ಇಂದೋರ್: ಪಾಕಿಸ್ತಾನ, ಚೀನಾದಲ್ಲಿ ಉಗ್ರ ತರಬೇತಿ ಪಡೆದ ಅತ್ಯಂತ ಅಪಾಯಕಾರಿ ವ್ಯಕ್ತಿ(Dangerous Man) ಯೊಬ್ಬ ಮುಂಬಯಿಗೆ ಆಗಮಿಸಲಿರುವ ಬಗ್ಗೆ ಮಾಹಿತಿ ಸಿಕ್ಕಿದೆ. ಈ ಬಗ್ಗೆ ಅಲರ್ಟ್ ಆಗಿರಿ ಎಂದು ಮುಂಬಯಿ ಪೊಲೀಸ್ ಮತ್ತು ಇತರ ರಕ್ಷಣಾ ಏಜೆನ್ಸಿಗಳಿಗೆ ಎನ್ಐಎ (ರಾಷ್ಟ್ರೀಯ ತನಿಖಾ ದಳ) ಅಧಿಕಾರಿಗಳು ಇಮೇಲ್ ಮೂಲಕ ಸೂಚನೆ ನೀಡಿದ್ದರು. ಆತನ ಹೆಸರು ಸರ್ಫರಾಜ್ ಮೆಮನ್ ಎಂದೂ ತಿಳಿಸಿದ್ದರು. ಇದೀಗ ಇಂದೋರ್ ಪೊಲೀಸರು ಆ ಅಪಾಯಕಾರಿ ಮನುಷ್ಯನನ್ನು ಬಂಧಿಸಿದ್ದಾರೆ. ಬಂಧಿತ ಸರ್ಫ್ರಾಜ್ ಮೆಮನ್ ಸದ್ಯ ಚಂದನ್ ನಗರ ಪೊಲೀಸ್ ಠಾಣೆಯಲ್ಲಿ ಇದ್ದು, ಆತನನ್ನು ವಿಚಾರಣೆ ಮಾಡಲಾಗುತ್ತಿದೆ.
ದೇಶ ವಿರೋಧಿ ಕೃತ್ಯ, ಭಯೋತ್ಪಾದಕ ಚಟುವಟಿಕೆಗಳ ತರಬೇತಿಯನ್ನು ಪಾಕಿಸ್ತಾನ, ಚೀನಾ, ಹಾಂಗ್ಕಾಂಗ್ಗಳಲ್ಲಿ ಪಡೆದ ಸರ್ಫರಾಜ್ ಮೆಮನ್ ಮೂಲತಃ ಇಂದೋರ್ನವನು ಎಂದು ಎನ್ಐಎ ಅಧಿಕಾರಿಗಳು ಮುಂಬಯಿ ಪೊಲೀಸರಿಗೆ ಕಳಿಸಿದ್ದ ಇಮೇಲ್ನಲ್ಲಿ ತಿಳಿಸಿದ್ದರು. ಜತೆಗೆ ಆತನ ಆಧಾರ್ಕಾರ್ಡ್, ಡ್ರೈವಿಂಗ್ ಲೈಸೆನ್ಸ್, ಪಾಸ್ಪೋರ್ಟ್ ಕಾಪಿಗಳನ್ನೂ ಕಳಿಸಿದ್ದರು. ಮುಂಬಯಿ ಪೊಲೀಸರು, ಇಂದೋರ್ ಪೊಲೀಸರಿಗೂ ಈ ಬಗ್ಗೆ ಮಾಹಿತಿ ನೀಡಿ, ಅವರೂ ಅಲರ್ಟ್ ಆಗಿದ್ದರು. ಇದೀಗ ಮಧ್ಯಪ್ರದೇಶಕ್ಕೆ ಆಗಮಿಸಿದ ಸರ್ಫರಾಜ್ ಮೆಮನ್ನನ್ನು ಇಂದೋರ್ ಪೊಲೀಸರು ಅರೆಸ್ಟ್ ಮಾಡಿದ್ದು, ವಿಚಾರಣೆ ನಡೆಯುತ್ತಿದೆ.
ಇದನ್ನೂ ಓದಿ: Terror Politics : ಉಗ್ರರಿಗೆ ಬೆಂಬಲ ನೀಡುವ ಕಾಂಗ್ರೆಸ್ಸೇ ಒಂದು ಭಯೋತ್ಪಾದಕ ಸಂಘಟನೆ ಎಂದ ನಳಿನ್‌ ಕುಮಾರ್‌ ಕಟೀಲ್‌
ಇನ್ನು ವಿಚಾರಣೆ ವೇಳೆ ಆತ ತಾನು 12ವರ್ಷಗಳಿಂದ ಹಾಂಗ್ಕಾಂಗ್ನಲ್ಲಿ ಇರುವುದಾಗಿ ಹೇಳಿಕೊಂಡಿದ್ದಾನೆ ಎಂದು ಮೂಲಗಳಿಂದ ಮಾಹಿತಿ ಲಭ್ಯವಾಗಿದೆ. ಮಹಾರಾಷ್ಟ್ರ ಉಗ್ರ ನಿಗ್ರಹ ದಳವೂ ಕೂಡ ಆತನನ್ನು ಒಂದು ಸುತ್ತಿನ ವಿಚಾರಣೆ ನಡೆಸಿದೆ. ಇದುವರೆಗಿನ ವಿಚಾರಣೆಯಲ್ಲಿ ಸರ್ಫ್ರಾಜ್ ಮೆಮನ್ಗೆ ಭಯೋತ್ಪಾದಕ ಲಿಂಕ್ ಇರುವುದು ಪತ್ತೆಯಾಗಿಲ್ಲ. ಆದರೆ ಇಲ್ಲಿಗೇ ತನಿಖೆ ಬಿಡುವುದಿಲ್ಲ ಎಂದು ತನಿಖಾ ದಳ ಹೇಳಿದ್ದಾಗಿ ವರದಿಯಾಗಿದೆ.