ನವ ದೆಹಲಿ: ವಂದೇ ಭಾರತ್ ರೈಲು ಸಂಚಾರವನ್ನು ದೇಶದೆಲ್ಲೆಡೆ ವಿಸ್ತರಿಸಲಾಗುತ್ತಿದೆ. ಇತ್ತೀಚೆಗಷ್ಟೇ, ಅಂದರೆ ಡಿಸೆಂಬರ್ 11ರಂದು ಪ್ರಧಾನಿ ನರೇಂದ್ರ ಮೋದಿಯವರು ಮಹಾರಾಷ್ಟ್ರದ ನಾಗ್ಪುರ ಮತ್ತು ಛತ್ತೀಸ್ಗಢ್ನ ಬಿಲಾಸ್ಪುರ ನಡುವಿನ ವಂದೇ ಭಾರತ್ ರೈಲು ಸಂಚಾರಕ್ಕೆ ಚಾಲನೆ ನೀಡಿದ್ದಾರೆ. ದೇಶದಲ್ಲಿಯೇ ಅತ್ಯಂತ ವೇಗವಾಗಿ ಚಲಿಸುವ ರೈಲುಗಳು ಎನಿಸಿಕೊಂಡ ವಂದೇ ಭಾರತ್ ರೈಲುಗಳನ್ನು ಮುಂದಿನ ದಿನಗಳಲ್ಲಿ ಇನ್ನಷ್ಟು ಮಾರ್ಗಗಳಿಗೆ ವಿಸ್ತರಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ.
ಈ ಮಧ್ಯೆ ವಂದೇ ಭಾರತ್ ರೈಲಿನದ್ದು ಎನ್ನಲಾದ ವಿಡಿಯೊವೊಂದು ವೈರಲ್ ಆಗಿತ್ತು. ರೈಲಿನಲ್ಲಿರುವ ಏರ್ ಕಂಡಿಷನರ್ನ ಕಿಂಡಿಗಳಿಂದ ಕಾರಂಜಿಯಂತೆ ನೀರು ಸುರಿದು, ಅದು ಪ್ರಯಾಣಿಕರ ಬೆಡ್ ಮೇಲೆ ಚೆಲ್ಲುವ ದೃಶ್ಯವನ್ನು ವಿಡಿಯೊದಲ್ಲಿ ನೋಡಬಹುದು. ಪ್ರಯಾಣಿಕರ ಲಗೇಜ್ಗಳೆಲ್ಲ ನೀರಿನಲ್ಲಿ ಸಂಪೂರ್ಣ ನೆನೆದು ಹೋಗಿದ್ದೂ ಕಾಣುತ್ತದೆ. ‘ಇದು ರೈಲಿನ ಬಾತ್ ರೂಮಿನಿಂದ ಬರುತ್ತಿರುವ ನೀರು. ಪ್ರಯಾಣಿಕರಿಗೆ ತುಂಬ ಕಿರಿಕಿರಿ ಆಗುತ್ತಿದೆ. ಇದನ್ನು ಟಿಟಿ ಪರಿಶೀಲನೆ ಮಾಡಿದ್ದಾರೆ. ಆದರೆ ಯಾವುದೇ ಮೆಕ್ಯಾನಿಕ್ನನ್ನು ಕರೆಸಿ, ರಿಪೇರಿ ಮಾಡಿಸಿಲ್ಲ’ ಎಂದು ಈ ವಿಡಿಯೊ ರೆಕಾರ್ಡ್ ಮಾಡಿದಾತ ಹೇಳುವುದೂ ಕೇಳಿಸುತ್ತದೆ. ಇದು ವಂದೇ ಭಾರತ್ ರೈಲಿನ ದುಃಸ್ಥಿತಿ ಎಂದೇ ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೊ ವೈರಲ್ ಆಗುತ್ತಿದೆ.
ನಿಜಕ್ಕೂ ವಂದೇ ಭಾರತ್ ರೈಲಿನಲ್ಲಿ ಈ ಪರಿಸ್ಥಿತಿಯಾ?
ಆಧುನಿಕ ವ್ಯವಸ್ಥೆಗಳನ್ನೊಳಗೊಂಡ ವಂದೇ ಭಾರತ್ ರೈಲಿನಲ್ಲಿ ನಿಜಕ್ಕೂ ಇಂಥ ಸನ್ನಿವೇಶ ಇದೆಯಾ ಎಂದು ಇಂಟರ್ನೆಟ್ನಲ್ಲಿ ಭಾರಿ ಚರ್ಚೆಯಾಗುತ್ತಿರುವ ಬೆನ್ನಲ್ಲೇ ‘ಇದು ವಂದೇ ಭಾರತ್ ರೈಲಿನ ಅವ್ಯವಸ್ಥೆಯಲ್ಲ’ ಎಂಬ ವಿಷಯ ಬೆಳಕಿಗೆ ಬಂದಿದೆ. ಈ ವಿಡಿಯೊ ಈಗಿನದ್ದಲ್ಲ, 2019ರದ್ದು ಮತ್ತು ಬೆಂಗಳೂರು-ಪಾಟ್ನಾ ಸಂಘಮಿತ್ರ ಎಕ್ಸ್ಪ್ರೆಸ್ ರೈಲಿನಲ್ಲಿ ಚಿತ್ರೀಕರಿಸಲಾಗಿದ್ದ ವಿಡಿಯೊ ಎಂಬುದು ಇಂಡಿಯಾ ಟುಡೆ ಮಾಧ್ಯಮ ನಡೆಸಿದ ಫ್ಯಾಕ್ಟ್ಚೆಕ್ (ಸತ್ಯ ಶೋಧನೆ)ನಲ್ಲಿ ದೃಢಪಟ್ಟಿದೆ.
2019ರ ಜೂನ್ನಲ್ಲಿ ಸುಯಜ್ಞ ಕಾಶಿ ಎಂಬುವರು ತಮ್ಮ ಟ್ವಿಟರ್ ಅಕೌಂಟ್ನಲ್ಲಿ ಈ ವಿಡಿಯೊ ಶೇರ್ ಮಾಡಿದ್ದರು. ಅದರ ಕ್ಯಾಪ್ಷನ್ನಲ್ಲಿ ಅವರು ‘ಸಂಘಮಿತ್ರ ಎಕ್ಸ್ಪ್ರೆಸ್ನ ಕೋಚ್ 1’ ರ ದುಃಸ್ಥಿತಿ ಎಂದೇ ಬರೆದುಕೊಂಡಿದ್ದಾರೆ. ಅದಾದ ಬಳಿಕ 2019ರ ಜುಲೈ 2ರಂದು ಇಂಡಿಯನ್ ಎಕ್ಸ್ಪ್ರೆಸ್ ಈ ವಿಷಯ ವರದಿ ಮಾಡಿತ್ತು. ಇನ್ನೂ ಕೆಲವು ಮಾಧ್ಯಮಗಳೂ ವಿಡಿಯೊ-ಸುದ್ದಿಯನ್ನು ಪಬ್ಲಿಶ್ ಮಾಡಿದ್ದವು. ಹಾಗೇ, ರೈಲಿನಲ್ಲಿ ಈ ಸಮಸ್ಯೆ ಕಂಡುಬಂದ ಕೆಲವೇ ಹೊತ್ತಲ್ಲಿ, ಅದನ್ನು ದುರಸ್ತಿ ಕೂಡ ಮಾಡಲಾಗಿದೆ ಎಂದೂ ವರದಿಯಲ್ಲಿ ಉಲ್ಲೇಖಿಸಿದ್ದವು. ಹೀಗಾಗಿ ಅದು ವಂದೇ ಭಾರತ್ ರೈಲಿನದ್ದು ಅಲ್ಲ ಎಂಬುದು ಸ್ಪಷ್ಟವಾಗಿದೆ ಎಂದು ಇಂಡಿಯಾ ಟುಡೆ ಹೇಳಿದೆ.
ಇದನ್ನೂ ಓದಿ: Vande Bharat | ದೇಶದ 6ನೇ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲು ಸಂಚಾರ ಪ್ರಾರಂಭ; ಲೋಕಾರ್ಪಣೆಗೊಳಿಸಿದ ಪ್ರಧಾನಿ ಮೋದಿ