ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಇಂದು 72ನೇ ವರ್ಷದ ಹುಟ್ಟಿದ ಹಬ್ಬ (Modi Birthday) ಆಚರಣೆ ಮಾಡಿಕೊಳ್ಳುತ್ತಿದ್ದಾರೆ. ನಿನ್ನೆ ಶುಕ್ರವಾರ (ಸೆ.16) ಅವರು ಉಜ್ಬೇಕಿಸ್ತಾನ್ದ ಸಮರ್ಕಂಡ್ನಲ್ಲಿ ಇದ್ದರು. ಅಲ್ಲಿ ನಡೆದ ಶಾಂಘೈ ಸಹಕಾರ ಸಂಘಟನೆ ಶೃಂಗಸಭೆ (SCO)ದಲ್ಲಿ ಭಾಗವಹಿಸಿದ್ದರು. ಈ ಶೃಂಗಸಭೆಯಲ್ಲಿ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್, ಚೀನಾ ಅಧ್ಯಕ್ಷ ಷಿ ಜಿನ್ಪಿಂಗ್, ಇರಾನ್ ನೂತನ ಅಧ್ಯಕ್ಷ ಇಬ್ರಾಹಿಂ ರೈಸಿ, ಉಜ್ಬೆಕಿಸ್ತಾನದ ಅಧ್ಯಕ್ಷ ಶೌಕತ್ ಮಿರಿಝಿಯೊಯೆವ್ ಮತ್ತಿತರ ಗಣ್ಯರು ಪಾಲ್ಗೊಂಡು ಪರಸ್ಪರ ದ್ವಿಪಕ್ಷೀಯ ಮಾತುಕತೆಗಳೆಲ್ಲ ನಡೆದವು.
ಶುಕ್ರವಾರ (ಸೆ.16) ಈ ಶಾಂಘೈ ಸಹಕಾರ ಸಂಘಟನೆ ಶೃಂಗಸಭೆಯಲ್ಲಿ ಪಾಲ್ಗೊಂಡ ಜಾಗತಿಕ ನಾಯಕರು, ಪ್ರಮುಖರೆಲ್ಲ ಪ್ರಧಾನಿ ನರೇಂದ್ರ ಮೋದಿಗೆ ಮುಂಚಿತವಾಗಿ ಹುಟ್ಟುಹಬ್ಬದ ಶುಭಾಶಯ ಕೋರಿದರು. ಸೆ.17ರಂದು ಪ್ರಧಾನಿ ಹುಟ್ಟುಹಬ್ಬವಿದ್ದರೂ, ಇಂದೇ ಎದುರಿಗೇ ಸಿಕ್ಕಿದ್ದಾರಲ್ಲ, ಶುಭ ಹಾರೈಸೋಣ ಎಂದು ಎಲ್ಲರೂ ಮೋದಿಯವರ ಕೈಕುಲುಕಿ ‘ಹ್ಯಾಪಿ ಬರ್ತ್ ಡೇ’ ಹೇಳಿದ್ದರು. ಆದರೆ ಉಳಿದವರೆಲ್ಲ ವಿಶ್ ಮಾಡಿದ್ದರೂ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮಾತ್ರ ಪ್ರಧಾನಿ ಮೋದಿಗೆ ಸೆ.16ರಂದು ಹುಟ್ಟುಹಬ್ಬದ ಶುಭಾಶಯ ತಿಳಿಸಿರಲಿಲ್ಲ. ಈ ಬಗ್ಗೆ ಅದಾಗಲೇ ಚರ್ಚೆ ಪ್ರಾರಂಭವಾಗಿತ್ತು.
ಪ್ರಧಾನಿ ನರೇಂದ್ರ ಮೋದಿ ಎಂದರೆ ಪುಟಿನ್ಗೆ ವಿಶೇಷ ಗೌರವ ಇದೆ. ಉತ್ತಮ ಸ್ನೇಹವೂ ಇದೆ. ಹಾಗಿದ್ದಾಗ್ಯೂ ಶೃಂಗಸಭೆಯಲ್ಲಿ ಉಳಿದೆಲ್ಲ ನಾಯಕರೂ ಮೋದಿಗೆ ಮುಂಚಿತವಾಗಿಯೇ ಹುಟ್ಟುಹಬ್ಬದ ವಿಶ್ ಮಾಡಿದರೂ ಇವರ್ಯಾಕೆ ಮಾಡಲಿಲ್ಲ ಎಂಬ ಪ್ರಶ್ನೆಗೆ ನಂತರ ಪುಟಿನ್ ಉತ್ತರಿಸಿದ್ದಾರೆ. ‘ಪ್ರಧಾನಿ ಮೋದಿ ನನ್ನ ಅತ್ಯುತ್ತಮ ಸ್ನೇಹಿತ. ನನಗೆ ಗೊತ್ತಿದೆ ಸೆಪ್ಟೆಂಬರ್ 17ಕ್ಕೆ ಅವರ ಹುಟ್ಟಿದ ಹಬ್ಬವಿದೆ ಎಂಬುದು. ಆದರೆ ಉಳಿದವರಂತೆ ನಾನು ಮುಂಚಿತವಾಗಿ ವಿಶ್ ಮಾಡಲಾರೆ. ಯಾಕೆಂದರೆ ನಮ್ಮ ರಷ್ಯಾ ಸಂಸ್ಕೃತಿಯ ಪ್ರಕಾರ ಜನ್ಮದಿನದ ವಿಶ್ನ್ನು ನಾವು ಮೊದಲ ದಿನವಾಗಲಿ, ಮುಂಚಿತವಾಗಲೀ ಮಾಡುವಂತಿಲ್ಲ. ಹಾಗಾಗಿ ಭಾರತಕ್ಕೆ ಒಳ್ಳೆಯದಾಗಲಿ, ಮೋದಿಗೆ ಒಳ್ಳೆಯದಾಗಲಿ ಎಂದಷ್ಟೇ ಹಾರೈಸಿದೆ’ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Modi Birthday | ಮೋದಿ ಬರ್ತ್ ಡೇ ದಿನ ಹುಟ್ಟುವ ಮಕ್ಕಳಿಗೆ ಚಿನ್ನದ ಉಂಗುರ ನೀಡಲಿದೆ ತಮಿಳುನಾಡು ಬಿಜೆಪಿ