಾರೆ.
ಇದನ್ನೂ ಓದಿ: ಬೀದರ್‌ ಏರ್‌ಬೇಸ್‌ನಲ್ಲಿ ಒಟ್ಟಿಗೇ ಯುದ್ಧ ವಿಮಾನ ಹಾರಿಸಿದ ಅಪ್ಪ-ಮಗಳು; ಏರ್‌ಫೋರ್ಸ್‌ನಲ್ಲಿ ಅಪೂರ್ವ ದಾಖಲೆ!