ಹೈದರಾಬಾದ್: ಪ್ರವಾದಿ ಮೊಹಮ್ಮದ್ ವಿರುದ್ಧ ಮಾತನಾಡಿ (Prophet Remarks) ವಿವಾದ ಹುಟ್ಟುಹಾಕಿ, ಬಂಧಿತರಾದ್ದ ತೆಲಂಗಾಣ ಬಿಜೆಪಿ ಮಾಜಿ ನಾಯಕ ಟಿ.ರಾಜಾ ಸಿಂಗ್ ಬಗ್ಗೆ ಕಾಂಗ್ರೆಸ್ ನಾಯಕ ಫಿರೋಜ್ ಖಾನ್ ಆಡಿರುವ ಮಾತಿನ ವಿಡಿಯೋ ಈಗ ಎಲ್ಲ ಕಡೆ ವೈರಲ್ ಆಗುತ್ತಿದೆ. ‘ಪ್ರವಾದಿ ಮೊಹಮ್ಮದ್ರು ಮುಸ್ಲಿಂ ಸಮುದಾಯದ ಅತ್ಯಂತ ಪ್ರಮುಖ ನಾಯಕ. ಅವರಿಗೇ ಅವಹೇಳನ ಮಾಡಿದ ಟಿ.ರಾಜಾ ಸಿಂಗ್ ಕೂಡಲೇ ಕ್ಷಮೆ ಕೇಳಬೇಕು’ ಎಂದು ಫಿರೋಜ್ ಖಾನ್ ಆಗ್ರಹಿಸಿದ್ದಾರೆ. ಅದರ ಜತೆಗೆ, ‘ಹಾಗೊಮ್ಮೆ ರಾಜಾ ಸಿಂಗ್ ಕ್ಷಮೆ ಕೇಳದೆ ಇದ್ದರೆ, ಅವರು ಕಂಡಲ್ಲಿ ಹೊಡೆಯಿರಿ. ನಾವು ಈ ವಿಚಾರದಲ್ಲಿ ಎಷ್ಟು ಸಲ ಬೇಕಾದರೂ ಕಾನೂನು ಕೈಗೆತ್ತಿಕೊಳ್ಳಬಹುದು’ ಎಂದೂ ಹೇಳಿದ್ದನ್ನು ವಿಡಿಯೋದಲ್ಲಿ ಕೇಳಬಹುದು.
‘ಪ್ರವಾದಿ ಮೊಹಮ್ಮದ್ರು ನಮ್ಮ ಪಾಲಿನ ಹೀರೋ. ಆದರೆ ಪ್ರವಾದಿ ವಿಚಾರವನ್ನು ಟಿ ರಾಜಾ ಸಿಂಗ್ ಅವರು ರಾಜಕೀಯಗೊಳಿಸುತ್ತಿದ್ದಾರೆ. ಆದಷ್ಟು ಶೀಘ್ರವೇ ಅವರು ಕ್ಷಮೆ ಯಾಚಿಸಬೇಕು. ಹಾಗೊಮ್ಮೆ ಅವರು ಕ್ಷಮೆ ಕೇಳದೆ ಇದ್ದರೆ, ಕಂಡಲ್ಲಿ ಹೊಡೆಯಿರಿ ಎಂದು ಹೈದರಾಬಾದ್ನ ಪ್ರತಿಯೊಬ್ಬ ಮುಸ್ಲಿಮರಿಗೂ ನಾನು ಹೇಳುತ್ತಿದ್ದೇನೆ. ಈ ವಿಚಾರದಲ್ಲಿ ಒಂದು ಸಲ ಅಲ್ಲ, ನಾವೆಷ್ಟು ಬಾರಿ ಬೇಕಾದರೂ ಕಾನೂನನ್ನು ಕೈಗೆ ತೆಗೆದುಕೊಳ್ಳಬಹುದು’ ಎಂದು ಅವರು ಸ್ಪಷ್ಟವಾಗಿ ಹೇಳುವುದು ವಿಡಿಯೋದಲ್ಲಿ ಕೇಳಿಸುತ್ತದೆ.
ರಾಜಾ ಸಿಂಗ್ ಬಿಜೆಪಿ ಶಾಸಕರಾಗಿದ್ದರು. ಅವರು ಪ್ರವಾದಿ ಮೊಹಮ್ಮದ್ ವಿರುದ್ಧ ಮಾತನಾಡಿದ ವಿಡಿಯೋ ಮಂಗಳವಾರ (ಆಗಸ್ಟ್ 23) ಭರ್ಜರಿ ವೈರಲ್ ಆಗಿತ್ತು. ಅಷ್ಟಾದ ಬೆನ್ನಲ್ಲೇ ಹೈದರಾಬಾದ್ನ ಅನೇಕ ಕಡೆಗಳಲ್ಲಿ ಮುಸ್ಲಿಮರು ತೀವ್ರ ಪ್ರತಿಭಟನೆ ನಡೆಸಿದ್ದರು. ರಾಜಾ ಸಿಂಗ್ ಶಿರಚ್ಛೇದ ಮಾಡಬೇಕು ಎಂಬ ಕೂಗು ಕೇಳಿಬಂದಿತ್ತು. ರಾಜಾ ಸಿಂಗ್ ವಿರುದ್ಧ ಮುಸ್ಲಿಂ ಮುಖಂಡರು ದೂರು ಕೂಡ ಕೊಟ್ಟಿದ್ದರು. ಎಫ್ಐಆರ್ ದಾಖಲಿಸಿದ ಪೊಲೀಸರು ಅವರನ್ನು ಬಂಧಿಸಿ ಕರೆದುಕೊಂಡು ಹೋಗಿದ್ದರು. ರಾಜಾ ಸಿಂಗ್ ಬಂಧನದ ಬೆನ್ನಲ್ಲೇ ಅವರನ್ನು ಬಿಜೆಪಿ ಪಕ್ಷದಿಂದ ಅಮಾನತು ಮಾಡಿದೆ.
ಟಿ.ರಾಜಾ ಸಿಂಗ್ ವಿರುದ್ಧದ ಪ್ರತಿಭಟನೆ ಕಾವು ಇಂದು ಕೂಡ ಹೈದರಾಬಾದ್ನಲ್ಲಿ ಮುಂದುವರಿದಿದೆ. ರಾಜಾ ಸಿಂಗ್ಗೆ ಸ್ಥಳೀಯ ನ್ಯಾಯಾಲಯ ಮಂಗಳವಾರ ರಾತ್ರಿಯೇ ಜಾಮೀನು ನೀಡಿದೆ. ಇದು ಮುಸ್ಲಿಂ ಸಮುದಾಯದವರನ್ನು ಮತ್ತಷ್ಟು ಕೆರಳಿಸಿದೆ. ರಾಜಾ ಸಿಂಗ್ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿ, ಹೈದರಾಬಾದ್ನ ಅನೇಕ ಕಡೆಗಳಲ್ಲಿ ಪ್ರತಿಭಟನಾ ಮೆರವಣಿಗೆಗಳನ್ನು ನಡೆಸಿದ್ದಾರೆ. ರಾಜಾ ಸಿಂಗ್ ಅವರ ಪ್ರತಿಕೃತಿಗಳನ್ನು ದಹಿಸಿದ್ದಾರೆ.
ನಾನೇನೂ ತಪ್ಪು ಮಾಡಿಲ್ಲವೆಂದ ರಾಜಾ ಸಿಂಗ್
ಜೈಲಿನಿಂದ ಬಿಡುಗಡೆಯಾದ ಬೆನ್ನಲ್ಲೇ ರಾಜಾ ಸಿಂಗ್ ಹೇಳಿಕೆ ನೀಡಿ, ‘ನಾನು ಯಾವುದೇ ಧರ್ಮ ಅಥವಾ ವ್ಯಕ್ತಿಯ ಬಗ್ಗೆ ಅವಹೇಳನ ಮಾಡಿಲ್ಲ. ನನ್ನನ್ನು ನನ್ನ ಪಕ್ಷ ಅರ್ಥ ಮಾಡಿಕೊಳ್ಳುತ್ತದೆ ಎಂಬ ನಂಬಿಕೆ ಖಂಡಿತ ಇದೆ ಎಂದು ಹೇಳಿದ್ದಾರೆ. ಬಿಜೆಪಿ ನೀಡಿರುವ ಶೋಕಾಸ್ ನೋಟಿಸ್ ಬಗ್ಗೆ ಪ್ರತಿಕ್ರಿಯೆ ನೀಡಿದ ರಾಜಾ ಸಿಂಗ್, ‘ನಾನು ಕೊಟ್ಟಿರುವ ಸ್ಪಷ್ಟನೆಯನ್ನು ಪಕ್ಷ ಒಪ್ಪಿಕೊಳ್ಳುತ್ತದೆ. ನನ್ನನ್ನು ಕೈಬಿಡುವುದಿಲ್ಲ ಎಂಬ ಭರವಸೆ ನನಗೆ ಇದೆ. ಹಾಗೊಮ್ಮೆ ಮನವರಿಕೆ ಆಗದೆ ಇದ್ದಲ್ಲಿ, ನಾನೇನೂ ಮಾಡಲು ಸಾಧ್ಯವಿಲ್ಲ’ ಎಂದೂ ತಿಳಿಸಿದ್ದಾರೆ.
‘ನಿನ್ನನ್ನು ಕೊಲ್ಲುತ್ತೇವೆ ಎಂದು ಹೇಳಿ ಇದುವರೆಗೆ ಸುಮಾರು 4 ಸಾವಿರ ಕರೆಗಳು, ಮೆಸೇಜ್ಗಳು ಬಂದಿವೆ. ಇದು ಈಗಿನ ಕಥೆಯಲ್ಲ. ಹಲವು ವರ್ಷಗಳಿಂದ ನನಗೆ ಈ ಬೆದರಿಕೆ ಸಾಮಾನ್ಯವಾಗಿಬಿಟ್ಟಿದೆ. ನಾನು ಅದನ್ನೆಲ್ಲ ನಿರ್ಲಕ್ಷ್ಯ ಮಾಡುತ್ತಲೇ ಬಂದಿದ್ದೇನೆ. ಅಲ್ಲೆಲ್ಲೋ ಕುಳಿತು ಕರೆ ಮಾಡುವವರು, ಇವತ್ತಿನವರೆಗೆ ನನ್ನ ಮನೆಯನ್ನಾಗಿ, ನಾನಿರುವ ಏರಿಯಾ ಪ್ರವೇಶಿಸುವುದಕ್ಕಾಗಲೀ ಇದುವರೆಗೆ ಧೈರ್ಯ ತೋರಿಸಿಲ್ಲ’ ಎಂದೂ ರಾಜಾ ಸಿಂಗ್ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಪ್ರವಾದಿ ಮೊಹಮ್ಮದ್ಗೆ ಅವಹೇಳನ; ತೆಲಂಗಾಣ ಬಿಜೆಪಿ ಶಾಸಕ ರಾಜಾ ಸಿಂಗ್ ಪಕ್ಷದಿಂದಲೇ ಅಮಾನತು