ಪಶ್ಚಿಮ ಬಂಗಾಳ ಪಂಚಾಯಿತಿ ಚುನಾವಣೆ ಮತ ಎಣಿಕೆ: ಮುನ್ನುಗ್ಗುತ್ತಿರುವ ಟಿಎಂಸಿ ಹಿಂದೆ ಬಿಜೆಪಿ, ಬಾಂಬ್​ ಸ್ಫೋಟ

ಸಂಘರ್ಷ, ರಕ್ತದ ಮಧ್ಯೆಯೇ ನಡೆದಿದ್ದ ಪಶ್ಚಿಮ ಬಂಗಾಳ ಪಂಚಾಯಿತಿ ಚುನಾವಣೆ ಫಲಿತಾಂಶ ( West Bengal Panchayat Polls Results) ಇಂದು ಹೊರಬೀಳಲಿದೆ. ಬೆಳಗ್ಗೆ 8ಗಂಟೆಯಿಂದ ಬಿಗಿ ಭದ್ರತೆ ಮಧ್ಯೆ ಮತ ಎಣಿಕೆ ಕಾರ್ಯ ( ಭರದಿಂದ ಸಾಗುತ್ತಿದೆ. ಜುಲೈ 8ರಂದು ಚುನಾವಣೆ ದಿನ ರಾಜ್ಯಾದ್ಯಂತ ಅನೇಕ ಕಡೆಗಳಲ್ಲಿ ಹಿಂಸಾಚಾರ, ಗಲಾಟೆ (West Bengal Violence) ನಡೆದಿತ್ತು. ಎಲ್ಲೆಲ್ಲೂ ಗುಂಡು-ಬಾಂಬ್​​ಗಳ ಶಬ್ದವೇ ಕೇಳುತ್ತಿತ್ತು. ಅಂದು ನಡೆದಿದ್ದ ಹಿಂಸಾಚಾರದಲ್ಲಿ ಒಟ್ಟು 18 ಮಂದಿ ಮೃತಪಟ್ಟಿದ್ದರು. ಜು.8ರಂದು 61,636 ಮತಗಟ್ಟೆಗಳಲ್ಲಿ ಮತದಾನ ನಡೆದಿತ್ತು. ಆದರೆ ಅವ್ಯವಸ್ಥೆ-ಸಂಘರ್ಷ ಮಿತಿಮೀರಿ ನಡೆದಿದ್ದ 697 ಬೂತ್​​ಗಳಲ್ಲಿ ಜು.10ರಂದು ಮರು ಮತದಾನವಾಗಿತ್ತು (West Bengal Panchayat Election Result).

ಈ ಎರಡೂ ಹಂತದ ಮತದಾನದ ಮತ ಎಣಿಕೆ ಇಂದು ನಡೆಯುತ್ತಿದ್ದು, ಸದ್ಯ ತೃಣಮೂಲ ಕಾಂಗ್ರೆಸ್​ 1629 ಕ್ಷೇತ್ರಗಳಲ್ಲಿ, ಬಿಜೆಪಿ 364 ಪಂಚಾಯಿತಿಗಳಲ್ಲಿ, ಸಿಪಿಐ (ಎಂ) 362 ಮತ್ತು ಕಾಂಗ್ರೆಸ್ 118 ಪಂಚಾಯಿತಿಗಳಲ್ಲಿ ಮುನ್ನಡೆ ಸಾಧಿಸಿದೆ. ಇಲ್ಲಿ ಒಟ್ಟು 73,887 ಪಂಚಾಯಿತಿ ಸೀಟ್​ಗಳಿದ್ದು, 2.06 ಲಕ್ಷ ಅಭ್ಯರ್ಥಿಗಳು ಸ್ಪರ್ಧಿಸಿದ್ದರು. 5.67 ಕೋಟಿ ಜನರು ಮತಚಲಾಯಿಸಿದ್ದರು. 2018ರ ಚುನಾವಣೆಯಲ್ಲಿ ತೃಣಮೂಲ ಕಾಂಗ್ರೆಸ್​ ಶೇ.95ರಷ್ಟು ಪಂಚಾಯಿತಿ ಕ್ಷೇತ್ರಗಳನ್ನು ಗೆದ್ದಿಕೊಂಡಿತ್ತು. ಅದರಲ್ಲೂ ಶೇ.34ಪಂಚಾಯಿತಿಗಳಲ್ಲಿ ಅವಿರೋಧವಾಗಿ ಗೆದ್ದಿತ್ತು. ಟಿಎಂಸಿ ಅಭ್ಯರ್ಥಿಗಳ ಎದುರು ಬೇರೆ ಪಕ್ಷದ ಅಭ್ಯರ್ಥಿಗಳೇ ಇರಲಿಲ್ಲ. ಆದರೆ ಈ ಸಲ ಬಿಜೆಪಿ, ಕಾಂಗ್ರೆಸ್, ಸಿಪಿಐ (ಎಂ) ಪಕ್ಷಗಳು ತೀವ್ರ ಸ್ಪರ್ಧೆಯೊಡ್ಡಿವೆ.

ಇದನ್ನೂ ಓದಿ: West Bengal Election: 42 ಸಾವು‌, ಹಿಂಸಾಚಾರ ಕಂಡ ಪಶ್ಚಿಮ ಬಂಗಾಳದ ಪಂಚಾಯತ್ ಚುನಾವಣೆ ಫಲಿತಾಂಶ ಇಂದು

ಇಂದೂ ಅಲ್ಲಲ್ಲಿ ಗಲಾಟೆ

ಪಶ್ಚಿಮ ಬಂಗಾಳ ಪಂಚಾಯಿತಿ ಚುನಾವಣೆ ಮತ ಎಣಿಕೆ ದಿನವಾದ ಇಂದೂ ಕೂಡ ಹಲವು ಕಡೆಗಳಲ್ಲಿ ಗಲಾಟೆ, ಗಲಭೆ ನಡೆಯುತ್ತಿದೆ. ಡೈಮೆಂಡ್ ಹಾರ್ಬರ್​​ನಲ್ಲಿರುವ ಮತ ಎಣಿಕೆ ಕೇಂದ್ರದ ಹೊರಗೆ ದೊಡ್ಡದಾದ ಗುಂಪೊಂದು ಸೇರಿ ಪ್ರತಿಭಟನೆ ನಡೆಸುತ್ತಿದೆ. ಅಲ್ಲಿ ಯಾವುದೇ ಸರ್ಕಾರಿ ವಾಹನ ಸಂಚಾರ ಮಾಡಲು ಬಿಡುತ್ತಿಲ್ಲ. ಬಂದ ವಾಹನಗಳನ್ನೆಲ್ಲ ಪ್ರತಿಭಟನಾಕಾರರು ತಡೆಯುತ್ತಿದ್ದಾರೆ. ಕಚ್ಚಾ ಬಾಂಬ್​ ಸ್ಫೋಟವಾಗಿದೆ. ಹಾಗೇ, ಕೂಚ್​ ಬೆಹಾರ್​​ನಲ್ಲಿ ಟಿಎಂಸಿ ಅಭ್ಯರ್ಥಿ ರಿಕು ರಾಯ್​ ರಾಜ್​ಭರ್ ಅವರು ಮತಪತ್ರಗಳನ್ನು ಹರಿದಿದ್ದಾರೆ, ಅದರ ಮೇಲೆಲ್ಲ ಮಸಿ ಚೆಲ್ಲಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಕೂಚ್​ ಬೆಹಾರ್​​ನಲ್ಲಿ ಕೇವಲ ಎರಡು ಪಂಚಾಯಿತಿ ಕ್ಷೇತ್ರಗಳಲ್ಲಿ ಮಾತ್ರ ಟಿಎಂಸಿ ಮುನ್ನಡೆ ಸಾಧಿಸಿದ್ದಕ್ಕೆ ಅವರು ಹೀಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಬಿಜೆಪಿ ಇಲ್ಲಿ 98 ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿದೆ. ಸದ್ಯ ರಿಕು ಅವರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.