ನವ ದೆಹಲಿ: ಭ್ರಷ್ಟಾಚಾರ ಪ್ರಕರಣದಲ್ಲಿ ಜೈಲು ಸೇರಿರುವ ದೆಹಲಿ ಸಚಿವ ಸತ್ಯೇಂದ್ರ ಜೈನ್ ಅವರ ವಿಡಿಯೊಗಳು ಒಂದರ ಮೇಲೊಂದರಂತೆ ವೈರಲ್ ಆಗುತ್ತಿವೆ. ಜೈಲಿನಲ್ಲಿ ಕೈಕಾಲುಗಳಿಗೆ ಮಸಾಜ್ ಮಾಡಿಸಿಕೊಳ್ಳುತ್ತಿರುವ ವಿಡಿಯೊವೊಂದು ವೈರಲ್ ಆಗಿ, ವಿವಾದ ಸೃಷ್ಟಿಸಿರುವ ಬೆನ್ನಲ್ಲೇ, ಈಗ ಅವರು ಜೈಲಿನಲ್ಲಿ ತಮ್ಮ ಕೋಣೆಯಲ್ಲಿ ಕುಳಿತು ಭರ್ಜರಿ ಭೋಜನ ಸವಿಯುತ್ತಿರುವ ವಿಡಿಯೊ, ಫೋಟೋಗಳು ವೈರಲ್ ಆಗುತ್ತಿವೆ. ಬಗೆಬಗೆಯ ಹಣ್ಣು, ತರಕಾರಿ, ಸಲಾಡ್ ತಿನ್ನುತ್ತಿರುವ ಅವರಿಗೆ, ಮತ್ತೊಬ್ಬ ಬಂದು ಇನ್ನೇನೋ ತಿನಿಸನ್ನು ಕೊಡುವುದನ್ನೂ ವಿಡಿಯೊದಲ್ಲಿ ನೋಡಬಹುದು.
ಪ್ಲಾಸ್ಟಿಕ್ ಬಾಕ್ಸ್ನಲ್ಲಿ ಈ ತಿನಿಸುಗಳಿದ್ದು, ಅವು ಪಾರ್ಸೆಲ್ ಬಂದಿದ್ದು ಎಂಬುದು ಗೊತ್ತಾಗುತ್ತವೆ. ಸಾಮಾನ್ಯವಾಗಿ ಜೈಲುವಾಸಿಗಳಿಗೆ ಹೀಗೆ ಹೊರಗಡೆಯಿಂದ ಪಾರ್ಸೆಲ್ ತರಲು ಅವಕಾಶ ಇಲ್ಲ. ಅವರು ಜೈಲೂಟವನ್ನೇ ತಿನ್ನಬೇಕು. ಆದರೆ ಈ ಸಚಿವರ ಎದುರಿಗೆ ಭರ್ಜರಿ ಊಟವೇ ಇದೆ.
ತನ್ನನ್ನು ಮಾರ್ಚ್ 12ರಂದು ಬಂಧಿಸಿದಾಗಿನಿಂದಲೂ ತಿಹಾರ್ ಜೈಲಿನಲ್ಲಿ ಸರಿಯಾದ ಪ್ರಮಾಣದಲ್ಲಿ ಊಟ ಕೊಡುತ್ತಿಲ್ಲ. ವೈದ್ಯಕೀಯ ಚಿಕಿತ್ಸೆ ಸೌಲಭ್ಯವೂ ಇಲ್ಲ. ಇದರಿಂದಾಗಿ ನಾನು 28 ಕೆಜಿ ತೂಕ ಕಳೆದುಕೊಂಡಿದ್ದೇನೆ ಎಂದು ಸತ್ಯೇಂದ್ರ ಜೈನ್ ಅವರು ವಿಚಾರಣಾ ನ್ಯಾಯಾಲಯಕ್ಕೆ ತಮ್ಮ ವಕೀಲರ ಮೂಲಕ ಮಂಗಳವಾರ ದೂರು ಸಲ್ಲಿಸಿದ್ದರು. ಆದರೆ ಈಗ ವೈರಲ್ ಆಗಿರುವ ವಿಡಿಯೊ ಸೆಪ್ಟೆಂಬರ್ 23ನೇ ತಾರೀಖಿನದಾಗಿದ್ದು, ಅದನ್ನು ನೋಡಿದ ಮೇಲೆ ಬಿಜೆಪಿ ತೀವ್ರ ವಾಗ್ದಾಳಿ ನಡೆಸಿದೆ. ಇಷ್ಟು ಊಟ ಮಾಡಿಯೂ ಜೈನ್ ಸುಳ್ಳು ಹೇಳುತ್ತಿದ್ದಾರೆ ಎಂದು ಟೀಕಿಸಿದೆ.
ಈ ಮಧ್ಯೆ ಸಚಿವರು 28 ಕೆಜಿ ತೂಕನಷ್ಟವಾಗಿಲ್ಲ. ಬದಲಿಗೆ ಅವರ ತೂಕ 8 ಕೆಜಿಗಳಷ್ಟು ಹೆಚ್ಚಾಗಿದೆ ಎಂದು ತಿಹಾರ ಜೈಲು ಮೂಲಗಳು ತಿಳಿಸಿವೆ.
ಇದನ್ನೂ ಓದಿ: ದೆಹಲಿ ಸಚಿವ ಸತ್ಯೇಂದ್ರ ಜೈನ್ಗೆ ಜೈಲಲ್ಲಿ ಮಸಾಜ್ ಮಾಡಿದ್ದು ಥೆರಪಿಸ್ಟ್ ಅಲ್ಲ ರೇಪಿಸ್ಟ್!