ನಟಿ ರಶ್ಮಿಕಾ ಮಂದಣ್ಣ ಇನ್ಸ್ಟಾಗ್ರಾಂನಲ್ಲಿ ಸುಮಾರು 3 ಕೋಟಿ ಫಾಲೋವರ್ಸ್ ಹೊಂದಿದ್ದಾರೆ. ಕನ್ನಡ ಸಿನಿಮಾದಿಂದ ಹೊರಟು ಸದ್ಯ ಬಾಲಿವುಡ್ವರೆಗೂ ಖ್ಯಾತಿ ಗಳಿಸಿಕೊಂಡಿರುವ ರಶ್ಮಿಕಾ, ಇನ್ಸ್ಟಾಗ್ರಾಂನಲ್ಲಿ ಸಕ್ರಿಯರೂ ಹೌದು. ಸದಾ ಒಂದಿಲ್ಲೊಂದು ಫೋಟೋ-ವಿಡಿಯೊಗಳನ್ನು ಪೋಸ್ಟ್ ಮಾಡುತ್ತಿರುತ್ತಾರೆ. ಅದರಲ್ಲೂ ಅಲ್ಲು ಅರ್ಜುನ್ ಜತೆ ‘ಪುಷ್ಪಾ‘ ಸಿನಿಮಾದಲ್ಲಿ ನಟಿಸಿದ ಮೇಲಂತೂ ಅವರ ಖ್ಯಾತಿ ಇನ್ನಷ್ಟು ಉತ್ತುಂಗಕ್ಕೆ ಏರಿದೆ. ಫಾಲೋವರ್ಸ್ ಸಂಖ್ಯೆಯೂ ಹೆಚ್ಚಿತ್ತು. ಹೀಗಿರುವಾಗ ಅವರ ಇನ್ಸ್ಟಾಗ್ರಾಂ ಅಕೌಂಟ್ನಲ್ಲಿ ಒಂದು ಬದಲಾವಣೆಯಾಗಿದ್ದು, ನೆಟ್ಟಿಗರನ್ನು ಕನ್ಫ್ಯೂಸ್ ಮಾಡಿದೆ. ನಟಿಯ ಇನ್ಸ್ಟಾ ಅಕೌಂಟ್ ಹ್ಯಾಕ್ ಆಯಿತಾ ಎಂಬ ಚರ್ಚೆಯೂ ಪ್ರಾರಂಭವಾಗಿ, ಕೊನೆಗೆ ಉತ್ತರವೂ ಸಿಕ್ಕಿದೆ.
ರಶ್ಮಿಕಾ ಮಂದಣ್ಣ ಅವರ ಇನ್ಸ್ಟಾಗ್ರಾಂನಲ್ಲಿ ಅವರ ಹೆಸರು ಉಲ್ಟಾ ಆಗಿದೆ. ಮುಖ್ಯ ಹೆಸರು ಸರಿಯಿದ್ದರೂ, ಬಯೋದಲ್ಲಿ ಬರೆಯಲಾಗಿದ್ದ ಹೆಸರು ಉಲ್ಟಾ ಆಗಿದೆ. ಅಂದರೆ annadnaM akimhsaR ಎಂದಾಗಿದೆ. ಅದನ್ನು ನೋಡುತ್ತಿದ್ದಂತೆ ಫಾಲೋವರ್ಸ್ ಫುಲ್ ಗೊಂದಲಕ್ಕೀಡಾಗಿದ್ದರು. ಇದೇನು ರಶ್ಮಿಕಾ ತಮ್ಮ ಹೆಸರನ್ನು ಹೀಗೆ ಬರೆದುಕೊಂಡಿದ್ದಾರೆ? ಅವರ ಅಕೌಂಟ್ ಏನಾದ್ರೂ ಹ್ಯಾಕ್ ಆಯಿತಾ? ಎಂದು ಚರ್ಚೆ ಶುರುವಾಗಿತ್ತು.
ಅಷ್ಟರಲ್ಲಿ ರಶ್ಮಿಕಾ ಮಂದಣ್ಣ ಈಗ ಸ್ಪಷ್ಟನೆ ಕೊಟ್ಟಿದ್ದಾರೆ. ತಮ್ಮ ಬಯೋದಲ್ಲಿರುವ ಉಲ್ಟಾ ಹೆಸರಿನ ಸ್ಕ್ರೀನ್ಶಾಟ್ ತೆಗೆದು ಇನ್ಸ್ಟಾ ಸ್ಟೋರಿಯಲ್ಲಿ ಹಾಕಿಕೊಂಡಿರುವ ರಶ್ಮಿಕಾ ಮಂದಣ್ಣ, ತಾವು ಪ್ಲಮ್ ಕಂಪನಿ ಪ್ರಾರಂಭಿಸಿರುವ ಬ್ಲ್ಯಾಕ್ಬೋರ್ಡ್ ಪ್ರಾಜೆಕ್ಟ್ ಅಭಿಯಾನದಲ್ಲಿ ಕೈಜೋಡಿಸಿರುವುದಾಗಿ ಹೇಳಿಕೊಂಡಿದ್ದಾರೆ. ಅಂದಹಾಗೇ ಹೆಣ್ಣುಮಕ್ಕಳ ಶಿಕ್ಷಣದ ಬಗ್ಗೆ ಜಾಗೃತಿ ಮೂಡಿಸುವ ಸಲುವಾಗಿ ಪ್ಲಮ್ ಈ ಅಭಿಯಾನ ಹಮ್ಮಿಕೊಂಡಿದ್ದು, ನಟಿ ರಶ್ಮಿಕಾ ಕೂಡ ಪಾಲ್ಗೊಂಡಿದ್ದಾರೆ. ಉಲ್ಟಾ ಹೆಸರು ಬರೆದಿದ್ದಕ್ಕೆ ಸ್ಪಷ್ಟನೆ ನೀಡಿದ ರಶ್ಮಿಕಾ, ‘ಓದಲು ಬಾರದ ಪುಟ್ಟ ಹೆಣ್ಣುಮಕ್ಕಳಿಗೆ ಅಕ್ಷರಗಳನ್ನು ನೋಡಿದಾಗ ಹೀಗೇ ಕಾಣುತ್ತದೆ’ ಎಂದು ಬರೆದುಕೊಂಡಿದ್ದಾರೆ. ಹಾಗೇ,‘ಪ್ಲಮ್ನ ಅಭಿಯಾನ ಇದನ್ನೆಲ್ಲ ಬದಲಾಯಿಸುವ ಯೋಜನೆ ಒಳಗೊಂಡಿದೆ’ ಎಂದು ಹೇಳಿದ್ದಾರೆ.
ನಟಿ ರಶ್ಮಿಕಾ ಅವರು ಒಂದಲ್ಲ ಒಂದು ವಿಷಯಕ್ಕೆ ಇತ್ತೀಚೆಗೆ ಸುದ್ದಿಯಲ್ಲಿರುತ್ತಾರೆ. ಅದರಲ್ಲೂ ಅವರು ಟ್ರೋಲ್ ಆಗುವುದೇ ಹೆಚ್ಚು. ಇತ್ತೀಚೆಗೆ ‘ಕಾಂತಾರ’ ಸಿನಿಮಾ ವಿಚಾರದಲ್ಲಿ ವಿವಾದ ಮೈಮೇಲೆ ಎಳೆದುಕೊಂಡಿದ್ದರು. ಕಾಂತಾರ ಬಿಡುಗಡೆಯಾದಾಗ ಮುಂಬಯಿಯಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ್ದ ರಶ್ಮಿಕಾ ಮಂದಣ್ಣ ನಾನಿನ್ನೂ ಸಿನಿಮಾ ನೋಡಿಲ್ಲ, ಬೆಂಗಳೂರಿಗೆ ಹೋಗಿ ಸಿನಿಮಾ ನೋಡುತ್ತೇನೆ ಎಂದು ಹೇಳಿದ್ದರು. ಆಗ ನೆಟ್ಟಿಗರು ಅವರ ವಿರುದ್ಧ ಟೀಕೆಗಳ ಸುರಿಮಳೆಯನ್ನೇ ಸುರಿಸಿದ್ದರು. ರಿಷಬ್ ಅವರ ಕಿರಿಕ್ ಪಾರ್ಟಿ ಮೂಲಕವೇ ಸಿನಿಮಾ ಕ್ಷೇತ್ರಕ್ಕೆ ಬಂದ ರಶ್ಮಿಕಾ, ಕಾಂತಾರವನ್ನೇ ನೋಡಿಲ್ಲ ಎಂದು ಅನೇಕರು ಆಕೆಯ ವಿರುದ್ಧ ಟೀಕೆ-ವ್ಯಂಗ್ಯ ಮಾಡಿದ್ದರು. ಬಳಿಕ ಇತ್ತೀಚೆಗೆ ಸಿನಿಮಾ ನೋಡಿದ ರಶ್ಮಿಕಾ ಮಂದಣ್ಣ, ‘ಆಗ ಸಿನಿಮಾ ಬಿಡುಗಡೆಯಾದ 2-3 ದಿನಕ್ಕೆಲ್ಲ ನನ್ನ ಬಳಿ ಪ್ರತಿಕ್ರಿಯೆ ಕೇಳಿದ್ದರು. ನಾನು ನೋಡಿರಲಿಲ್ಲ. ಈಗ ನೋಡಿದ್ದೇನೆ ಮತ್ತು ಸಿನಿಮಾ ತಂಡಕ್ಕೆ ನನ್ನ ಸಂದೇಶ ಕಳಿಸಿದ್ದೇನೆ’ ಎಂದು ಹೇಳಿದ್ದರು.
ಇದನ್ನೂ ಓದಿ: Rashmika Mandanna |ನನ್ನ ವೈಯಕ್ತಿಕ ವಿಚಾರಗಳು ಪ್ರಪಂಚಕ್ಕೆ ಬೇಕಾಗಿಲ್ಲ: ಬ್ಯಾನ್‌ ಬಗ್ಗೆ ರಶ್ಮಿಕಾ ಮಂದಣ್ಣ ರಿಯಾಕ್ಷನ್‌!