ತಿರುವನಂತಪುರಂ: ಕೇರಳ ಪ್ರವಾಸದಲ್ಲಿರುವ ಪ್ರಧಾನಮಂತ್ರಿ ನರೇಂದ್ರ (PM Modi) ಇಂದು ಆ ರಾಜ್ಯದ ಮೊದಲ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲಿ (Vande Bharat Express)ಗೆ ತಿರುವನಂತಪುರಂನಲ್ಲಿ ಚಾಲನೆ ನೀಡಿದರು. ಅಷ್ಟೇ ಅಲ್ಲ, ದೇಶದ ಮೊದಲ ವಾಟರ್ ಮೆಟ್ರೋಕ್ಕೆ ಕೊಚ್ಚಿಯಲ್ಲಿ ಅವರು ಹಸಿರು ನಿಶಾನೆ ತೋರಿಸಿದ್ದಾರೆ. ಕೇರಳದಲ್ಲಿ ಇಂದು ಉದ್ಘಾಟನೆಗೊಂಡ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲು, ತಿರುವನಂತಪುರಂ-ಕಾಸರಗೋಡು ಮಧ್ಯೆ ಸಂಚಾರ ಮಾಡಲಿದೆ. ತಿರುವನಂತಪುರಂನಿಂದ ಕಾಸರಗೋಡಿಗೆ ಸಾಗುವ ಮಾರ್ಗದಲ್ಲಿ ಕೊಲ್ಲಂ, ಕೊಟ್ಟಾಯಂ, ಎರ್ನಾಕುಲಂ, ತ್ರಿಶೂರ್, ಪಲಕ್ಕಾಡ್, ಪತನಂಥಿಟ್ಟ, ಮಲಪ್ಪುರಂ, ಕೊಯಿಕ್ಕೋಡ್, ಕಣ್ಣೂರ್ ಸೇರಿ 11 ಜಿಲ್ಲೆಗಳ ವಿವಿಧ ನಗರಗಳನ್ನು ಈ ರೈಲು ಹಾದುಹೋಗಲಿದ್ದು, 556 ಕಿಮೀ ದೂರವನ್ನು 8ತಾಸುಗಳಲ್ಲಿ ತಲುಪಲಿದೆ. ಅಂದಹಾಗೇ, ಇದು ದೇಶದ 16ನೇ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲಾಗಿದೆ.
ಪ್ರಧಾನಿ ನರೇಂದ್ರ ಮೋದಿಯವರು ಬಿಳಿ ಬಣ್ಣದ ಲುಂಗಿಯುಟ್ಟು, ಅದೇ ಬಣ್ಣದ ಶರ್ಟ್ ತೊಟ್ಟು, ಶಲ್ಯ ಹೊದ್ದು ಬೆಳಗ್ಗೆ 10.30ರ ಹೊತ್ತಿಗೆ ತಿರುವನಂತಪುರಂ ರೈಲ್ವೆ ಸ್ಟೇಶನ್ಗೆ ಆಗಮಿಸಿದ್ದರು. ಕೇರಳ ರಾಜ್ಯಪಾಲ ಅರೀಫ್ ಮೊಹಮ್ಮದ್ ಖಾನ್, ಮುಖ್ಯಮಂತ್ರಿ ಪಿಣರಾಯಿ ವಿಜಯನ್, ಕಾಂಗ್ರೆಸ್ ಸಂಸದ ಶಶಿ ತರೂರ್ ಉಪಸ್ಥಿತರಿದ್ದರು. ವಂದೇ ಭಾರತ್ ರೈಲು ಮತ್ತು ವಾಟರ್ ಮೆಟ್ರೋ ಉದ್ಘಾಟನೆ ಮಾಡಿದ ಬಳಿಕ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ ‘ಇಂದು ಕೇರಳಕ್ಕೆ ಮೊದಲ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲು ಲಭ್ಯವಾಗಿದೆ. ಇನ್ನೊಂದೆಡೆ ವಾಟರ್ ಮೆಟ್ರೋಕ್ಕೆ ಕೂಡ ಚಾಲನೆ ಸಿಕ್ಕಿದೆ. ಇನ್ನೂ ಹಲವು ಅಭಿವೃದ್ಧಿ ಯೋಜನೆಗಳು ಮತ್ತು ಸಂಪರ್ಕ ಯೋಜನೆಗಳಿಗೆ ಇಂದು ಚಾಲನೆ ಸಿಕ್ಕಿದೆ. ಇಲ್ಲಿನ ಜನರಿಗೆ ಅಭಿನಂದನೆಗಳು’ ಎಂದು ಹೇಳಿದರು.
ತಿರುವನಂತಪುರಂನಿಂದ ಕೊಚ್ಚಿಗೆ ತೆರಳಿದ ಪ್ರಧಾನಿ ಮೋದಿ, ಅಲ್ಲಿ ವಾಟರ್ಮೆಟ್ರೋಕ್ಕೆ ಹಸಿರು ನಿಶಾನೆ ತೋರಿಸಿದ್ದಾರೆ. ಇದು ದೇಶದ ಮೊದಲ ವಾಟರ್ ಮೆಟ್ರೋ ಆಗಿದ್ದು, 10 ದ್ವೀಪಗಳನ್ನು ಸಂಪರ್ಕಿಸುತ್ತದೆ. ಕೇರಳ ಸರ್ಕಾರ ಮತ್ತು ಜರ್ಮನಿಯ ಕೆಎಫ್ಡಬ್ಲ್ಯೂ ಕೂಡ ಈ ಯೋಜನೆಗೆ ಹಣ ನೀಡಿವೆ. ಇದು ರಾಜ್ಯದ ಪಾಲಿಗೆ ಗೇಮ್ ಚೇಂಜರ್ ಆಗಲಿದೆ ಎಂದು ವಿಶ್ಲೇಷಿಸಲಾಗಿದೆ.
ಕೇರಳ ವಾಟರ್ ಮೆಟ್ರೋ ಬಗ್ಗೆ ಸಮಗ್ರ ಮಾಹಿತಿಗೆ ಇಲ್ಲಿ ಕ್ಲಿಕ್ ಮಾಡಿ: Water Metro: ಕೊಚ್ಚಿಯಲ್ಲಿ ದೇಶದ ಮೊದಲ ವಾಟರ್ ಮೆಟ್ರೋಗೆ ಚಾಲನೆ, ಟಿಕೆಟ್‌ ದರ ಎಷ್ಟು?