ಒಡಿಶಾದ ಬಲಂಗೀರ್ ಜಿಲ್ಲೆಯ ಸರ್ಕಾರಿ ಹೈಸ್ಕೂಲ್ವೊಂದರಲ್ಲಿ ನಡೆಯುತ್ತಿದ್ದ ವಾರ್ಷಿಕ ಕ್ರೀಡಾಕೂಟದಲ್ಲಿ ವಿದ್ಯಾರ್ಥಿಯೊಬ್ಬ ಎಸೆದ ಜಾವೆಲಿನ್ (ಈಟಿ) ಇನ್ನೊಬ್ಬ ವಿದ್ಯಾರ್ಥಿಯ ಕತ್ತಿಗೆ ಚುಚ್ಚಿ, ಆತ ಗಂಭೀರವಾಗಿ ಗಾಯಗೊಂಡಿದ್ದಾನೆ. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಜೀವಕ್ಕೇನೂ ಅಪಾಯ ಇಲ್ಲ ಎಂದು ವೈದ್ಯರು ತಿಳಿಸಿದ್ದಾರೆ.
ಈ ಘಟನೆ ನಡೆದಿದ್ದು ಅಗಲ್ಪುರ್ ಗಂಡುಮಕ್ಕಳ ಪಂಚಾಯತ್ ಹೈಸ್ಕೂಲ್ನಲ್ಲಿ. ಡಿಸೆಂಬರ್ 17ರಂದು ಕ್ರೀಡಾಕೂಟ ನಡೆಯುತ್ತಿತ್ತು. ಬೆಳಗ್ಗೆಯಿಂದಲೂ ಶಾಲಾ ಮೈದಾನದಲ್ಲಿ ಮಕ್ಕಳ ಕಲರವ, ವಿವಿಧ ಆಟಗಳು ಶುರುವಾಗಿದ್ದವು. ಒಂದೆಡೆ ಕ್ರೀಡೆ ನಡೆಯುತ್ತಿದ್ದರೆ, ಇನ್ನೊಂದೆಡೆ ಕೆಲವು ಮಕ್ಕಳು ತಾವು ಮುಂದೆ ಭಾಗವಹಿಸಬೇಕಾದ ಆಟಗಳ ಅಭ್ಯಾಸ ಮಾಡಿಕೊಳ್ಳುತ್ತಿದ್ದರು. ಅದರಲ್ಲಿ ಒಬ್ಬ ಹುಡುಗ ಜಾವೆಲಿನ್ ಥ್ರೋ ಪ್ರ್ಯಾಕ್ಟೀಸ್ ಮಾಡುತ್ತಿದ್ದ. ಆತ ಎಸೆದ ಜಾವೆಲಿನ್ ಹಾರಿ ಬಂದು ಅಲ್ಲೇ ಸ್ವಲ್ಪ ದೂರದಲ್ಲಿ ನಿಂತಿದ್ದ 9ನೇ ಕ್ಲಾಸ್ ಹುಡುಗ ಸದಾನಂದ್ ಮೆಹೆರ್ ಎಂಬಾತ ಕುತ್ತಿಗೆಯ ಬಲಭಾಗಕ್ಕೆ ಚುಚ್ಚಿ, ಎಡಭಾಗದಿಂದ ಹೊರಬಿದ್ದಿದೆ.
ಬಾಲಕನನ್ನು ಕೂಡಲೇ ಬಲಂಗೀರ್ನ ಭಿಬಾ ಭೋಯ್ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆತನನ್ನು ಐಸಿಯುದಲ್ಲಿಟ್ಟು ಚಿಕಿತ್ಸೆ ನೀಡಲಾಗುತ್ತಿದೆ. ಹಾಗೇ ಬಾಲಕನ ಚಿಕಿತ್ಸೆಗೆ ಜಿಲ್ಲಾಡಳಿತದಿಂದ 30 ಸಾವಿರ ರೂಪಾಯಿ ನೆರವು ನೀಡಲಾಗಿದೆ. ವಿದ್ಯಾರ್ಥಿಗೆ ಉತ್ತಮ ಚಿಕಿತ್ಸೆ ಕೊಡಿಸುವಂತೆ ಒಡಿಶಾ ಸಿಎಂ ನವೀನ್ ಪಟ್ನಾಯಕ್ ಅವರು ಜಿಲ್ಲಾಡಳಿತಕ್ಕೆ ಸೂಚಿಸಿದ್ದು, ಎಷ್ಟೇ ಖರ್ಚಾದರೂ ಅದನ್ನು ಮುಖ್ಯಮಂತ್ರಿ ಪರಿಹಾರ ನಿಧಿಯಿಂದ ಒದಗಿಸಲಾಗುವುದು ಎಂದೂ ಹೇಳಿದ್ದಾರೆ. ಇತ್ತ ಶಾಲೆಯಲ್ಲಿ ಕ್ರೀಡಾಕೂಟ ರದ್ದುಗೊಂಡಿದೆ.
ಇದನ್ನೂ ಓದಿ: Stray Dogs Attack | ಬೀದಿ ನಾಯಿಗಳ ದಾಳಿಗೆ ನಾಲ್ಕೂವರೆ ವರ್ಷದ ಬಾಲಕ ಬಲಿ