ದೆಹಲಿ ವಿಶ್ವವಿದ್ಯಾಲಯದ (Delhi University) ಶತಮಾನೋತ್ಸವ ಸಮಾರಂಭಗಳ ಸಮಾರೋಪ ಕಾರ್ಯಕ್ರಮ ಇಂದು (ಜನವರಿ 30) ನಡೆಯಲಿದೆ. ಈ ಸಮಾರೋಪದಲ್ಲಿ ಪ್ರಧಾನಿ ಮೋದಿ (PM Modi) ಮುಖ್ಯ ಅತಿಥಿಯಾಗಿ ಪಾಲ್ಗೊಳ್ಳಲಿದ್ದಾರೆ. ಯೂನಿವರ್ಸಿಟಿಗೆ ಪ್ರಧಾನಿ ಮೋದಿ ಬರುತ್ತಿರುವ ಹಿನ್ನೆಲೆಯಲ್ಲಿ ಈ ಯೂನಿವರ್ಸಿಟಿ ವಿದ್ಯಾರ್ಥಿಗಳು ಮತ್ತು ದೆಹಲಿ ವಿಶ್ವವಿದ್ಯಾಲಯದ ಅಡಿಯಲ್ಲಿ ಬರುವ ಎಲ್ಲ ಕಾಲೇಜುಗಳ ವಿದ್ಯಾರ್ಥಿಗಳಿಗೆ ಕೆಲವು ಮಾರ್ಗಸೂಚಿ ಹೊರಡಿಸಿದ್ದು, ಕಟ್ಟುನಿಟ್ಟಾಗಿ ಪಾಲಿಸುವಂತೆ ಯೂನಿವರ್ಸಿಟಿ ಸೂಚನೆ ನೀಡಿದೆ ಎಂದು ಹೇಳಲಾಗಿದೆ. ಆದರೆ ಈ ಗೈಡ್ ಲೈನ್ಸ್ ವಿಚಾರದಲ್ಲಿ ಗೊಂದಲವಾಗಿದೆ..
ಯೂನಿವರ್ಸಿಟಿ ಅಡಿಯಲ್ಲಿ ಬರುವ ಹಿಂದು ಕಾಲೇಜ್, ಡಾ.ಭೀಮ್ ರಾವ್ ಅಂಬೇಡ್ಕರ್ ಕಾಲೇಜ್, ಜಾಕಿರ್ ಹುಸೇನ್ ಕಾಲೇಜ್ ಗಳ ವಿದ್ಯಾರ್ಥಿಗಳು ಜೂನ್ 30 ರಂದು ಬೆಳಗ್ಗೆ 10-12ಗಂಟೆವರೆಗೆ ಕಡ್ಡಾಯವಾಗಿ ಕಾಲೇಜಲ್ಲಿ ಹಾಜರಿರಬೇಕು. ದೆಹಲಿ ಯೂನಿವರ್ಸಿಟಿಯಲ್ಲಿ ಪ್ರಧಾನಿ ಮೋದಿ ಭಾಗವಹಿಸುವ ಕಾರ್ಯಕ್ರಮವನ್ನು ನೇರ ಪ್ರಸಾರದಲ್ಲಿ ವೀಕ್ಷಿಸುವ ವ್ಯವಸ್ಥೆಯನ್ನು ಕಾಲೇಜಿನಲ್ಲಿ ಮಾಡಲಾಗಿದೆ. ಎಲ್ಲ ವಿದ್ಯಾರ್ಥಿಗಳು ಕಡ್ಡಾಯವಾಗಿ ಈ ಸಮಾರಂಭ ವೀಕ್ಷಿಸಬೇಕು. ಯಾರೂ ಕಪ್ಪು ಬಣ್ಣದ ಬಟ್ಟೆ ಧರಿಸಿ ಬರುವಂತಿಲ್ಲ. ಐಡಿ ಕಾರ್ಡ್ ತರಲೇಬೇಕು. ಅಷ್ಟೇ ಅ ಲ್ಲ ಈ ಲೈವ್ ಸ್ಟ್ರೀಮ್ ನಲ್ಲಿ ಪಾಲ್ಗೊಂಡ ವಿದ್ಯಾರ್ಥಿಗಳಿಗೆ ಹೆಚ್ಚುವರಿ ಐದು ಹಾಜರಾತಿ ಕೊಡಲಾಗುವುದು ಎಂಬಿತ್ಯಾದಿ ಸೂಚನೆಗಳನ್ನು ಈ ಗೈಡ್ ಲೈನ್ ಒಳಗೊಂಡಿದೆ.
ಆದರೆ ಬರೀ ಗೊಂದಲ
ಪ್ರಧಾನಿ ಮೋದಿ ಭೇಟಿ ನಿಮಿತ್ತ ಯೂನಿವರ್ಸಿಟಿ ಹೀಗೆ ಮಾರ್ಗಸೂಚಿ ಹೊರಡಿಸಿದೆಯಾ ಎಂಬುದರ ಬಗ್ಗೆಯೇ ಗೊಂದಲ ಏರ್ಪಟ್ಟಿದೆ. ಹಿಂದು ಕಾಲೇಜಿನ ಅಧ್ಯಾಪಕ ವೃಂದದ ಉಸ್ತುವಾರಿ ಮೀನು ಶ್ರೀವಾಸ್ತವ್ ಅವರು ಯೂನಿವರ್ಸಿಟಿಯಿಂದ ಬುಧವಾರ ಗೈಡ್ಲೈನ್ಸ್ ಬಂದಿದೆ. ಅದರಲ್ಲಿ ಏಳು ಅಂಶದ ಮಾರ್ಗಸೂಚಿ ಉಲ್ಲೇಖಿಸಲಾಗಿದೆ. ಹಾಜರಾತಿ ಕಡ್ಡಾಯ, ಕಪ್ಪು ಅಂಗಿ ಧರಿಸಿ ಬರಬೇಡಿ ಎನ್ನುವುದನ್ನೆಲ್ಲ ಗೈಡ್ಲೈನ್ಸ್ ಒಳಗೊಂಡಿದೆ. ಹೀಗಾಗಿ ನಾವು ನಮ್ಮ ಕಾಲೇಜಿನಿಂದಲೂ ವಿದ್ಯಾರ್ಥಿಗಳಿಗೆ ನೋಟಿಸ್ ನೀಡಿದ್ದೇವೆ ಎಂದು ಹೇಳಿದ್ದಾರೆ. ಆದರೆ ಇದೇ ಕಾಲೇಜಿನ ಪ್ರಿನ್ಸಿಪಾಲ್ ಅಂಜು ಶ್ರೀವಾಸ್ತವ್ ಅವರು ಅಂಥ ನೋಟಿಸ್ ಏನೂ ಬಂದಿಲ್ಲ. ಇಲ್ಲೇನೋ ತಪ್ಪಾಗಿದೆ. ಅಂಥ ನೋಟಿಸ್ ನಾವು ಕಾಲೇಜಿಂದ ಕೊಟ್ಟಿಲ್ಲ ಎಂದಿದ್ದಾರೆ. ಆದರೆ ಅಧ್ಯಾಪಕರು, ವಿದ್ಯಾರ್ಥಿಗಳು ಎಲ್ಲರೂ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರಧಾನಿ ಮೋದಿ ಕಾರ್ಯಕ್ರಮದ ನೇರ ಪ್ರಸಾರ ವೀಕ್ಷಿಸುವಂತೆ ನಾವು ಮೌಖಿಕವಾಗಿ ಹೇಳಿದ್ದೇವೆ ಎಂದೂ ತಿಳಿಸಿದ್ದಾರೆ.
ಇದನ್ನೂ ಓದಿ: Tripura Rath Yatra: ಜಗನ್ನಾಥ ರಥಯಾತ್ರೆ ದುರಂತ; ಪ್ರಧಾನಿ ಮೋದಿಯಿಂದ 2 ಲಕ್ಷ ರೂ.ಪರಿಹಾರ
ಇನ್ನು ಡಾ. ಭೀಮ್ ರಾವ್ ಅಂಬೇಡ್ಕರ್ ಕಾಲೇಜು ತನ್ನ ವಿದ್ಯಾರ್ಥಿಗಳಿಗೆ, ಅಧ್ಯಾಪಕರು, ಕಾಲೇಜಿನ ಬೋಧಕೇತರ ಸಿಬ್ಬಂದಿಗೆ ನೋಟಿಸ್ ಹೊರಡಿಸಿದ್ದು, ಎಲ್ಲರೂ ಕಾರ್ಯಕ್ರಮದಲ್ಲಿ ಕಡ್ಡಾಯವಾಗಿ ಹಾಜರು ಇರಲು ಸೂಚಿಸಿದೆ. ಜಾಕೀರ್ ಹುಸೇನ್ ಕಾಲೇಜು ಕೂಡ ಇದೇ ಸೂಚನೆಯನ್ನು ವಿದ್ಯಾರ್ಥಿಗಳು, ಬೋಧಕ/ಬೋಧಕೇತರ ಸಿಬ್ಬಂದಿಗೆ ನೀಡಿದೆ. ಹಾಗೇ, ಈ ಹಾಜರಾತಿ ವಿಷಯದ ಬಗ್ಗೆ ದೆಹಲಿ ಯೂನಿವರ್ಸಿಟಿ ಸ್ಪಷ್ಟನೆ ನೀಡಿದ್ದು ‘ನಾವು ವಿದ್ಯಾರ್ಥಿಗಳು, ಶಿಕ್ಷಕರಿಗೆ ಹಾಜರಾತಿ ಕಡ್ಡಾಯ ಎಂದು ಹೇಳಿಲ್ಲ’ ಎಂದು ತಿಳಿಸಿದೆ. ಆದರೆ ಉಳಿದ ಗೈಡ್ಲೈನ್ಸ್ ಬಗ್ಗೆ ಮಾಹಿತಿ ಸಿಕ್ಕಿಲ್ಲ. ಒಟ್ಟಿನಲ್ಲಿ ಪ್ರಧಾನಿ ಮೋದಿ ದೆಹಲಿ ಯೂನಿವರ್ಸಿಟಿ ಭೇಟಿಗೆ ಸಂಬಂಧಪಟ್ಟ ಗೈಡ್ಲೈನ್ಸ್ ಗೊಂದಲದ ಗೂಡಾಗಿದೆ.