ಸ್ಕಾರ್ಪೀನ್ ವರ್ಗದ ಐದನೇ ಜಲಾಂತರ್ಗಾಮಿ ‘ವಾಗಿರ್’ ನೌಕೆಯನ್ನು ಭಾರತೀಯ ನೌಕಾಪಡೆ ಜನವರಿ 23ರಿಂದ ಕಾರ್ಯಾರಂಭ ಮಾಡಲಿದೆ. ಭಾರತೀಯ ನೌಕಾ ಯೋಜನೆ-75ಯಡಿ, ದೇಶೀಯವಾಗಿ ನಿರ್ಮಿಸಲಾದ ಈ ಜಲಾಂತರ್ಗಾಮಿ, ಸುಭಾಷ್ ಚಂದ್ರ ಬೋಸ್ ಜನ್ಮದಿನದಂದೇ ಅಂದರೆ ‘ಪರಾಕ್ರಮ ದಿವಸ್’ ದಂದು ನೌಕಾಪಡೆಗೆ ನಿಯೋಜನೆಗೊಳ್ಳುತ್ತಿರುವುದು ವಿಶೇಷ.
ಫ್ರೆಂಚ್ ಸಹಯೋಗದಲ್ಲಿ, ಮುಂಬಯಿಯ ಮಝಗಾಂವ್ ಡಾಕ್ ಶಿಪ್ಬ್ಯುಲ್ಡರ್ಸ್ ಲಿಮಿಟೆಡ್ ತಯಾರಿಸಿರುವ ಸ್ಕಾರ್ಪೀನ್ ದರ್ಜೆಯ ಈ ವಾಗಿರ್ನ್ನು ನೌಕಾಪಡೆಗೆ ನಿಯೋಜನೆಗೊಳಿಸುವ ಕಾರ್ಯಕ್ರಮ ಜನವರಿ 23ರಂದು ಮುಂಬಯಿಯ ನೇವಲ್ ಡಾಕ್ಯಾರ್ಡ್ನಲ್ಲಿ ನಡೆಯಲಿದ್ದು, ಅಂದಿನ ಕಾರ್ಯಕ್ರಮದಲ್ಲಿ ನೌಕಾಪಡೆ ಮುಖ್ಯಸ್ಥ ಅಡ್ಮಿರಲ್ ಆರ್. ಹರಿ ಕುಮಾರ್ ಅವರು ಮುಖ್ಯ ಅತಿಥಿಗಳಾಗಿ ಪಾಲ್ಗೊಳ್ಳುವರು.
ಇನ್ನು ಸ್ಕಾರ್ಪೀನ್ ವರ್ಗದ ನಾಲ್ಕು ಜಲಾಂತರ್ಗಾಮಿಗಳು ಈಗಾಗಲೇ ನೌಕಾಪಡೆಯನ್ನು ಸೇರಿವೆ. ಅದರಲ್ಲಿ ಮೊಟ್ಟಮೊದಲನೆಯದು ಐಎನ್ಎಸ್ ಕಲ್ವಾರಿ. ಇದು 2015ರ ಅಕ್ಟೋಬರ್ 27ರಂದು ಲೋಕಾರ್ಪಣೆಗೊಂಡು, 2017ರ ಡಿಸೆಂಬರ್ 14ರಿಂದ ಸೇವೆ ಆರಂಭ ಮಾಡಿದೆ. ಹಾಗೇ, ಎರಡನೇಯದು ಐಎನ್ಎಸ್ ಖಾಂಡೇರಿ. ಇದು ಲೋಕಾರ್ಪಣೆಗೊಂಡಿದ್ದು 2017ರ ಜನವರಿ 12ಕ್ಕೆ. ಕಾರ್ಯಾರಂಭ ಮಾಡಿದ್ದು 2019ರ ಸೆಪ್ಟೆಂಬರ್ 28ರಂದು. ಬಳಿಕ ಐಎನ್ಎಸ್ ಕಾರಂಜ್ ಜಲಾಂತರ್ಗಾಮಿ 2018ರಂದು ಉದ್ಘಾಟನೆಗೊಂಡಿತು. ಬಳಿಕ 2021ರ ಮಾರ್ಚ್ 10ರಿಂದ ಕಾರ್ಯಾರಂಭ ಮಾಡಿತು. ಹಾಗೇ ನಾಲ್ಕನೇ ಜಲಾಂತರ್ಗಾಮಿ ನೌಕೆ ಐಎನ್ಎಸ್ ವೇಲಾ 2019ರ ಮೇ ತಿಂಗಳಲ್ಲಿ ಲೋಕಾರ್ಪಣೆಗೊಂಡು, 2021ರ ನವೆಂಬರ್ನಿಂದ ನೌಕಾಪಡೆಯಲ್ಲಿ ಸೇವೆ ಸಲ್ಲಿಸುತ್ತಿದೆ. ಇದೀಗ ನೌಕಾಪಡೆಗೆ ನಿಯೋಜನೆಗೊಳ್ಳುತ್ತಿರುವ ವಾಗಿರ್ ಲೋಕಾರ್ಪಣೆಗೊಂಡಿದ್ದು 2020ರ ನವೆಂಬರ್ 12ರಂದು. ಜನವರಿ 23ರಿಂದ ಸೇವೆ ಆರಂಭಿಸುತ್ತಿದೆ.
ವಾಗಿರ್ ಮೊಟ್ಟಮೊದಲಿಗೆ 2022ರ ಫೆಬ್ರವರಿಯಲ್ಲಿ ಸಮುದ್ರದಲ್ಲಿ ವಿಹಾರ ನಡೆಸಿತು. ಅದಾದ ಬಳಿಕ ಇಲ್ಲಿಯವರೆಗೆ ಸರಣಿ ವಿಹಾರ ನಡೆಸಿ, ಪ್ರಾಯೋಗಿಕ ಸಂಚಾರ ಮಾಡಿದೆ. ಈ ಜಲಾಂತರ್ಗಾಮಿಯನ್ನು ಸ್ಯಾಂಡ್ ಶಾರ್ಕ್ ಎಂದೂ ಕರೆಯಲಾಗುತ್ತದೆ. ‘ರಹಸ್ಯ ಮತ್ತು ನಿರ್ಭಯತೆ’ಯನ್ನು ಬಿಂಬಿಸುವ ಜಲಾಂತರ್ಗಾಮಿ ಈ ವಾಗಿರ್ ಎಂದು ಕೇಂದ್ರ ಸರ್ಕಾರ ಹೇಳಿದೆ.
ಇದನ್ನೂ ಓದಿ: Army Salute | ಭೂಸೇನೆ, ನೌಕಾಪಡೆ, ವಾಯುಸೇನೆಗಳು ಯಾಕೆ ಬೇರೆ ಬೇರೆ ಸೆಲ್ಯೂಟ್ ಹೊಂದಿವೆ?