ಪಂಜಾಬ್ನ ಹೋಶಿಯಾರ್ಪುರದಲ್ಲಿ ಭಾರತ್ ಜೋಡೋ ಯಾತ್ರೆ ವೇಳೆ ರಾಹುಲ್ ಗಾಂಧಿಯವರ ಭದ್ರತೆಯಲ್ಲಿ ಉಲ್ಲಂಘನೆಯಾಗಿದೆ. ಪಾದಯಾತ್ರೆಯಲ್ಲಿ ಪಾಲ್ಗೊಂಡಿದ್ದವನೊಬ್ಬ,ರಾಹುಲ್ ಗಾಂಧಿ ಬಳಿ ಒಮ್ಮೆಲೇ ಓಡಿ ಬಂದು ಅವರನ್ನು ಅಪ್ಪಿಕೊಳ್ಳಲು ಮುಂದಾಗಿದ್ದಾನೆ. ಬಳಿಕ ರಾಹುಲ್ ಗಾಂಧಿ ಸುತ್ತಲೂ ಇದ್ದ, ಪಕ್ಷದ ಕಾರ್ಯಕರ್ತರೇ ಆತನನ್ನು ಹಿಡಿದು ತಳ್ಳಿ, ಆಚೆಗೆ ಕಳಿಸಿದ್ದಾರೆ. 12 ಸೆಕೆಂಡ್ಗಳ ಈ ವಿಡಿಯೊ ವೈರಲ್ ಆಗುತ್ತಿದೆ.
ಭಾರತ್ ಜೋಡೋ ಯಾತ್ರೆ ಇಂದು ಮುಂಜಾನೆ ಪಂಜಾಬ್ನ ಟಂಡಾದಲ್ಲಿ ನಡೆಯುತ್ತಿದೆ. ಹರಿಯಾಣದಿಂದ ಕಳೆದ ಬುಧವಾರ ಪಂಜಾಬ್ಗೆ ಕಾಲಿಟ್ಟ ಭಾರತ್ ಜೋಡೋ ಯಾತ್ರೆಯಲ್ಲಿ ಪಾಲ್ಗೊಂಡ ಕಾರ್ಯಕರ್ತರ ಉತ್ಸಾಹವನ್ನು ಚಳಿಯೂ ಕುಂದಿಸುತ್ತಿಲ್ಲ. ಪಂಜಾಬ್ನಲ್ಲಿ ರಾಹುಲ್ ಗಾಂಧಿಯವರೊಂದಿಗೆ ಕಾಂಗ್ರೆಸ್ನ ಪಂಜಾಬ್ ಮುಖ್ಯಸ್ಥ ಅಮರಿಂದರ್ ಸಿಂಗ್ ರಾಜಾ ವಾರಿಂಗ್, ಇತರ ನಾಯಕರಾದ ಹರೀಶ್ ಚೌಧರಿ, ರಾಜ್ಕುಮಾರ್ ಚಬ್ಬೇವಾಲ್ ಮತ್ತಿತರರು ಹೆಜ್ಜೆ ಹಾಕುತ್ತಿದ್ದಾರೆ. ಇಲ್ಲಿಂದ ಜಮ್ಮು-ಕಾಶ್ಮೀರ ಪ್ರವೇಶ ಮಾಡಲಿರುವ ಯಾತ್ರೆ, ಜನವರಿ 30ರ ಹೊತ್ತಿಗೆ ಮುಕ್ತಾಯಗೊಳ್ಳಲಿದೆ.
ರಾಹುಲ್ ಗಾಂಧಿ ಭದ್ರತೆ ಬಗ್ಗೆ ಈ ಹಿಂದೆಯೇ ಕಾಂಗ್ರೆಸ್ ಒಮ್ಮೆ ತಕರಾರು ಎತ್ತಿತ್ತು. ಭಾರತ್ ಜೋಡೋ ಯಾತ್ರೆ ಪ್ರಾರಂಭವಾದಾಗಿನಿಂದಲೂ, ಅದರಲ್ಲೂ ದೆಹಲಿಯಲ್ಲಿ ಯಾತ್ರೆ ನಡೆಯುತ್ತಿರುವಾಗ ಹಲವು ಬಾರಿ ರಾಹುಲ್ ಗಾಂಧಿ ಭದ್ರತಾ ಉಲ್ಲಂಘನೆಯಾಗಿದೆ. ಕೇಂದ್ರ ಸರ್ಕಾರ ಅವರಿಗೆ ಸೂಕ್ತ ಭದ್ರತೆ ಒದಗಿಸಬೇಕು ಎಂದು ಕಾಂಗ್ರೆಸ್ ನಾಯಕ ವೇಣುಗೋಪಾಲ್ ಅವರು ಗೃಹ ಸಚಿವ ಅಮಿತ್ ಶಾ ಅವರಗೆ ಪತ್ರ ಬರೆದಿದ್ದರು. ಅದಕ್ಕೆ ಉತ್ತರಿಸಿದ್ದ ಸಿಆರ್ಪಿಎಫ್ ‘ರಾಹುಲ್ ಗಾಂಧಿಯವರ ಭದ್ರತೆಯಲ್ಲಿ ನಾವು ಯಾವುದೇ ಲೋಪ ಮಾಡಿಲ್ಲ. ಬದಲಾಗಿ ಅವರೇ ಹಲವು ಬಾರಿ ಭದ್ರತೆಯನ್ನು ಉಲ್ಲಂಘಿಸಿದ್ದಾರೆ’ ಎಂದು ಹೇಳಿತ್ತು.
ಇದನ್ನೂ ಓದಿ: ಭಾರತ್ ಜೋಡೋ ಯಾತ್ರೆ ದೆಹಲಿಗೆ ಕಾಲಿಟ್ಟಾಗಿನಿಂದಲೂ ರಾಹುಲ್ ಗಾಂಧಿ ಭದ್ರತೆಯಲ್ಲಿ ವೈಫಲ್ಯ; ಅಮಿತ್ ಶಾಗೆ ಕಾಂಗ್ರೆಸ್ ಪತ್ರ