ಅಮೃತ್ಸರ್: ಪೊಲೀಸರ ಕಣ್ಣಿಗೆ ಮಣ್ಣೆರಚಿ ಪರಾರಿಯಾಗಿರುವ ಖಲಿಸ್ತಾನಿ ನಾಯಕ, ವಾರಿಸ್ ಪಂಜಾಬ್ ದೆ ಸಂಘಟನೆ ಮುಖ್ಯಸ್ಥ ಅಮೃತ್ಪಾಲ್ ಸಿಂಗ್ (Amritpal Singh)ನ ಪತ್ನಿ ಕಿರೆಣ್ದೀಪ್ ಕೌರ್ಳನ್ನು ಪಂಜಾಬ್ ಪೊಲೀಸರು ಇಂದು ಅಮೃತ್ಸರ್ನ ಶ್ರೀ ಗುರುರಾಮ್ ದಾಸ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬಂಧಿಸಿದ್ದಾರೆ. ಆಕೆ ಲಂಡನ್ಗೆ ಹೋಗಲು ವಿಮಾನವೇರುವ ಸಿದ್ಧತೆಯೊಂದಿಗೆ ಅಲ್ಲಿಗೆ ಬಂದಿದ್ದಳು. ಈ ವೇಳೆ ಪೊಲೀಸರಿಂದ ಬಂಧಿಸಲ್ಪಟ್ಟಿದ್ದಾಳೆ. ಮಾರ್ಚ್ 18ರಂದು ಅಮೃತ್ಪಾಲ್ ಸಿಂಗ್ನನ್ನು ಪಂಜಾಬ್ನ ನಾಕೋಡರ್ ಬಳಿ ಬಂಧಿಸಲು ಪೊಲೀಸರು ಬಲೆಬೀಸಿದ್ದರು. ಆದರೆ ಅಂದು ಕ್ಷಣದಲ್ಲಿ ಆತ ತಪ್ಪಿಸಿಕೊಂಡು ಪರಾರಿಯಾಗಿದ್ದಾನೆ. ಇದುವರೆಗೂ ಅವನ ಜಾಡು ಸಿಕ್ಕಿಲ್ಲ. ಅಂದಿನಿಂದ ಇಂದಿನವರೆಗೆ ಪಂಜಾಬ್ ಪೊಲೀಸರು ಅಮೃತ್ಪಾಲ್ ಸಿಂಗ್ನ ಹಲವು ಸಹಚರರು, ವಾರಿಸ್ ಪಂಜಾಬ್ ದೆ ಸಂಘಟನೆಯ ಅನೇಕ ಸದಸ್ಯರನ್ನು ಅರೆಸ್ಟ್ ಮಾಡಿ ವಿಚಾರಣೆ ನಡೆಸುತ್ತಿದ್ದಾರೆ.
ಅಮೃತ್ಪಾಲ್ ಸಿಂಗ್ ನಾಪತ್ತೆಯಾದ ಬಳಿಕ ಪಂಜಾಬ್ ಪೊಲೀಸರು ಆತನ ಪತ್ನಿ ಕಿರೆಣ್ದೀಪ್ ಕೌರ್ಳನ್ನು ಕೂಡ ವಿಚಾರಣೆಗೆ ಒಳಪಡಿಸಿದ್ದರು. ಆಕೆ ಮೇಲೆ ಪೊಲೀಸ್ ಕಣ್ಗಾವಲು ಇತ್ತು. ವಾರಿಸ್ ಪಂಜಾಬ್ ದೆ ಸಂಘಟನೆಗಾಗಿ ವಿದೇಶಿ ದೇಣಿಗೆ ಸಂಗ್ರಹ ಮಾಡಿದ ಆರೋಪ ಕೂಡ ಕಿರೆಣ್ದೀಪ್ ವಿರುದ್ಧ ಕೇಳಿಬಂದಿದೆ. ಈ ಕಿರೆಣ್ದೀಪ್ ಪಂಜಾಬ್ನಲ್ಲೇ ಹುಟ್ಟಿದ್ದರೂ, ಬೆಳೆದಿದ್ದೆಲ್ಲ ಲಂಡನ್ನಲ್ಲಿ. ಆಕೆಗೆ ಅಲ್ಲಿನ ನಾಗರಿಕತ್ವವೇ ಇದೆ. ಇದೇ ವರ್ಷ ಫೆಬ್ರವರಿಯಲ್ಲಿ ಅಮೃತ್ಪಾಲ್ ಸಿಂಗ್ನನ್ನು ಮದುವೆಯಾಗಿ, ಮತ್ತೆ ಭಾರತಕ್ಕೆ ಬಂದಿದ್ದಳು. ಇನ್ನು ಅಮೃತ್ಪಾಲ್ ಸಿಂಗ್ ಕೂಡ ಲಂಡನ್ಗೆ ಹೋಗುವ ಪ್ಲ್ಯಾನ್ನಲ್ಲಿ ಇದ್ದ. ಈಗಾಗಲೇ ಯುಕೆ ಪೌರತ್ವಕ್ಕಾಗಿ ಅವನು ಅರ್ಜಿ ಕೂಡ ಸಲ್ಲಿಸಿದ್ದಾನೆ ಎನ್ನಲಾಗಿದೆ.
ಇದನ್ನೂ ಓದಿ: Amritpal Singh: ಪೊಲೀಸರಿಗೆ ನಾನು ಶರಣಾಗಲ್ಲ; ಯುಟ್ಯೂಬ್‌ ಲೈವ್‌ನಲ್ಲಿ ಅಮೃತ್ ಪಾಲ್ ಸಿಂಗ್ ಹೇಳಿಕೆ
ಲಂಡನ್ನಲ್ಲಿ ಸಕ್ರಿಯವಾಗಿರುವ ಖಲಿಸ್ತಾನಿ ಉಗ್ರರ ಗುಂಪು ಬಬ್ಬರ್ ಖಲ್ಸಾ ಇಂಟರ್ನ್ಯಾಶನಲ್ನೊಂದಿಗೆ ಕಿರೆಣ್ದೀಪ್ ಸಂಪರ್ಕ ಇದೆ ಎಂಬ ಗುಮಾನಿಯೂ ಇದೆಯಾದರೂ ಈ ಬಗ್ಗೆ ಪಂಜಾಬ್ ಪೊಲೀಸರ ಬಳಿ ಯಾವುದೇ ನಿಖರ ಪುರಾವೆಗಳಿಲ್ಲ. ಸದ್ಯಕ್ಕಂತೂ ನಾಪತ್ತೆಯಾದ ಅಮೃತ್ಪಾಲ್ ಸಿಂಗ್ ಬಗ್ಗೆ ವಿಚಾರಣೆಗೆ ಒಳಪಡಿಸಲೆಂದೇ ಆಕೆಯನ್ನು ಬಂಧಿಸಲಾಗಿದೆ ಎಂದು ವರದಿಯಾಗಿದೆ. ಅಮೃತ್ಪಾಲ್ ಸಿಂಗ್ ಪಂಜಾಬ್ನಿಂದ ನಾಪತ್ತೆಯಾದವನು ಎಲ್ಲಿಗೆ ಹೋಗಿದ್ದಾನೆ ಎಂಬ ಬಗ್ಗೆಯೂ ಮಾಹಿತಿ ಸಿಕ್ಕಿಲ್ಲ. ಅವನು ನೇಪಾಳಕ್ಕೆ ಹೋಗಿರುವ ಸಾಧ್ಯತೆ ಇದೆ ಎಂದು ಹೇಳಲಾಗಿತ್ತಾದರೂ, ಅಲ್ಲಿಯೂ ಇಲ್ಲ ಎಂದು ನೇಪಾಳ ಸರ್ಕಾರ ಇತ್ತೀಚೆಗಷ್ಟೇ ತಿಳಿಸಿದೆ.