ನವ ದೆಹಲಿ: ಭ್ರಷ್ಟಾಚಾರ ಅಪರಾಧ ಸಾಬೀತಾದ ಹಿನ್ನೆಲೆಯಲ್ಲಿ ತಿಹಾರ ಜೈಲು ಸೇರಿರುವ ದೆಹಲಿ ಆಪ್ ಸರ್ಕಾರದ ಸಚಿವ ಸತ್ಯೇಂದ್ರ ಜೈನ್ ಮಸಾಜ್ ವಿಡಿಯೊಗಳು ಸೋಷಿಯಲ್ ಮೀಡಿಯಾಗಳಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿವೆ. ಜೈಲಿನಲ್ಲಿ ಸತ್ಯೇಂದ್ರ ಜೈನ್ ಆರಾಮಾಗಿ ಮಲಗಿದ್ದರೆ, ವ್ಯಕ್ತಿಯೊಬ್ಬ ಅವರ ತಲೆ, ಕೈ, ಕಾಲುಗಳಿಗೆಲ್ಲ ಮಸಾಜ್ ಮಾಡುತ್ತಿರುವ ದೃಶ್ಯ ಅದರಲ್ಲಿ ಕಾಣಸಿಗುತ್ತದೆ. ವಿಡಿಯೊಗಳು ವೈರಲ್ ಆಗುತ್ತಿದ್ದಂತೆ ತೀವ್ರ ಟೀಕೆಗೆ ಗುರಿಯಾಗಿದೆ. ಭ್ರಷ್ಟಾಚಾರ ಆರೋಪದಡಿ ಜೈಲು ಸೇರಿರುವ ಸಚಿವನಿಗೆ ಜೈಲಲ್ಲಿ ವಿಶೇಷ ವ್ಯವಸ್ಥೆ, ವಿಐಪಿ ಟ್ರೀಟ್ಮೆಂಟ್ ಮಾಡಲಾಗುತ್ತಿದೆಯಾ? ಎಂಬ ಹತ್ತು ಹಲವು ಪ್ರಶ್ನೆಗಳು ಎದ್ದಿದ್ದವು.
ಪ್ರತಿಪಕ್ಷಗಳು, ಜನಸಾಮಾನ್ಯರಿಂದ ಟೀಕೆ ಹೆಚ್ಚುತ್ತಿದ್ದಂತೆ ಆಪ್ ಪಕ್ಷ ಅದನ್ನು ಸಮರ್ಥಿಸಿಕೊಂಡಿತ್ತು. ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದ ಅರವಿಂದ್ ಕೇಜ್ರಿವಾಲ್ ‘ಸತ್ಯೇಂದ್ರ ಜೈನ್ಗೆ ಜೈಲಿನಲ್ಲಿ ವಿಐಪಿ ಟ್ರೀಟ್ಮೆಂಟ್ ಸಿಗುತ್ತಿಲ್ಲ. ಅವರಿಗೆ ಫಿಸಿಯೊಥೆರಪಿ ಮಾಡಲಾಗುತ್ತಿದೆ. ಇದನ್ನು ಅಷ್ಟು ದೊಡ್ಡ ವಿಷಯವನ್ನಾಗಿ ಮಾಡುವ ಅಗತ್ಯವಿಲ್ಲ’ ಎಂದು ಹೇಳಿದ್ದರು.
ಆದರೆ ಇದೇ ವಿಚಾರದ ಬಗ್ಗೆ ಈಗೊಂದು ಇಂಟರೆಸ್ಟಿಂಗ್ ಮಾಹಿತಿ ಹೊರಬಿದ್ದಿದೆ. ಸತ್ಯೇಂದ್ರ ಜೈನ್ಗೆ ಮಸಾಜ್ ಮಾಡುತ್ತಿರುವ ವ್ಯಕ್ತಿ ಫಿಸಿಯೋಥೆರಪಿಸ್ಟ್ ಅಲ್ಲ, ಜೈನ್ಗೆ ಕೊಡಲಾಗುತ್ತಿರುವುದು ಫಿಸಿಯೋಥೆರಪಿ ಚಿಕಿತ್ಸೆಯನ್ನೂ ಅಲ್ಲ. ವಿಡಿಯೊದಲ್ಲಿ ಜೈನ್ಗೆ ಮಸಾಜ್ ಮಾಡುತ್ತಿರುವವನೂ ಒಬ್ಬ ಕೈದಿ. ಅವನ ಹೆಸರು ರಿಂಕು ಎಂದಾಗಿದ್ದು, ಅಪ್ರಾಪ್ತೆಯೊಬ್ಬಳ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿ, ಪೋಕ್ಸೋ ಕಾಯ್ದೆಯಡಿ ಬಂಧಿತನಾದ ಕೈದಿ ಎಂದು ತಿಹಾರ ಜೈಲಿನ ಮೂಲಗಳಿಂದಲೇ ಮಾಹಿತಿ ಸಿಕ್ಕಿದೆ.
ಆತನೊಬ್ಬ ಕೈದಿ ಎಂಬ ಬಗ್ಗೆ ಬಿಜೆಪಿ ವಕ್ತಾರ ಶೆಹಜಾದ್ ಪೂನಾವಾಲಾ ಕೂಡ ಟ್ವೀಟ್ ಮಾಡಿದ್ದಾರೆ. ‘ಸತ್ಯೇಂದ್ರ ಜೈನ್ಗೆ ಮಸಾಜ್ ಮಾಡುತ್ತಿರುವಾತ ವಾಸ್ತವದಲ್ಲಿ ಒಬ್ಬ ರೇಪಿಸ್ಟ್. ಆತ ಫಿಸಿಯೋಥೆರಪಿಸ್ಟ್ ಅಲ್ಲ. ಇದನ್ನೂ ಆಮ್ ಆದ್ಮಿ ಪಕ್ಷ ಸಮರ್ಥನೆ ಮಾಡಿಕೊಳ್ಳುತ್ತದೆಯಾ? ಈಗೇನು ಹೇಳುತ್ತದೆ?’ ಎಂದು ಕಿಡಿ ಕಾರಿದ್ದಾರೆ.
ಇದನ್ನೂ ಓದಿ: Satyendra Jain | ಜೈಲಿನಲ್ಲಿ ಆಪ್‌ನ ಸತ್ಯೇಂದ್ರ ಜೈನ್ ಐಷಾರಾಮಿ ಜೀವನ, ಜೈಲಾಧಿಕಾರಿ ಸಸ್ಪೆಂಡ್