ತೆಲಂಗಾಣ: ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ನೇತೃತ್ವದಲ್ಲಿ ಭಾರತ್ ಜೋಡೋ ಯಾತ್ರೆ ತೆಲಂಗಾಣದಲ್ಲಿ ನಡೆಯುತ್ತಿದೆ. ಅಕ್ಟೋಬರ್ 22ರಂದು ಕರ್ನಾಟಕವನ್ನು ನಿರ್ಗಮಿಸಿ, ಸದ್ಯ ತೆಲಂಗಾಣದಲ್ಲಿ ಪಾದಯಾತ್ರೆ ನಡೆಯುತ್ತಿದ್ದು, ರಾಹುಲ್ ಗಾಂಧಿ ಯಥಾಪ್ರಕಾರ ಸ್ಥಳೀಯರೊಂದಿಗೆ ಸಂವಾದ, ಮಾತುಕತೆ ನಡೆಸುತ್ತ, ಅವರ ಕುಂದುಕೊರತೆ ಆಲಿಸುತ್ತ ಹೆಜ್ಜೆಹಾಕುತ್ತಿದ್ದಾರೆ. ಈ ಮಧ್ಯೆ ಶನಿವಾರ ರಾಹುಲ್ ಗಾಂಧಿ ಅವರು ತೆಲಂಗಾಣದ ಧರ್ಮಾಪುರದಲ್ಲಿ ಯಾತ್ರೆ ಮಧ್ಯೆ, ಬುಡಕಟ್ಟು ಜನಾಂಗದವರೊಂದಿಗೆ ನೃತ್ಯ ಮಾಡಿ ಗಮನ ಸೆಳೆದರು.
ರಾಹುಲ್ ಗಾಂಧಿ ನೇತೃತ್ವದಲ್ಲಿ ಕಾಂಗ್ರೆಸ್ ಹಮ್ಮಿಕೊಂಡಿರುವ ಭಾರತ್ ಜೋಡೋ ಯಾತ್ರೆ 50ದಿನ ಪೂರೈಸಿದೆ. ಅಕ್ಟೋಬರ್ 17ರಂದು ಕಾಂಗ್ರೆಸ್ ಅಧ್ಯಕ್ಷ ಚುನಾವಣೆ ನಿಮಿತ್ತ ಯಾತ್ರೆಗೆ ಬ್ರೇಕ್ ಸಿಕ್ಕಿತ್ತು. ಅದಾದ ಬಳಿಕ ದೀಪಾವಳಿ ಹಬ್ಬಕ್ಕಾಗಿ ಮೂರು ದಿನ ಬ್ರೇಕ್ ನೀಡಲಾಗಿತ್ತು. ಹೀಗೆ ಮೂರು ದಿನಗಳ ಬ್ರೇಕ್ ನಂತರ ಮತ್ತೆ ಯಾತ್ರೆ ಶುರು ಮಾಡಿದ್ದ ರಾಹುಲ್ ಗಾಂಧಿ ಎರಡು ದಿನಗಳ ಹಿಂದೆ ತೆಲಂಗಾಣದ ನಾರಾಯಣಪೇಟ್ ಜಿಲ್ಲೆಯಲ್ಲಿ ಸ್ಥಳೀಯ ಕಲಾವಿದರೊಂದಿಗೆ ಢೋಲ್ ಬಾರಿಸಿ ಸಂಭ್ರಮಿಸಿದ್ದರು.
ತಮಿಳುನಾಡಿನ ಕನ್ಯಾಕುಮಾರಿಯಿಂದ ಪ್ರಾರಂಭವಾದ ಕಾಂಗ್ರೆಸ್ನ ಭಾರತ್ ಜೋಡೋ ಯಾತ್ರೆ ಇಲ್ಲಿಯವರೆಗೆ 1230 ಕಿಮೀ ದೂರ ಕ್ರಮಿಸಿದೆ. ತಮಿಳುನಾಡು, ಕೇರಳ, ಕರ್ನಾಟಕ ಮತ್ತು ಆಂಧ್ರಪ್ರದೇಶಗಳ 18 ಜಿಲ್ಲೆಗಳನ್ನು ದಾಟಿದೆ. ತೆಲಂಗಾಣದಲ್ಲಿ 11 ದಿನ ಇರಲಿದ್ದು, ಇಲ್ಲಿನ 8 ಜಿಲ್ಲೆಗಳಲ್ಲಿ ಕ್ರಮಿಸಲಿದೆ. ಬಳಿಕ ನಾಂದೇಡ್ ಮೂಲಕ ಮಹಾರಾಷ್ಟ್ರಕ್ಕೆ ಪ್ರವೇಶ ಮಾಡಲಿದೆ.