ದೌಸಾ: ರಾಜಸ್ಥಾನದಲ್ಲಿ ಕಾಂಗ್ರೆಸ್ ನಾಯಕರು, ಆ ಪಕ್ಷದ ವರಿಷ್ಠರ ಪಾಲಿಗೆ ಬಿಸಿತುಪ್ಪದಂತೆ ಆಗಿದ್ದಾರೆ. ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ಮತ್ತು ಪ್ರಭಾವಿ ನಾಯಕ ಸಚಿನ್ ಪೈಲಟ್ ನಡುವಿನ ಮನಸ್ತಾಪ ಹೈಕಮಾಂಡ್ಗೆ ಸದಾ ಬಿಸಿ ಮುಟ್ಟಿಸುತ್ತಲೇ ಇರುತ್ತದೆ..ಮುಜುಗರಕ್ಕೀಡು ಮಾಡುತ್ತಲೇ ಇರುತ್ತದೆ. ಇಲ್ಲಿನ ದೌಸಾದಲ್ಲಿ ನಡೆಯುತ್ತಿರುವ ಭಾರತ್ ಜೋಡೋ ಯಾತ್ರೆ ವೇಳೆಯೂ ಇಂಥದ್ದೇ ಒಂದು ಸನ್ನಿವೇಶ ಎದುರಾಯಿತು.
ಕಾಂಗ್ರೆಸ್ನ ಭಾರತ್ ಜೋಡೋ ಯಾತ್ರೆ ರಾಜಸ್ಥಾನ ತಲುಪಿದ್ದು, ಇಲ್ಲಿ ಕಳೆದ 12 ದಿನಗಳಿಂದ ರಾಹುಲ್ ಗಾಂಧಿ ನೇತೃತ್ವದಲ್ಲಿ ಪಾದಯಾತ್ರೆ ನಡೆಯುತ್ತಿದೆ. ಇಂದು ಬೆಳಗ್ಗೆ ಕಲಾಖೋದಿಂದ ಕಾಲ್ನಡಿಗೆ ಶುರುವಾದ ಕೆಲವೇ ಹೊತ್ತಲ್ಲಿ, ಕಾಂಗ್ರೆಸ್ನ ಒಂದಷ್ಟು ಕಾರ್ಯಕರ್ತರು ರಾಹುಲ್ ಗಾಂಧಿ ಜತೆ ಸೇರಿಕೊಂಡರು. ಅವರು ಸುಮ್ಮನೆ ಪಾದಯಾತ್ರೆ ನಡೆಸದೆ ‘ಸಚಿನ್ ಪೈಲಟ್’ ಪರವಾಗಿ ಘೋಷಣೆ ಕೂಗಲು ಶುರು ಮಾಡಿದರು. ‘ಸಚಿನ್ ಪೈಲಟ್ ಜಿಂದಾಬಾದ್’, ‘ನಮ್ಮ ಮುಖ್ಯಮಂತ್ರಿ ಹೇಗಿರಬೇಕು… ಸಚಿನ್ ಪೈಲಟ್ರಿಂತಿರಬೇಕು’ ಎಂಬ ಘೋಷಣೆಯನ್ನು ದೊಡ್ಡದಾಗಿ, ನಿರಂತರವಾಗಿ ಕೂಗುತ್ತಲೇ ಇದ್ದರು.
ರಾಜಸ್ಥಾನದಲ್ಲಿ ಅಶೋಕ್ ಗೆಹ್ಲೋಟ್ ಮತ್ತು ಸಚಿನ್ ಪೈಲಟ್ ಪರಸ್ಪರ ಬಹಿರಂಗವಾಗಿಯೇ ವಾಗ್ದಾಳಿ ನಡೆಸುತ್ತಿದ್ದಾರೆ. ‘ನಾ ಸಿಎಂ ಹುದ್ದೆ ಬಿಡಲೊಲ್ಲೆ’ ಎನ್ನುತ್ತಿರುವ ಗೆಹ್ಲೋಟ್ಗೆ ‘ನಾನು ಆ ಹುದ್ದೆ ಪಡೆದೇ ತೀರುತ್ತೇನೆ’ ಎಂಬ ಸವಾಲನ್ನು ಪೈಲಟ್ ಪರೋಕ್ಷವಾಗಿಯೇ ಹಾಕುತ್ತ ಬಂದಿದ್ದಾರೆ. ಇವರಿಬ್ಬರ ಮುನಿಸು ಹೈಕಮಾಂಡ್ಗೂ ಕಗ್ಗಂಟಾಗಿ ಪರಿಣಮಿಸಿದೆ. ಕಾಂಗ್ರೆಸ್ ಆಡಳಿತವೇ ಇರುವ ರಾಜಸ್ಥಾನದ ದೌಸಾ ಸಚಿನ್ ಪೈಲಟ್ ಅವರ ಭದ್ರಕೋಟೆ. ಅಲ್ಲಿ ಅವರ ಪ್ರಭಾವ ಬಹಳವಾಗಿದ್ದು, ಅದು ಭಾರತ್ ಜೋಡೋ ಯಾತ್ರೆಯ ವೇಳೆಯೂ ಗೋಚರಿಸಿದೆ. ದೌಸಾದಲ್ಲಿ ಭಾರಿ ಪ್ರಮಾಣದಲ್ಲಿ ಜನರು ಪಾದಯಾತ್ರೆಯಲ್ಲಿ ಪಾಲ್ಗೊಂಡರು. ಇದು ಸಚಿನ್ ಪೈಲಟ್ಗೆ ಅಲ್ಲಿರುವ ಬೆಂಬಲವನ್ನೂ ತೋರಿಸಿದೆ ಮತ್ತು ಸಚಿನ್ ಪೈಲಟ್ ಮುಖ್ಯಮಂತ್ರಿ ಆಗಲೇಬೇಕು ಎಂದು ಅವರು ತಮ್ಮ ಘೋಷಣೆಗಳ ಮೂಲಕ ಆಗ್ರಹಿಸಿದ್ದಾರೆ.!
ಇದನ್ನೂ ಓದಿ: ಭಾರತ್ ಜೋಡೋ ಯಾತ್ರೆಗೆ ಆರ್ಬಿಐ ಮಾಜಿ ಗವರ್ನರ್ ರಘುರಾಮ್ ರಾಜನ್ ಸಾಥ್; ರಾಹುಲ್ ಗಾಂಧಿಯೊಂದಿಗೆ ಕಾಲ್ನಡಿಗೆ