22 ವರ್ಷ ಹಳೆಯದಾದ ಕೊಲೆ ಕೇಸ್ವೊಂದರಲ್ಲಿ ತನಗೆ ಕೋರ್ಟ್ನಿಂದ ಸಿಕ್ಕಿದ್ದ ಖುಲಾಸೆಯನ್ನು ಮರುಪ್ರಶ್ನಿಸಿ 2004ರಲ್ಲಿ ಉತ್ತರ ಪ್ರದೇಶದಲ್ಲಿ ಇದ್ದ ಸಮಾಜವಾದಿ ಪಕ್ಷದ ಸರ್ಕಾರ ಸುಪ್ರೀಂಕೋರ್ಟ್ಗೆ ಸಲ್ಲಿಸಿದ್ದ ಮೇಲ್ಮನವಿ ಅರ್ಜಿ ವಿಚಾರಣೆಯನ್ನು ಅಲಹಾಬಾದ್ ಹೈಕೋರ್ಟ್ನ ಲಖನೌಪೀಠದಿಂದ ಪ್ರಯಾಗ್ರಾಜ್ ಪೀಠಕ್ಕೆ ವರ್ಗಾಯಿಸಿಕೊಡಬೇಕು ಎಂದು ಕೇಂದ್ರ ಸಚಿವ, ಬಿಜೆಪಿ ನಾಯಕ ಅಜಯ್ ಮಿಶ್ರಾ ತೇನಿ ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂಕೋರ್ಟ್ ತಿರಸ್ಕರಿಸಿದೆ.
ಹೈಕೋರ್ಟ್ನ ಲಖನೌದಲ್ಲಿರುವ ಪೀಠದಲ್ಲಿ ಕೇಸ್ ವಿಚಾರಣೆ ನಡೆಯುತ್ತಿದೆ. ಆದರೆ ನನ್ನ ಪರ ವಾದಿಸುತ್ತಿರುವ ವಕೀಲರು ವಯಸ್ಸಾದವರು. ಅವರು ಅಲಹಾಬಾದ್ನಲ್ಲಿಯೇ ನೆಲೆಸಿದ್ದಾರೆ. ವಾದ ಮಂಡನೆಗಾಗಿ ಲಖನೌಗೆ ತೆರಳಲು ಅವರಿಗೆ ಕಷ್ಟವಾಗುತ್ತಿದೆ. ಹೈಕೋರ್ಟ್ನ ಪ್ರಯಾಗ್ರಾಜ್ ಪೀಠ ಅಲಹಾಬಾದ್ನಲ್ಲೇ ಇದೆ. ಹೀಗಾಗಿ ಪ್ರಯಾಗ್ರಾಜ್ ಪೀಠಕ್ಕೆ ವರ್ಗಾಯಿಸಿಕೊಟ್ಟರೆ ಅನುಕೂಲವಾಗುತ್ತದೆ ಎಂದು ಅಜಯ್ ಮಿಶ್ರಾ ಸುಪ್ರೀಂಕೋರ್ಟ್ಗೆ ಸಲ್ಲಿಸಿದ ಅರ್ಜಿಯಲ್ಲಿ ತಿಳಿಸಿದ್ದರು. ಆದರೆ ಈ ಅರ್ಜಿ ಪರಿಗಣಿಸಲು ಸಾಧ್ಯವಿಲ್ಲ ಎಂದು ಹೇಳಿರುವ ಸುಪ್ರೀಂಕೋರ್ಟ್ನ ಮುಖ್ಯ ನ್ಯಾಯಮೂರ್ತಿ ಯು.ಯು.ಲಲಿತ್ ಮತ್ತು ಬೇಲಾ ಎಂ. ತ್ರಿವೇದಿ ಅವರನ್ನು ಒಳಗೊಂಡ ಪೀಠ, ‘ಹಿರಿಯ ವಕೀಲರ ವಯಸ್ಸಿನ ಕಾರಣ ನೀಡಿ ಅರ್ಜಿ ವರ್ಗಾವಣೆಗೆ ಕೋರಲಾಗಿದೆ. ಅದನ್ನು ನಾವು ಗಂಭೀರವಾಗಿ ತೆಗೆದುಕೊಳ್ಳುವುದಿಲ್ಲ. ನಾವಿದನ್ನು ಹೈಕೋರ್ಟ್ಗೇ ಬಿಡುತ್ತೇವೆ. ಹಿರಿಯ ವಕೀಲರಿಗೆ ಲಖನೌಗೆ ಬರಲು ಕಷ್ಟವಾಗುತ್ತದೆ ಎಂದಾದರೆ, ಅವರು ವಿಡಿಯೊ ಕಾನ್ಫರೆನ್ಸ್ ಮೂಲಕವೇ ವಾದ ಮಂಡನೆ ಮಾಡಬಹುದು. ಅದಕ್ಕೆ ಹೈಕೋರ್ಟ್ ಒಪ್ಪಿಗೂ ಖಂಡಿತ ಇದೆ’ ಎಂದು ಹೇಳಿದೆ.
2000ರಲ್ಲಿ ಪ್ರಭಾತ್ ಗುಪ್ತಾ (24) ಎಂಬ ವಿದ್ಯಾರ್ಥಿ ನಾಯಕನ ಹತ್ಯೆಯಾಗಿತ್ತು. ಈ ಕೇಸ್ನಲ್ಲಿ ಅಜಯ್ ಮಿಶ್ರಾ ಸೇರಿ ಮೂವರ ವಿರುದ್ಧ ಕೇಸ್ ದಾಖಲಾಗಿತ್ತು. ಬಳಿಕ 2004ರಲ್ಲಿ ಲಖಿಂಪುರ ಖೇರಿಯ ಸೆಷನ್ಸ್ ಕೋರ್ಟ್, ಸರಿಯಾದ ಸಾಕ್ಷಿಗಳು ಇಲ್ಲದ ಕಾರಣ ಅಜಯ್ ಮಿಶ್ರಾರನ್ನು ಈ ಕೇಸ್ನಿಂದ ಖುಲಾಸೆಗೊಳಿಸಿತ್ತು. ಆಗ ಯುಪಿಯಲ್ಲಿ ಇದ್ದ ಮುಲಾಯಂ ಸಿಂಗ್ ನೇತೃತ್ವದ ರಾಜ್ಯ ಸರ್ಕಾರ ಖುಲಾಸೆ ತೀರ್ಪು ಪ್ರಶ್ನಿಸಿ ಅಲಹಾಬಾದ್ ಹೈಕೋರ್ಟ್ಗೆ ಮೇಲ್ಮನವಿ ಸಲ್ಲಿಸಿತ್ತು . ಆಗಿನಿಂದಲೂ ಈ ಕೇಸ್ ನಡೆಯುತ್ತಲೇ ಇದೆ. ಒಂದಲ್ಲ ಒಂದು ಕಾರಣಕ್ಕೆ ಅರ್ಜಿ ವಿಚಾರಣೆ, ಅಂತಿಮ ತೀರ್ಪು ಮುಂದೂಡತ್ತಲೇ ಬರಲಾಗುತ್ತಿದೆ. ಇದೀಗ ಅಂತಿಮವಾಗಿ ನವೆಂಬರ್ 10ರಂದು ಹೈಕೋರ್ಟ್ ತೀರ್ಪು ನೀಡಲಿದೆ. ಈ ಮಧ್ಯೆ ಅರ್ಜಿಯನ್ನು ಲಖನೌ ಪೀಠದಿಂದ ಪ್ರಯಾಗ್ ರಾಜ್ ಪೀಠಕ್ಕೆ ವರ್ಗಾಯಿಸಿ ಎಂದು ಅಜಯ್ ಮಿಶ್ರಾ ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದರು. ಅದೀಗ ತಿರಸ್ಕೃತಗೊಂಡಿದೆ.