ತಿರವನಂತಪುರ: ಕೇರಳದಲ್ಲಿ ಇತ್ತೀಚೆಗಷ್ಟೇ ಸಂಚಾರ ಪ್ರಾರಂಭಿಸಿರುವ ವಂದೇ ಭಾರತ್ ರೈಲಿಗೆ (Vande Bharat Express) ಕಿಡಿಗೇಡಿಗಳು ಕಲ್ಲು ಎಸೆದಿದ್ದಾರೆ. ಇದರಿಂದಾಗಿ ಆ ರೈಲಿನ ಒಂದು ಕೋಚ್ನ ಕಿಟಕಿ ಒಡೆದಿದೆ. ತಿರುವನಂತಪುರಂನಿಂದ ಕೇರಳಕ್ಕೆ ಸಂಚಾರ ಮಾಡುವ ಈ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲಿಗೆ ಪ್ರಧಾನಮಂತ್ರಿ ನರೇಂದ್ರ ಮೋದಿ (PM Modi)ಯವರು ಏಪ್ರಿಲ್ 25ರಂದು ಹಸಿರು ನಿಶಾನೆ ತೋರಿಸಿದ್ದರು. ಅದಾಗಿ ಒಂದು ವಾರದಲ್ಲಿ ಕಲ್ಲೇಟು ಬಿದ್ದಿದೆ.
ಸೋಮವಾರ ತಿರುವನಂತಪುರಂನಿಂದ ಕಾಸರಗೋಡಿನತ್ತ ಹೊರಟಿದ್ದ ವಂದೇ ಭಾರತ್ ರೈಲು ಸಂಜೆ 5ಗಂಟೆ ಹೊತ್ತಿಗೆ ಮಲಪ್ಪುರಂನ ತಿರೂರ್ ರೈಲ್ವೆ ಸ್ಟೇಶನ್ ಬಳಿ ಸಂಚಾರ ಮಾಡುತ್ತಿತ್ತು. ಈ ವೇಳೆ ಕಿಡಿಗೇಡಿಗಳು ಕಲ್ಲು ಹೊಡೆದಿದ್ದಾರೆ. ಇದು ಗೊತ್ತಾಗುತ್ತಿದ್ದಂತೆ ಪ್ರಯಾಣಿಕನೊಬ್ಬ ಲೋಕೋ ಪೈಲೆಟ್ ಗಮನಕ್ಕೆ ತಂದಿದ್ದಾನೆ. ಕಲ್ಲು ತೂರಾಟವಾದ ತಕ್ಷಣ ರೈಲನ್ನು ನಿಲ್ಲಿಸದೆ, ಮುಂದೆ ಓಡಿಸಲಾಗಿದೆ. ಸದ್ಯ ಪೊಲೀಸರು ಕೇಸ್ ದಾಖಲಿಸಿಕೊಂಡಿದ್ದಾರೆ. ರೈಲಿಗೆ ಇನ್ನಷ್ಟು ಹೆಚ್ಚಿನ ಭದ್ರತೆ ನೀಡಲು ನಿರ್ಧಾರ ಮಾಡಿದ್ದಾರೆ ದಕ್ಷಿಣ ರೈಲ್ವೆ ಹೇಳಿಕೊಂಡಿದೆ.
ಈ ವಂದೇ ಭಾರತ್ ರೈಲು ಕೊಲ್ಲಂ, ಕೊಟ್ಟಾಯಂ, ಎರ್ನಾಕುಲಂ, ತ್ರಿಶೂರ್, ಪಾಲಕ್ಕಾಡ್, ಪತನಂತಿಟ್ಟ, ಮಲಪ್ಪುರಂ, ಕೊಯಿಕ್ಕೋಡ್ ಮತ್ತು ಕಣ್ಣೂರ್ ಸೇರಿ ಒಟ್ಟು 14 ಜಿಲ್ಲೆಗಳ ನಿಲ್ದಾಣಗಳಲ್ಲಿ ನಿಲುಗಡೆಯಾಗಲಿದೆ. ಆದರೆ ಮಲಪ್ಪುರಂನ ತಿರೂರ್ ರೈಲ್ವೆ ಸ್ಟೇಶನ್ನಲ್ಲಿ ನಿಲ್ಲಿಸುತ್ತಿಲ್ಲ ಎಂದು ಅಲ್ಲಿನವರು ತೀವ್ರ ಪ್ರತಿಭಟನೆ ನಡೆಸುತ್ತಿದ್ದಾರೆ. ರೈಲಿನ ಪ್ರಾಯೋಗಿಕ ಸಂಚಾರದಲ್ಲಿ ತಿರೂರ್ನಲ್ಲಿ ನಿಲುಗಡೆ ಕೊಡಲಾಗಿತ್ತು. ಆಗ ಅಲ್ಲಿನ ಜನರು ನೂತನ ರೈಲನ್ನು ಭವ್ಯವಾಗಿ ಸ್ವಾಗತ ಮಾಡಿದ್ದರು. ಮೊದಲ ದಿನ ತಿರುವನಂತಪುರಂನಿಂದ ಕಾಸರಗೋಡಿಗೆ ಹೋಗುವಾಗಲೂ ರೈಲು ಈ ಸ್ಟೇಶನ್ನಲ್ಲಿ ನಿಂತಿತ್ತು. ಆದರೆ ಈಗ ನಿಲ್ಲಿಸುತ್ತಿಲ್ಲ ಎಂಬುದು ಅಲ್ಲಿನವರ ಆರೋಪ.
ಇದನ್ನೂ ಓದಿ: Vande Bharat Express: ಕೇರಳದಲ್ಲಿ ಇಂದು ವಂದೇ ಭಾರತ್ ರೈಲಿಗೆ ಚಾಲನೆ ನೀಡಿದ ಪ್ರಧಾನಿ ಮೋದಿ; ದೇಶದ 11ನೇ ಟ್ರೇನ್ ಇದು
ವಂದೇ ಭಾರತ್ ರೈಲುಗಳಿಗೆ ಕಲ್ಲು ತೂರುತ್ತಿರುವುದು ಇದೇ ಮೊದಲಲ್ಲ. ಏಪ್ರಿಲ್ 6ರಂದು ವಿಶಾಖಪಟ್ಟಣಂನಲ್ಲಿ ಅಲ್ಲಿನ ವಂದೇ ಭಾರತ್ ರೈಲಿಗೆ ಕಿಡಿಗೇಡಿಗಳು ಕಲ್ಲು ಹೊಡೆದಿದ್ದರು. ಚೆನ್ನೈ-ಮೈಸೂರು-ಬೆಂಗಳೂರು ಮಾರ್ಗದಲ್ಲಿ ಸಂಚರಿಸುವ ವಂದೇ ಭಾರತ್ ರೈಲಿನ ಮೇಲೆ ಕೂಡ ಕಿಡಿಗೇಡಿಗಳು ಕಲ್ಲು ಎಸೆದಿದ್ದರು. ಇದರಿಂದ ರೈಲಿನ ಆರು ಕಿಟಕಿಗಳ ಗಾಜುಗಳು ಒಡೆದಿದ್ದವು.