ತಮಿಳುನಾಡು ಸಂಪುಟ ಪುನರ್ ​ರಚನೆ; ಹಣಕಾಸು ಖಾತೆ ಕಳೆದುಕೊಂಡ ಪಿ.ತಿಯಾಗ​ ರಾಜನ್

ಚೆನ್ನೈ: ತಮಿಳುನಾಡು ಸರ್ಕಾರ ಸಂಪುಟವನ್ನು (Tamil Nadu Cabinet Reshuffle) ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ (Chief Minister MK Stalin) ಅವರು ಪುನರಚನೆ ಮಾಡಿದ್ದು, ಬಹುಮುಖ್ಯವಾಗಿ ಅಲ್ಲಿನ ಹಣಕಾಸು ಸಚಿವರಾಗಿದ್ದ ಪಿ. ತಿಯಾಗ​ ರಾಜನ್ ಅವರಿಂದ ಆ ಖಾತೆಯನ್ನು ವಾಪಸ್ ಪಡೆದು, ತಂಗಮ್​ ತೆನ್ನರಸು ಅವರಿಗೆ ನೀಡಿದ್ದಾರೆ. ತಂಗಮ್​ ತೆನ್ನರಸು ಅವರು ಇಷ್ಟು ದಿನ ಕೈಗಾರಿಕಾ ಸಚಿವಾಲಯದ ಜವಾಬ್ದಾರಿ ಹೊತ್ತಿದ್ದರು. ಪಿ. ತಿಯಾಗ್​ ರಾಜನ್ ಅವರಿಗೆ ಮಾಹಿತಿ-ತಂತ್ರಜ್ಞಾನ ಖಾತೆಯನ್ನು ನೀಡಲಾಗಿದ್ದು, ಕೈಗಾರಿಕಾ ಇಲಾಖೆಗೆ ಡಾ. ಟಿಆರ್​ಬಿ ರಾಜಾ ಅವರು ನೂತನ ಸಚಿವರಾಗಿದ್ದಾರೆ.

ತಮ್ಮಿಂದ ಹಣಕಾಸು ಖಾತೆ ಜವಾಬ್ದಾರಿಯನ್ನು ವಾಪಸ್ ಪಡೆದು, ತಂಗಮ್​ ತೆನ್ನರಸು ಅವರಿಗೆ ವಹಿಸುತ್ತಿದ್ದಂತೆ ಟ್ವೀಟ್ ಮಾಡಿ ಹೇಳಿಕೆ ಬಿಡುಗಡೆ ಮಾಡಿರುವ ತಿಯಾಗ್ ರಾಜನ್ ‘ಎಂ.ಕೆ.ಸ್ಟಾಲಿನ್ ಅವರ ನೇತೃತ್ವದಲ್ಲಿ ನಾನು ನನ್ನ ಹಣಕಾಸು ಸಚಿವಾಲಯದ ಜವಾಬ್ದಾರಿಯನ್ನು ಎರಡು ವರ್ಷ ಅತ್ಯಂತ ಯಶಸ್ವಿಯಾಗಿ ನಿಭಾಯಿಸಿದ್ದೇನೆ. 2021-22ನೇ ಸಾಲಿನಲ್ಲಿ, ಕೊವಿಡ್ ಸಾಂಕ್ರಾಮಿಕದ ಮಧ್ಯೆ ಒಂದು ಪರಿಷ್ಕೃತ ಬಜೆಟ್ ಮಂಡನೆ ಮಾಡಿದ್ದೇನೆ ಮತ್ತು 2022-23, 2023-24ನೇ ಸಾಲಿನ ವಾರ್ಷಿಕ ಬಜೆಟ್​ ಮಂಡಿಸಿದ್ದೇನೆ. ಹಲವು ವರ್ಷಗಳಿಂದಲೂ ಇರುವ ಸಾಲ ಸಮಸ್ಯೆ , ಹಣದ ಕೊರತೆ ಮಧ್ಯೆಯೂ ನಾವು ಹಲವು ಸಾಮಾಜಿಕ ಕಲ್ಯಾಣ ಯೋಜನೆಗಳಲ್ಲಿ ಹಣವನ್ನು ಹೂಡಿಕೆ ಮಾಡಿದ್ದೇವೆ. ಈ ಎಲ್ಲವೂ ನಾನು ಹಣಕಾಸು ಮಂತ್ರಿಯಾಗಿದ್ದಾಗಲೇ ಆಗಿದ್ದು ಖುಷಿ ಕೊಟ್ಟಿದೆ. ನನ್ನ ಪಾಲಿಗೆ ಮಹತ್ವದ ದಿನಗಳು’ ಎಂದು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ: Annamalai : ಅಣ್ಣಾಮಲೈ ವಿರುದ್ಧ ಸಿಎಂ ಸ್ಟಾಲಿನ್‌ ಮಾನನಷ್ಟ ಮೊಕದ್ದಮೆ, ಏನಿದು ಕೇಸ್?

ತಮಿಳುನಾಡಿನಲ್ಲಿ 2021ರಲ್ಲಿ ವಿಧಾನಸಭೆ ಚುನಾವಣೆ ನಡೆದು ಎಂ.ಕೆ.ಸ್ಟಾಲಿನ್ ನೇತೃತ್ವದ ದ್ರಾವಿಡ ಮುನ್ನೇತ್ರ ಕಳಗಂ ಪಕ್ಷ ಗೆದ್ದು ಅಧಿಕಾರ ಹಿಡಿದಿದೆ. ಆಗ ರಚನೆಯಾಗಿದ್ದ ಸಂಪುಟದಲ್ಲಿ ಈ ಎರಡು ವರ್ಷಗಳ ಕಾಲ ಸ್ಟಾಲಿನ್ ಅವರು ಯಾವುದೇ ಬದಲಾವಣೆ ಮಾಡಿರಲಿಲ್ಲ. ಈಗ ಒಟ್ಟು ನಾಲ್ವರು ಸಚಿವರ ಖಾತೆಗಳನ್ನು ಬದಲಾವಣೆ ಮಾಡಿದ್ದಾರೆ.