ಲಖಿಂಪುರ ಖೇರಿ: ಉತ್ತರ ಪ್ರದೇಶದ ಲಖಿಂಪುರ ಖೇರಿಯಲ್ಲಿ ಹತ್ಯೆಯಾದ ದಲಿತ ಸಹೋದರಿಯ ಪೋಸ್ಟ್ ಮಾರ್ಟಮ್ ವರದಿ ಹೊರಬಿದ್ದಿದೆ. ಇವರಿಬ್ಬರ ಮೇಲೆ ಅತ್ಯಾಚಾರವಾಗಿದ್ದು ಶವಪರೀಕ್ಷೆಯಲ್ಲಿ ದೃಢಪಟ್ಟಿದೆ. ಈಗಾಗಲೇ ಬಂಧಿತರಾಗಿರುವ ಆರೋಪಿಗಳಾದ ಚೋಟು, ಜುನೈದ್, ಸೊಹೈಲ್, ಹಫೀಜುಲ್, ಕರಿಮುದ್ದೀನ್ ಮತ್ತು ಆರಿಫ್ ತಾವು ರೇಪ್ ಮಾಡಿದ್ದಾಗಿ ಪೊಲೀಸರ ಎದುರು ಒಪ್ಪಿಕೊಂಡಿದ್ದಾರೆ ಮತ್ತು ತಾವೇನೆಲ್ಲ ಮಾಡಿದೆವು ಎಂಬುದನ್ನೂ ವಿವರಿಸಿದ್ದಾರೆ. ಆರು ಮಂದಿ ಆರೋಪಿಗಳು ನೀಡಿದ ವಿವರಣೆಯನ್ನು ಪೊಲೀಸರು ಮಾಧ್ಯಮಗಳ ಎದುರು ಬಿಚ್ಚಿಟ್ಟಿದ್ದಾರೆ.
‘ಇಬ್ಬರು ಹುಡುಗಿಯರೂ ಅಕ್ಕ-ತಂಗಿಯರು. ಇವರ ಮೃತದೇಹ ಕಬ್ಬಿನ ಗದ್ದೆ ಸಮೀಪ ಮರವೊಂದಕ್ಕೆ ನೇಣುಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗುತ್ತಿದ್ದಂತೆ, ಅವರ ತಾಯಿ ತನ್ನ ಮಕ್ಕಳನ್ನು ಮೇಲ್ಜಾತಿಯವರು ಕಿಡ್ನ್ಯಾಪ್ ಮಾಡಿ, ನಂತರ ಅತ್ಯಾಚಾರ ಮಾಡಿ ಹತ್ಯೆ ಮಾಡಿದ್ದಾರೆ ಎಂದು ಆರೋಪಿಸಿದ್ದರು. ಆದರೆ ವಾಸ್ತವದಲ್ಲಿ ಬಾಲಕಿಯರನ್ನು ಆರೋಪಿಗಳು ಕಿಡ್ನ್ಯಾಪ್ ಮಾಡಿರಲಿಲ್ಲ. ಜುನೈದ್ ಮತ್ತು ಸೊಹೈಲ್ ಜತೆ ಈ ಹುಡುಗಿಯರಿಗೆ ಸ್ನೇಹವಿತ್ತು. ಇವರಿಬ್ಬರೂ ಸೇರಿ ಪುಸಲಾಯಿಸಿ ಬಾಲಕಿಯರನ್ನು ಹೊಲಕ್ಕೆ ಕರೆಸಿಕೊಂಡಿದ್ದರು. ಅಲ್ಲಿಯೇ ಇವರ ಮೇಲೆ ರೇಪ್ ಮಾಡಿದ್ದಾರೆ. ಆಗ ಹುಡುಗಿಯರು ತಮ್ಮನ್ನು ಮದುವೆಯಾಗುವಂತೆ ಅವರಿಬ್ಬರನ್ನು ಒತ್ತಾಯಿಸಿದ್ದಾರೆ. ಇದರಿಂದ ಕುಪಿತಗೊಂಡ ಜುನೈದ್ ಮತ್ತು ಸೊಹೈಲ್ ಸೇರಿ ಬಾಲಕಿಯರನ್ನು ಹತ್ಯೆ ಮಾಡಿದ್ದಾರೆ. ಅಷ್ಟಾದ ಮೇಲೆ ಭಯಗೊಂಡು ‘ನಾವು ಈ ಅಪರಾಧ ಮಾಡಿಬಿಟ್ಟಿದ್ದೇವೆ. ಹೇಗಾದರೂ ಬಚಾವ್ ಆಗಬೇಕು, ಏನಾದರೂ ಮಾಡಿ’ ಎಂದು ಹಫೀಜುಲ್, ಕರಿಮುದ್ದೀನ್ ಮತ್ತು ಆರಿಫ್ಗೆ ಕರೆ ಮಾಡಿದ್ದಾರೆ. ಅವರೂ ಸ್ಥಳಕ್ಕೆ ಬಂದ ಬಳಿಕ ಎಲ್ಲರೂ ಸೇರಿ ಹುಡುಗಿಯರನ್ನು ಮರಕ್ಕೆ ನೇತು ಹಾಕಿದ್ದಾರೆ’ ಎಂದು ಪೊಲೀಸರು ಘಟನೆಯನ್ನು ವಿವರಿಸಿದ್ದಾರೆ.
ಇನ್ನು ಚೋಟು ಆ ಸ್ಥಳದಲ್ಲಿ ಇರಲೇ ಇಲ್ಲ. ಜುನೈದ್ ಮತ್ತು ಸೊಹೈಲ್ ಹುಡುಗಿಯರನ್ನು ಅತ್ಯಾಚಾರ ಮಾಡಿದಾಗಲೂ ಅವನು ಇರಲಿಲ್ಲ, ಅವರನ್ನು ಹತ್ಯೆ ಮಾಡಿ ಮರಕ್ಕೆ ನೇಣು ಹಾಕುವಾಗಲೂ ಆತ ಸ್ಥಳದಲ್ಲಿ ಇರಲಿಲ್ಲ. ಆದರೆ ಜುನೈದ್ ಮತ್ತು ಸೊಹೈಲ್ನನ್ನು ಹುಡುಗಿಯರಿಗೆ ಪರಿಚಯಿಸಿದ್ದೇ ಅವನು. ಇವರ ಸ್ನೇಹ ಬೆಳೆಯಲು ಕಾರಣನೇ ಚೋಟು ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ. ಅಂದಹಾಗೇ, ಇಲ್ಲಿ ಚೋಟುವನ್ನು ಹೊರತುಪಡಿಸಿ ಉಳಿದೆಲ್ಲರೂ ಲಲಿತ್ಪುರ ನಿವಾಸಿಗಳೇ ಆಗಿದ್ದಾರೆ.
ಮೃತರು ಅಪ್ರಾಪ್ತೆಯರು
ಇದೀಗ ರೇಪ್ಗೆ ಒಳಗಾಗಿ ಹತ್ಯೆಗೀಡಾದ ಹುಡುಗಿಯರಲ್ಲಿ ಒಬ್ಬಳು 10ನೇ ತರಗತಿ. ಇನ್ನೊಬ್ಬಾಕೆ 7ನೇ ಕ್ಲಾಸ್. ಘಟನೆ ನಡೆಯುತ್ತಿದ್ದಂತೆ ತಾಯಿಯ ರೋದನ ಮುಗಿಲುಮುಟ್ಟಿತ್ತು. ನನ್ನ ಮಕ್ಕಳನ್ನು ಮೂವರು ಬಂದು ಬೈಕ್ನಲ್ಲಿ ಅಪಹರಿಸಿಕೊಂಡು ಕರೆದುಕೊಂಡು ಹೋಗಿದ್ದಾರೆ, ಅವರನ್ನು ಬಿಡಬೇಡಿ ಎಂದು ಅವರು ಆಕ್ರೋಶ ಭರಿತರಾಗಿ ಕೂಗುತ್ತಿದ್ದರು. ಇನ್ನು ವೈದ್ಯರು ಮೃತ ಹುಡುಗಿಯರ ಶವಪರೀಕ್ಷೆಯ ವಿಡಿಯೋ ಕೂಡ ಮಾಡಿದ್ದಾರೆ. ಬಾಲಕಿಯರಿಬ್ಬರ ಮೇಲೆಯೂ ರೇಪ್ ಆಗಿದೆ. ಅವರನ್ನು ಮೊದಲು ಉಸಿರುಗಟ್ಟಿಸಿ ಕೊಂದು ನಂತರ ಮರಕ್ಕೆ ನೇತು ಹಾಕಲಾಗಿದೆ ಎಂದು ಸ್ಪಷ್ಟವರದಿ ಬಂದಿದೆ.
ಇದನ್ನೂ ಓದಿ :ಲಖಿಂಪುರ ಕೇರಿಯಲ್ಲಿ 2 ದಲಿತ ಬಾಲಕಿಯರು ಮರಕ್ಕೆ ನೇಣು | ರೇಪ್ ಮಾಡಿ ಕೊಲೆಗೈದ ಶಂಕೆ