ಪಣಜಿ: ಗೋವಾದಲ್ಲಿ ಮೃತಪಟ್ಟಿರುವ ಹರ್ಯಾಣ ಬಿಜೆಪಿ ನಾಯಕಿ, ನಟಿ, ಬಿಗ್ ಬಾಸ್ ಮಾಜಿ ಸ್ಪರ್ಧಿ ಸೋನಾಲಿ ಫೋಗಟ್ ಪೋಸ್ಟ್ ಮಾರ್ಟಮ್ ವರದಿ ಬಹಿರಂಗಗೊಂಡಿದೆ, ‘ಸೋನಾಲಿ ದೇಹದ ಮೇಲೆ ಹಲವು ಗಾಯಗಳಿವೆ. ಆದರೆ ಅವು ಯಾವವೂ ಅಷ್ಟೊಂದು ತೀವ್ರತರನಾದ ಹರಿತ ಗಾಯಗಳಲ್ಲ’ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಪೋಸ್ಟ್ ಮಾರ್ಟಮ್ ರಿಪೋರ್ಟ್ ಬರುವುದಕ್ಕೂ ಮೊದಲು ಹತ್ಯೆ ಪ್ರಕರಣ ದಾಖಲಿಸಿದ್ದ ಗೋವಾ ಪೊಲೀಸರು ಇದೀಗ, ಸೋನಾಲಿ ಫೋಗಟ್ ಬಾಡಿಗಾರ್ಡ್ ಸುಖ್ವಿಂದರ್ ಮತ್ತು ಆಪ್ತ ಸಹಾಯಕ ಸುಧೀರ್ ಸಾಂಗ್ವಾನ್ ವಿರುದ್ಧ ಕೇಸ್ ದಾಖಲು ಮಾಡಿದ್ದಾರೆ.
ಆಗಸ್ಟ್ 22ರಂದು ಸೋನಾಲಿ ಫೋಗಟ್ ಗೋವಾದಲ್ಲಿ ಇದ್ದಾಗ ಸುಧೀರ್ ಸಾಂಗ್ವಾನ್ ಮತ್ತು ಸುಖ್ವಿಂದರ್ ಸಿಂಗ್ ಕೂಡ ಆಕೆಯೊಂದಿಗೇ ಇದ್ದರು. ಸೋನಾಲಿ ಮೃತಪಟ್ಟ ಬೆನ್ನಲ್ಲೇ ಅವರ ಕುಟುಂಬದವರು ಕೂಡ ಈ ಇಬ್ಬರ ಮೇಲೆಯೇ ಅನುಮಾನ ವ್ಯಕ್ತಪಡಿಸಿದ್ದರು. ಸುಖ್ವಿಂದರ್ ಮತ್ತು ಸುಧೀರ್ ಇಬ್ಬರೂ ಸೇರಿ ಸೋನಾಲಿಯನ್ನು ಹತ್ಯೆಗೈದಿದ್ದಾರೆ ಎಂದು ಆಕೆಯ ಸಹೋದರ ರಿಂಕು ಢಾಕಾ ಅಂಜುನಾ ಪೊಲೀಸ್ ಠಾಣೆಯಲ್ಲಿ ದೂರು ಕೊಟ್ಟಿದ್ದರು.
‘ನನ್ನ ಸಹೋದರಿ ತೊಂದರೆಯಲ್ಲಿದ್ದಾಳೆ ಎಂಬುದು ನಮಗೆ ಇತ್ತೀಚೆಗೆ ಅರ್ಥವಾಗಿತ್ತು. ಸುಧೀರ್ ಸಾಂಗ್ವಾನ್ ಮತ್ತು ಸುಖ್ವಿಂದರ್ ಇಬ್ಬರೂ ಹಲವು ದಿನಗಳಿಂದ ಸೋನಾಲಿ ಫೋಗಟ್ ರನ್ನು ಹತ್ಯೆ ಮಾಡಲು ಕಾಯುತ್ತಿದ್ದರು. ಅವರಿಬ್ಬರಿಂದ ದೂರ ಇರುವಂತೆ ನಾವೂ ಸೋನಾಲಿಗೆ ಹೇಳಿದ್ದೆವು. ಅವರೂ ಕೂಡ ತನಗಾಗುತ್ತಿರುವ ತೊಂದರೆಯನ್ನು ಪರೋಕ್ಷವಾಗಿ ಹೇಳಿಕೊಳ್ಳುತ್ತಿದ್ದಳು. ಅವರಿಬ್ಬರ ವಿರುದ್ಧ ಪೊಲೀಸ್ ಕಂಪ್ಲೇಂಟ್ ಕೊಡುವ ತಯಾರಿಯಲ್ಲಿ ಇದ್ದೆವು. ಆದರೆ ಅಷ್ಟರಲ್ಲಾಗಲೇ ಆಕೆಯ ಹತ್ಯೆಯಾಗಿದೆ’ ಎಂದು ರಿಂಕು ಢಾಕಾ ಪೊಲೀಸರಿಗೆ ತಿಳಿಸಿದ್ದರು. ಇನ್ನೊಂದೆಡೆ ಸೋನಾಲಿ ಸಂಬಂಧಿ ಅಮಾನ್ ಪೂನಿಯಾ ಪ್ರತಿಕ್ರಿಯೆ ನೀಡಿ, ‘ಸುಖ್ವಿಂದರ್ ಮತ್ತು ಸುಧೀರ್ ಸೇರಿ ಸೋನಾಲಿಗೆ ಡ್ರಗ್ಸ್ ಕೊಟ್ಟು ಕೊಂದಿದ್ದಾರೆ ಎಂದು ಹೇಳಿದ್ದರು.
ಇದನ್ನೂ ಓದಿ: ಬಿಜೆಪಿ ನಾಯಕಿ ಸೋನಾಲಿ ಫೋಗಟ್ ಸಾವು; ಕೊಲೆ ಪ್ರಕರಣ ದಾಖಲಿಸಿದ ಗೋವಾ ಪೊಲೀಸ್