ನವ ದೆಹಲಿ: 2021ರ ಡಿಸೆಂಬರ್ನಲ್ಲಿ ನಡೆದಿದ್ದ ಲುಧಿಯಾನಾ ಕೋರ್ಟ್ ಸ್ಫೋಟದ ಮುಖ್ಯ ಆರೋಪಿ, ಮೋಸ್ಟ್ ವಾಂಟೆಡ್ ಉಗ್ರ ಹರ್ಪ್ರೀತ್ ಸಿಂಗ್ನನ್ನು ರಾಷ್ಟ್ರೀಯ ತನಿಖಾ ದಳ (NIA) ಬಂಧಿಸಿದೆ. ಆತ ಮಲೇಷ್ಯಾದ ಕೌಲಾ ಲುಂಪುರ್ದಿಂದ ದೆಹಲಿ ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿಯುತ್ತಿದ್ದಂತೆ ಆತನನ್ನು ಬಂಧಿಸಲಾಗಿದೆ ಎಂದು ಎನ್ಐಎ ವಕ್ತಾರ ಶುಕ್ರವಾರ ಬೆಳಗ್ಗೆ ಮಾಹಿತಿ ನೀಡಿದ್ದಾರೆ.
ಲುಧಿಯಾನಾ ಕೋರ್ಟ್ ಕಟ್ಟಡ ಸ್ಫೋಟದಲ್ಲಿ ಒಬ್ಬರು ಮೃತಪಟ್ಟು, ಆರು ಮಂದಿ ಗಾಯಗೊಂಡಿದ್ದರು. ಈ ಬ್ಲಾಸ್ಟ್ ಉಗ್ರಕೃತ್ಯವಾಗಿದ್ದು, ಎನ್ಐಎ ತನಿಖೆ ಕೈಗೆತ್ತಿಕೊಂಡಿತ್ತು. ಲುಧಿಯಾನಾ ಬ್ಲಾಸ್ಟ್ನ ಮುಖ್ಯ ರೂವಾರಿ ಹರ್ಪ್ರೀತ್ ಸಿಂಗ್ ಎಂದು ಹೇಳಲಾಗಿದ್ದು, ಈತನ ತಲೆಗೆ 10 ಲಕ್ಷ ರೂಪಾಯಿ ಬಹುಮಾನವನ್ನೂ ಕಟ್ಟಲಾಗಿತ್ತು.
ಲುಧಿಯಾನಾ ಕೋರ್ಟ್ ಸ್ಫೋಟದ ಪ್ರಕರಣವನ್ನು ಮೊದಲು 2021ರ ಡಿಸೆಂಬರ್ 23ರಂದು ಪಂಜಾಬ್ ಪೊಲೀಸರು ದಾಖಲಿಸಿಕೊಂಡು, ತನಿಖೆ ಪ್ರಾರಂಭ ಮಾಡಿದರು. ಬಳಿಕ 2022ರ ಜನವರಿ 1ರಂದು ಎನ್ಐಎ ಈ ಕೇಸ್ನ್ನು ಮರು ನೋಂದಣಿ ಮಾಡಿಸಿಕೊಂಡು ತನಿಖೆ ಪ್ರಾರಂಭ ಮಾಡಿತ್ತು. ಅಂತಾರಾಷ್ಟ್ರೀಯ ಸಿಖ್ ಫೆಡರೇಶನ್ನ ಸ್ವಯಂ ಘೋಷಿತ ಪಾಕಿಸ್ತಾನದ ಮುಖ್ಯಸ್ಥ ಲಕ್ಬರ್ ಸಿಂಗ್ ರೋಡೆ ಈ ಸ್ಫೋಟದ ಮುಖ್ಯ ಸಂಚುಕೋರನಾಗಿದ್ದು, ಹರ್ಪ್ರೀತ್ಸಿಂಗ್ ಆತನೊಂದಿಗೆ ಸೇರಿ ಪಿತೂರಿ ಮಾಡಿದ್ದು ತನಿಖೆ ವೇಳೆ ಸಾಬೀತಾಗಿತ್ತು. ಲಕ್ಬರ್ಗೆ ಈ ಹರ್ಪ್ರೀತ್ ಸಹವರ್ತಿಯಾಗಿದ್ದ ಎಂಬುದೂ ಗೊತ್ತಾಗಿತ್ತು.
ಹರ್ಪ್ರೀತ್ ವಿರುದ್ಧ ಕೇವಲ ಲುಧಿಯಾನಾ ಕೋರ್ಟ್ ಬ್ಲಾಸ್ಟ್ ಕೇಸ್ ಮಾತ್ರವಲ್ಲದೆ, ಮಾರಕ ಅಸ್ತ್ರಗಳು, ಶಸ್ತ್ರಾಸ್ತ್ರಗಳು, ಮಾದಕ ವಸ್ತುಗಳ ಸಾಗಣೆಯ ಆರೋಪವೂ ಇದೆ. ಎನ್ಐಎ ಈತ ವಿರುದ್ಧ ಜಾಮೀನು ರಹಿತ ವಾರೆಂಟ್ ಜಾರಿ ಮಾಡಿತ್ತು. ಲುಕ್ಔಟ್ ಸುತ್ತೋಲೆಯನ್ನೂ ಹೊರಡಿಸಿತ್ತು. ಹರ್ಪ್ರೀತ್ ಮಲೇಷ್ಯಾಕ್ಕೆ ಹೋಗಿ ನೆಲೆಸಿದ್ದ.
ಇದನ್ನೂ ಓದಿ: Explainer: ಹಿಮಾಚಲದಲ್ಲಿ ಖಲಿಸ್ತಾನ್‌ ಹೆಜ್ಜೆ: ಏನಿದರ ಹಕೀಕತ್?