ನವ ದೆಹಲಿ: 2021ರ ದೆಹಲಿಯ ರೋಹಿಣಿ ಕೋರ್ಟ್ ಶೂಟೌಟ್ (Rohini Court Shootout) ಕೇಸ್ನಲ್ಲಿ ಆರೋಪಿಯಾಗಿ ತಿಹಾರ್ ಜೈಲು ಸೇರಿದ್ದ ಗ್ಯಾಂಗ್ಸ್ಟರ್ ಟಿಲ್ಲು ತಾಜ್ಪುರಿಯಾ(Tillu Tajpuriya)ನನ್ನು ಅದೇ ಜೈಲಿನಲ್ಲಿಯೇ ಹತ್ಯೆಗೈಯ್ಯಲಾಗಿದೆ. ಇದೇ ಜೈಲಿನಲ್ಲಿದ್ದ ವೈರಿ ಗ್ಯಾಂಗ್ನ ಗ್ಯಾಂಗ್ಸ್ಟರ್ಗಳಾದ ಯೋಗೇಶ್ ಟುಂಡಾ ಮತ್ತು ಇತರರು ಟಿಲ್ಲು ಮೇಲೆ ದಾಳಿ ಮಾಡಿ, ಕೊಲೆ ಮಾಡಿದ್ದಾರೆ. ತಿಹಾರ್ ಜೈಲಿನಲ್ಲಿ ಬಿಗಿ ಭದ್ರತೆಯ ನಡುವೆಯೂ ಇಂದು ಮುಂಜಾನೆ 6.45ರ ಹೊತ್ತಿಗೆ ಯೋಗೇಶ್ ಟುಂಡಾ ಮತ್ತು ಅವನ ಸಹಚರರು ಕಬ್ಬಿಣದ ರಾಡ್ನಲ್ಲಿ ಟಿಲ್ಲು ವನ್ನು ಥಳಿಸಿದ್ದರು. ಗಾಯಗೊಂಡಿದ್ದ ಆತನನ್ನು ದೀನ್ ದಯಾಳ್ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಆದರೆ ಅಷ್ಟರಲ್ಲಿ ಟಿಲ್ಲು ಜೀವ ಹೋಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.
ಘಟನೆ ಬಗ್ಗೆ ಮಾಹಿತಿ ನೀಡಿದ ದೆಹಲಿ ಪೊಲೀಸ್ ಪಶ್ಚಿಮ ವಲಯದ ಹೆಚ್ಚುವರಿ ಡಿಸಿಪಿ ಅಕ್ಷತ್ ಕೌಶಲ್ ಅವರು ‘ಟಿಲ್ಲು ತಾಜ್ಪುರಿಯಾ ಮೇಲೆ ದಾಳಿ ಮಾಡಿದ್ದು ಯೋಗೇಶ್ ಅಲಿಯಾಸ್ ಟುಂಡಾ ಮತ್ತು ದೀಪಕ್ ಅಲಿಯಾಸ್ ಟೀಟರ್ ಮತ್ತು ಇತರ ಕೆಲವು ಕೈದಿಗಳು. ಇದರಲ್ಲಿ ಯೋಗೇಶ್ ಮತ್ತು ಅವನ ಸಹಚರರು ಸೆಲ್ ನಂಬರ್ 8ರಲ್ಲಿ ಇದ್ದರೆ, ಟಿಲ್ಲು ತಾಜ್ಪುರಿಯಾ ಸೆಲ್ ನಂಬರ್ 9ರಲ್ಲಿ ಇದ್ದ. ಈ ಎರಡೂ ಕೊಠಡಿಗಳನ್ನು ಬೇರ್ಪಡಿಸುವ ಕಬ್ಬಿಣದ ಗ್ರಿಲ್ನ್ನು ಮುರಿದು ಯೋಗೇಶ್ ಮತ್ತು ಸಹಚರರು ಟಿಲ್ಲು ಕೊಠಡಿಗೆ ನುಗ್ಗಿದ್ದಾರೆ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: ದೆಹಲಿಯ ಸಾಕೇತ್ ಕೋರ್ಟ್ನೊಳಗೆ ಮಹಿಳೆಗೆ ಗುಂಡೇಟು; ಆಸ್ಪತ್ರೆಗೆ ದಾಖಲು ಮಾಡಿದ ಪೊಲೀಸ್ ಅಧಿಕಾರಿ
2021ರ ಸೆಪ್ಟೆಂಬರ್ 24ರಂದು ರೋಹಿಣಿ ಕೋರ್ಟ್ನ ರೂಮ್ ನಂಬರ್ 207ಕ್ಕೆ ನುಗ್ಗಿದ ಇಬ್ಬರು ದುಷ್ಕರ್ಮಿಗಳು ಗುಂಡು ಹಾರಿಸಿ, ಅಲ್ಲಿಗೆ ಅಂದು ವಿಚಾರಣೆಗೆ ಬಂದಿದದ್ದ ಗ್ಯಾಂಗ್ಸ್ಟರ್ ಜಿತೇಂದ್ರ ಮನ್ ಅಲಿಯಾಸ್ ಗೋಗಿಯನ್ನು ಕೊಂದಿದ್ದರು. ಹಾಗೆ ಬಂದ ದುಷ್ಕರ್ಮಿಗಳು ಇಬ್ಬರೂ ವಕೀಲರ ವೇಷದಲ್ಲಿ ಆಗಮಿಸಿದ್ದರು. ಇವರಿಬ್ಬರನ್ನೂ ಪೊಲೀಸರು ಸ್ಥಳದಲ್ಲಿಯೇ ಗುಂಡಿಕ್ಕಿ ಹತ್ಯೆ ಮಾಡಿದ್ದರು. ವಿಚಾರಣೆ/ತನಿಖೆಯ ಬಳಿಕ ಶೂಟರ್ಗಳಿಬ್ಬರೂ ಟಿಲ್ಲು ತಾಜ್ಪುರಿಯಾ ಗ್ಯಾಂಗ್ನವರು ಎಂಬುದು ಖಚಿತವಾಗಿತ್ತು. ಅವನನ್ನು ಬಂಧಿಸಿ ತಿಹಾರ್ ಜೈಲಿನಲ್ಲಿ ಇಡಲಾಗಿತ್ತು. ಇನ್ನು ರೋಹಿಣಿ ಕೋರ್ಟ್ನಲ್ಲಿ ಕೊಲ್ಲಲ್ಪಟ್ಟ ಗೋಗಿ ಕೂಡ ಅನೇಕ ಕೇಸ್ನಲ್ಲಿ ಬೇಕಾದವನಾಗಿದ್ದು, 2020ರಿಂದ ಕೋರ್ಟ್ನಲ್ಲಿದ್ದ. ಈಗ ಟಿಲ್ಲುವನ್ನು ಹತ್ಯೆ ಮಾಡಿದವರು ಅದೇ ಗೋಗಿ ಗ್ಯಾಂಗ್ನವರು ಎನ್ನಲಾಗಿದೆ.