ಮದುರೈ: ಕಿಡ್ನಿ ಸಮಸ್ಯೆಯಿಂದ ಆಸ್ಪತ್ರೆಗೆ ದಾಖಲಾಗಿದ್ದ 9ವರ್ಷದ ಹುಡುಗಿಯೊಬ್ಬಳಿಗೆ ಅವಳ ಅಮ್ಮ ನೀರಿನ ಬದಲು ಸ್ಪಿರಿಟ್ ಕುಡಿಸಿದ್ದು (Fed Spirit), ಬಳಿಕ ಆ ಹುಡುಗಿ ಮೃತಪಟ್ಟಿದ್ದಾಗಿ ವರದಿಯಾಗಿದೆ. ಆ ಅಮ್ಮ ಈಗ ಆಸ್ಪತ್ರೆ ನರ್ಸ್ ವಿರುದ್ಧ ಆರೋಪ ಮಾಡಿದ್ದಾರೆ. ನನ್ನ ಮಗಳು ಅಡ್ಮಿಟ್ ಆಗಿದ್ದ ಕೊಠಡಿಯ ಟೇಬಲ್ ಮೇಲೆಯೇ ನರ್ಸ್ ಸ್ಪಿರಿಟ್ ಇಟ್ಟು ಹೋಗಿದ್ದಳು. ನಾನು ಅದನ್ನೇ ನೀರು ಎಂದು ಭಾವಿಸಿ ಮಗಳಿಗೆ ಕುಡಿಸಿಬಿಟ್ಟೆ. ಮಗಳ ಸಾವಿಗೆ ನರ್ಸ್ ಕಾರಣ ಎಂದು ಆಕೆ ಗೋಳಿಡುತ್ತಿದ್ದಾರೆ.
ತಮಿಳುನಾಡಿನ ಮದುರೈ ಸರ್ಕಾರಿ ಆಸ್ಪತ್ರೆಯಲ್ಲಿ ಹೀಗೊಂದು ಘಟನೆ ನಡೆದಿದೆ. 9 ವರ್ಷದ ಹುಡುಗಿ ಬೆಡ್ ಮೇಲೆ ಮಲಗಿದ್ದವಳಿಗೆ ಬಾಯಾರಿಕೆ ಆಗಿದೆ. ಸಹಜವಾಗಿಯೇ ಜತೆಗಿದ್ದ ಅಮ್ಮನ ಬಳಿ ನೀರು ಬೇಕು ಎಂದಿದ್ದಾಳೆ. ಅಲ್ಲೇ ಪಕ್ಕದ ಟೇಬಲ್ ಮೇಲಿದ್ದ ಬಾಟಲಿಯಿಂದ ನೀರು ತೆಗೆದು ಅಮ್ಮ ಮಗಳಿಗೆ ಕುಡಿಸಿದ್ದಾಳೆ. ಆದರೆ ಅದು ಸ್ಪಿರಿಟ್ ಆಗಿತ್ತು. ಸ್ಪಿರಿಟ್ನ್ನು ಕುಡಿಸುತ್ತಿದ್ದಂತೆ ಮಗಳು ಸಾವನ್ನಪ್ಪಿದಳು ಎಂಬುದು ಅಮ್ಮನ ಆರೋಪ. ಆದರೆ ಆಸ್ಪತ್ರೆ ಅದನ್ನು ನಿರಾಕರಿಸಿದೆ. ಬಾಲಕಿಯ ಪೋಸ್ಟ್ಮಾರ್ಟಮ್ ಮಾಡಲಾಗಿದೆ. ಬಾಲಕಿ ಸತ್ತಿದ್ದು ಸ್ಪಿರಿಟ್ ಕುಡಿದು ಅಲ್ಲ, ಆಕೆಗೆ ಬ್ರೇನ್ ಹೆಮರೇಜ್ (ಮಿದುಳಲ್ಲಿ ರಕ್ತ ಹೆಪ್ಪುಗಟ್ಟಿ) ಆಗಿದ್ದರಿಂದ ಜೀವ ಹೋಗಿದೆ ಎಂದು ವೈದ್ಯರು ಹೇಳಿದ್ದಾರೆ. ಹಾಗೇ, ಶವಪರೀಕ್ಷೆ ವರದಿಯಲ್ಲಿ ಇದನ್ನೇ ಉಲ್ಲೇಖಿಸಲಾಗಿದೆ.
ಇದನ್ನೂ ಓದಿ: kidnapping case: ಬಾಲಕಿಗೆ ‘ಕಿಡ್ನ್ಯಾಪ್’ ಆಟ; ಡೆಲಿವರಿ ಬಾಯ್‌ಗೆ ಪ್ರಾಣ ಸಂಕಟ
ಈ ಬಗ್ಗೆ ಪ್ರತಿಕ್ರಿಯಿಸಿದ ಆಸ್ಪತ್ರೆಯ ಹಿರಿಯ ಮೂತ್ರಪಿಂಡಶಾಸ್ತ್ರಜ್ಞ ‘ಬಾಲಕಿಯ ಬಾಯಿಯ ಬಳಿ ಸ್ಪಿರಿಟ್ ಇದ್ದಿದ್ದು ಹೌದು. ಆದರೆ ಅದು ಹೊಟ್ಟೆಯೊಳಕ್ಕೆ ಹೋಗಿ ಹಾನಿ ಮಾಡಿಲ್ಲ. ಅತ್ಯಂತ ಕಡಿಮೆ ಪ್ರಮಾಣದ ಸ್ಪಿರಿಟ್ ಹುಡುಗಿಯ ದೇಹದೊಳಕ್ಕೆ ಹೋಗಿದೆ. ಇದು ಸಾವಿಗೆ ಕಾರಣವಾಗಿಲ್ಲ’ ಎಂದು ತಿಳಿಸಿದ್ದಾರೆ. ಇನ್ನು ಆಸ್ಪತ್ರೆಯ ಡೀನ್ ಕೂಡ ಇದನ್ನೇ ಹೇಳಿದ್ದಾರೆ. ‘ಹುಡುಗಿಗೆ ತುಂಬ ದಿನಗಳಿಂದಲೂ ಡಯಾಲಿಸಿಸ್ ಚಿಕಿತ್ಸೆ ನಡೆಯುತ್ತಿದೆ. ಹೀಗಾಗಿ ನೀರನ್ನು ಕೂಡ ಜಾಸ್ತಿ ಪ್ರಮಾಣದಲ್ಲಿ ಕೊಡುವಂತಿಲ್ಲ. ಆಕೆಗೆ ಬಾಯಾರಿಕೆಯಾದರೂ ಹನಿಹನಿಯಾಗಿಯೇ ನೀರು ಕೊಡಬೇಕು. ಹಾಗೇ, ಆಕೆಯ ಅಮ್ಮ ಕೂಡ ಸ್ವಲ್ಪವೇ ಸ್ಪಿರಿಟ್ ಹಾಕಿದ್ದಾರೆ. ಸ್ಪಿರಿಟ್ನಿಂದ ಬಾಲಕಿ ಜೀವ ಹೋಗಿಲ್ಲ’ ಎಂದು ಹೇಳಿದ್ದಾರೆ.