ಇಂದು ಭಾರತ ಸೇರಿ ವಿಶ್ವದ ಎಲ್ಲೆಡೆ ಮುಸ್ಲಿಂ ಸಮುದಾಯದವರು ಈದ್ ಉಲ್ ಫಿತರ್ ಹಬ್ಬದ (Eid-ul-Fitr 2023) ಸಂಭ್ರಮದಲ್ಲಿ ಇದ್ದಾರೆ. ಪವಿತ್ರ ರಂಜಾನ್ ತಿಂಗಳ ಉಪವಾಸ ಅಂತ್ಯವಾಗುವ ದಿನ ಚಂದ್ರ ಕಾಣಿಸಿದ ಬಳಿಕ ಅವರು ಈದ್ ಉಲ್ ಫಿತರ್ ಆಚರಣೆ ಮಾಡುತ್ತಾರೆ. ಇವತ್ತು ಹಬ್ಬದ ಸಂಭ್ರಮದಲ್ಲಿ ಇರುವ ಮುಸ್ಲಿಮರಿಗೆ ಪ್ರಧಾನಿ ನರೇಂದ್ರ ಮೋದಿ, ರಾಷ್ಟ್ರಪತಿ ದ್ರೌಪದಿ ಮುರ್ಮು, ಯುಎಸ್ ಅಧ್ಯಕ್ಷ ಜೋ ಬೈಡೆನ್, ಬ್ರಿಟಿಷ್ ಪ್ರಧಾನಿ ರಿಷಿ ಸುನಕ್ ಮತ್ತಿತರ ಗಣ್ಯರೆಲ್ಲ ಶುಭಕೋರಿದ್ದಾರೆ (Eid Mubarak). ಟ್ವೀಟ್ ಮಾಡಿರುವ ಪ್ರಧಾನಿ ನರೇಂದ್ರ ಮೋದಿ ‘ಈದ್ ಉಲ್ ಫಿತರ್ ಹಬ್ಬದ ಶುಭಾಶಯಗಳು. ಸಮಾಜದಲ್ಲಿ ಸೌಹಾರ್ದತೆ ಮತ್ತು ಸಹಾನುಭೂತಿಯ ಮನೋಭಾವ ಹೆಚ್ಚಾಗಲಿ. ಎಲ್ಲರ ಆರೋಗ್ಯ ಮತ್ತು ಕ್ಷೇಮಕ್ಕಾಗಿ ನಾನು ಪ್ರಾರ್ಥಿಸುತ್ತೇನೆ, ಈದ್ ಮುಬಾರಕ್’ ಎಂದು ಹೇಳಿದ್ದಾರೆ.
ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಟ್ವೀಟ್ ಮಾಡಿ ‘ದೇಶದ ಎಲ್ಲ ಜನರಿಗೂ, ಅದರಲ್ಲೂ ವಿಶೇಷವಾಗಿ ಈದ್ ಉಲ್ ಫಿತರ್ ಆಚರಿಸುತ್ತಿರುವ ಮುಸ್ಲಿಂ ಸಹೋದರ/ಸಹೋದರಿಯರಿಗೆ ಹಬ್ಬದ ಶುಭಾಶಯಗಳು. ಈದ್ ಎಂಬುದು ಪ್ರೀತಿ, ಸಹಾಯ ಮತ್ತು ಕರುಣೆಯನ್ನು ಸಾರುವ ಹಬ್ಬ . ನಾವೆಲ್ಲರೂ ಒಟ್ಟಾಗಿ, ಒಗ್ಗಟ್ಟಾಗಿ ಮುನ್ನಡೆಯೋಣ ಎಂಬ ನಿರ್ಣಯವನ್ನು ಅಂಗೀಕರಿಸುವ ಮೂಲಕ ಈದ್ ಆಚರಿಸೋಣ’ ಎಂದು ಹೇಳಿದ್ದಾರೆ. ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಟ್ವೀಟ್ ಮಾಡಿ ‘ಪ್ರತಿಯೊಬ್ಬರಿಗೂ ಈದ್ ಮುಬಾರಕ್. ಈ ಹಬ್ಬ ಶಾಂತಿ, ಸಂತೋಷ, ಸಮೃದ್ಧಿಯನ್ನು ಹೊತ್ತುತರಲಿ’ ಎಂದಿದ್ದಾರೆ.
ಇದನ್ನೂ ಓದಿ: Eid ul fitr 2023: ಹೊಸ ಬದುಕು, ಹೊಸ ಸಂಭ್ರಮದ ಆರಂಭವೇ ಈದ್ ಮುಬಾರಕ್
ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಅವರು ಒಂದು ಚಿಕ್ಕ ವಿಡಿಯೊ ಶೇರ್ ಮಾಡಿಕೊಂಡು ಈದ್ ಹಬ್ಬದ ಶುಭಕೋರಿದ್ದಾರೆ. ‘ರಂಜಾನ್ ತಿಂಗಳು ಮುಕ್ತಾಯವಾಗುತ್ತಿದೆ. ಯುಎಸ್ನಲ್ಲಿ ಮುಸ್ಲಿಮರು ಈದ್ ಉಲ್ ಫಿತರ್ ಆಚರಣೆ ಮಾಡುತ್ತಿದ್ದಾರೆ. ಈ ಹೊತ್ತಲ್ಲಿ ಜಿಲ್ (ಜೋ ಬೈಡೆನ್ ಪತ್ನಿ) ಮತ್ತು ನಾನು ಎಲ್ಲ ಮುಸ್ಲಿಮರಿಗೂ ಹಬ್ಬದ ಶುಭಾಶಯ ಕೋರುತ್ತಿದ್ದೇವೆ’ ಎಂದು ಹೇಳಿದ್ದಾರೆ. ಬ್ರಿಟನ್ ಪ್ರಧಾನಿ ರಿಷಿ ಸುನಕ್ ಟ್ವೀಟ್ ಮಾಡಿ ‘ವಿಶ್ವದಾದ್ಯಂತ ಈದ್ ಉಲ್ ಫಿತರ್ ಹಬ್ಬ ಆಚರಣೆ ಮಾಡುತ್ತಿರುವ ಎಲ್ಲ ಮುಸ್ಲಿಮರಿಗೆ ಈದ್ ಮುಬಾರಕ್’ ಎಂದಿದ್ದಾರೆ.