ರಾಯ್ಪುರ (ಚತ್ತೀಸ್ಗಢ): ಮದುವೆ ದಿನ ಗಿಫ್ಟ್ ರೂಪದಲ್ಲಿ ಬಂದಿದ್ದ ಹೋಮ್ ಥಿಯೇಟರ್ ಪರೀಕ್ಷಿಸುವಾಗ ಸ್ಫೋಟಗೊಂಡು ಮದುಮಗ ಸೇರಿದಂತೆ ಇಬ್ಬರು ಮೃತಪಟ್ಟಿದ್ದಾರೆ. ಘಟನೆ ಕಬೀರ್ಧಾಮ್ ಜಿಲ್ಲೆಯಲ್ಲಿ ನಡೆದಿದ್ದು, ಈ ಪ್ರದೇಶ ಮಾವೊವಾದಿಗಳ ತಾಣವಾಗಿರುವ ಕಾರಣ ಘಟನೆ ಹೆಚ್ಚು ಅತಂಕ ಮೂಡಿಸಿದೆ. ಉದ್ದೇಶಪೂರ್ವಕವಾಗಿ ಕೃತ್ಯ ಎಸಗಿಸಬಹುದು ಎಂಬ ಅನುಮಾನ ಮೂಡಿದೆ.
ಏಪ್ರಿಲ್ 1ರಂದು 22ವರ್ಷದ ಹೇಮೇಂದ್ರ ಮೇರಾವಿ ಎಂಬುವರ ವಿವಾಹವಾಗಿತ್ತು. ಅಂದು ಅವರಿಗೆ ಹಲವು ಗಿಫ್ಟ್ಗಳ ಜತೆ ಮ್ಯೂಸಿಕ್ ಸಿಸ್ಟಮ್ ಕೂಡ ಬಂದಿತ್ತು. ಏಪ್ರಿಲ್ 3ರಂದು ಅವುಗಳನ್ನು ಬಿಚ್ಚಿ ನೋಡುತ್ತಿದ್ದರು. ಈ ವೇಳೆ ತಮಗೆ ದೊರೆತ ಮ್ಯೂಸಿಕ್ ಸಿಸ್ಟಮ್ ಅನ್ನು ಪ್ಲಗ್ಗೆ ಚುಚ್ಚಿ ಹಾಡು ಪ್ಲೇ ಮಾಡಲು ಯತ್ನಿಸಿದ್ದಾರೆ. ಸ್ವಿಚ್ ಆನ್ ಅದ ತಕ್ಷಣ ಮ್ಯೂಸಿಕ್ ಸಿಸ್ಟಮ್ ಬಲವಾಗಿ ಸ್ಫೋಟಗೊಂಡಿದೆ. ಘಟನೆಯಲ್ಲಿ ಹೇಮೇಂದ್ರ ಹಾಗೂ ಆತನ ಅಣ್ಣ ರಾಜ್ಕುಮಾರ್ (30) ಎಂಬುವರೂ ಮೃತಪಟ್ಟಿದ್ದಾರೆ. ಅದೇ ರೀತಿ ಒಂದೂವರೆ ವರ್ಷದ ಬಾಲಕ ಸೇರಿದಂತೆ ನಾಲ್ಕು ಮಂದಿಗೆ ಗಾಯವಾಗಿದೆ. ಅವರೆಲ್ಲರವನ್ನು ಕೌರಾ ಜಿಲ್ಲೆಯ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಜಿಲ್ಲಾ ಪೊಲೀಸ್ ಅಧಿಕಾರಿ ಮನೀಶ್ ಠಾಕೂರ್ ತಿಳಿಸಿದ್ದಾರೆ.
ಇದನ್ನೂ ಓದಿ : Road Accident: ಚಲಿಸುತ್ತಿದ್ದಾಗಲೇ ಟಯರ್‌ ಸ್ಫೋಟ; ಕಾರು ಪಲ್ಟಿಯಾಗಿ ನಾಲ್ವರ ಸ್ಥಿತಿ ಗಂಭೀರ
ಘಟನೆ ಬಳಿಕ ಮದುವೆ ಖುಷಿಯಲ್ಲಿದ್ದ ಕುಟುಂಬದಲ್ಲಿ ಸೂತಕದ ಛಾಯೆ ಮೂಡಿದೆ. ಪೊಲೀಸರು ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸುತ್ತಿದ್ದಾರೆ.
ಚಾವಣಿ ಹಾರಿ ಹೋಗಿತ್ತು
ಹೋಮ್ ಥಿಯೇಟರ್ ಸ್ಫೋಟಗೊಂಡ ತೀವ್ರತೆಗೆ ಮನೆಯಲ್ಲಿರುವ ವಸ್ತುಗಳೆಲ್ಲವೂ ಛಿದ್ರಗೊಂಡಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಅದೇ ರೀತಿ ಕೊಠಡಿಯ ಚಾವಣಿ ಕೂಡ ಕುಸಿದು ಹೋಗಿದೆ ಎಂದು ಪ್ರತ್ಯಕ್ಷದರ್ಶಿಗಳು ಮಾಹಿತಿ ನೀಡಿದ್ದಾರೆ.
ಸ್ಫೋಟಗೊಂಡ ಹೋಮ್ ಥೀಯೇಟರ್ ಒಳಗೆ ಗನ್ಪೌಡರ್ ಇತ್ತು ಎಂಬುದಾಗಿ ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ. ಸ್ಫೋಟದ ಸದ್ದು ಬಾಂಬ್ನಂತೆಯೇ ಇತ್ತು ಹಾಗೂ ಅಷ್ಟೇ ತೀವ್ರತೆ ಹೊಂದಿತ್ತು ಎಂಬುದಾಗಿ ಅವರು ಹೇಳಿದ್ದಾರೆ. ಘಟನೆ ನಡೆದಿರುವ ಸ್ಥಳವು ರಾಯ್ಪುರಕ್ಕಿಂತ 200 ಕಿಲೋ ಮೀಟರ್ ದೂರದಲ್ಲಿರುವ ನಕ್ಸಲ್ ಪೀಡಿತ ಪ್ರದೇಶದಲ್ಲಿ ಆಗಿರುವ ಕಾರಣ ಉದ್ದೇಶಪೂರ್ವಕ ಕೃತ್ಯ ಇರಲೂಬಹುದು ಎಂದು ಅಂದಾಜಿಸಲಾಗಿದೆ.
ಪೊಲೀಸರು ಈ ಬಗ್ಗೆ ಯಾವುದೇ ಮಾಹಿತಿ ಬಿಡುಗಡೆ ಮಾಡಿಲ್ಲ. ಆದರೆ ಪ್ರಾಥಮಿಕ ಮಾಹಿತಿ ಪ್ರಕಾರ ಗನ್ ಪೌಡರ್ ಸೇರಿದಂತೆ ಯಾವುದೇ ಸ್ಫೋಟಕ ವಸ್ತುಗಳು ಲಭಿಸಿಲ್ಲ ಎಂದು ಹೇಳಿದ್ದಾರೆ.