ಲಖನೌ: ಉತ್ತರ ಪ್ರದೇಶದ ಗ್ಯಾಂಗ್ಸ್ಟರ್ ಅತೀಕ್ ಅಹ್ಮದ್ (Atiq Ahmed Murder) ಮತ್ತು ಆತನ ಸಹೋದರ ಅಶ್ರಫ್ ಅಹ್ಮದ್ನ ಹತ್ಯೆ ಕೇಸ್ನ್ನು ವಿಚಾರಣೆ ನಡೆಸುತ್ತಿರುವ ಸುಪ್ರೀಂಕೋರ್ಟ್ (Supreme Court) ‘ಅತೀಕ್ ಅಹ್ಮದ್ ಮತ್ತು ಅಶ್ರಾಫ್ನನ್ನು ಯಾಕೆ ಆಸ್ಪತ್ರೆ ಬಾಗಿಲಿನವರೆಗೂ ಆ್ಯಂಬುಲೆನ್ಸ್ನಲ್ಲಿ ಕರೆದೊಯ್ಯಲಾಗಿಲ್ಲ? ಪೊಲೀಸ್ ವಾಹನವನ್ನು ಆಸ್ಪತ್ರೆಯ ಗೇಟ್ಗಿಂತಲೂ ಸ್ವಲ್ಪ ದೂರ ನಿಲ್ಲಿಸಿ, ಅಲ್ಲಿಂದ ಯಾಕೆ ನಡೆಸಿಕೊಂಡು ಹೋಗಲಾಯಿತು?‘ ಎಂದು ಉತ್ತರ ಪ್ರದೇಶ ಸರ್ಕಾರವನ್ನು ಪ್ರಶ್ನಿಸಿದೆ. ಹಾಗೇ, ಈ ಬಗ್ಗೆ ಇನ್ನು ಮೂರು ವಾರದಲ್ಲಿ ವರದಿ ನೀಡುವಂತೆ ಸೂಚಿಸಿದೆ. ಅಷ್ಟೇ ಅಲ್ಲ ‘ಅತೀಕ್ ಅಹ್ಮದ್ ಮತ್ತು ಅಶ್ರಾಫ್ ಹತ್ಯೆಯನ್ನು ನಾವು ಟಿವಿಯಲ್ಲಿ ನೋಡಿದ್ದೇವೆ. ಆ ಶೂಟರ್ಗಳಿಗೆ ಅದೇ ದಿನ ಅತೀಕ್ ಮತ್ತು ಅಶ್ರಾಫ್ನನ್ನು ಆಸ್ಪತ್ರೆಗೆ ಕರೆದೊಯ್ಯುತ್ತಾರೆ ಎಂಬುದು ಹೇಗೆ ಗೊತ್ತಾಯಿತು?’ ಎಂದೂ ನ್ಯಾಯಾಧೀಶರು ಪ್ರಶ್ನೆ ಮಾಡಿದ್ದಾರೆ.
ಬಿಎಸ್ಪಿ ಶಾಸಕ ರಾಜು ಪಾಲ್ ಹತ್ಯೆಯ ಆರೋಪಿಗಳಾದ ಗ್ಯಾಂಗ್ಸ್ಟರ್/ರಾಜಕಾರಣಿ ಅತೀಕ್ ಅಹ್ಮದ್ ಮತ್ತು ಆತನ ತಮ್ಮ ಅಶ್ರಾಫ್ ಅಹ್ಮದ್ನ ಹತ್ಯೆಯ ಬೆನ್ನಲ್ಲೇ ವಕೀಲ ವಿಶಾಲ್ ತಿವಾರಿ ಎಂಬುವರು ಸುಪ್ರೀಂಕೋರ್ಟ್ಗೆ ಮನವಿ ಸಲ್ಲಿಸಿದ್ದರು. 2017ರಿಂದ ಉತ್ತರ ಪ್ರದೇಶದಲ್ಲಿ 183 ಎನ್ಕೌಂಟರ್ಗಳಾಗಿವೆ. ಈ ಎನ್ಕೌಂಟರ್ಗಳ ಸತ್ಯಾಸತ್ಯತೆ ಬಗ್ಗೆ ತನಿಖೆಯಾಗಬೇಕು ಎಂದು ಅವರು ಆಗ್ರಹಿಸಿದ್ದರು. ಹಾಗೇ, ಇತ್ತೀಚೆಗೆ ನಡೆದ ಅತೀಕ್ ಅಹ್ಮದ್ ಮತ್ತು ಅಶ್ರಾಫ್ ಅಹ್ಮದ್ ಹತ್ಯೆ, ಅದಕ್ಕೂ ಮೊದಲು ನಡೆದ ಅತೀಕ್ ಪುತ್ರ ಅಸಾದ್ ಅಹ್ಮದ್ ಎನ್ಕೌಂಟರ್ನ್ನು ತನಿಖೆ ನಡೆಸುವಂತೆಯೂ ಅರ್ಜಿಯಲ್ಲಿ ಉಲ್ಲೇಖ ಮಾಡಿದ್ದರು. ಒಟ್ಟಾರೆ ಎನ್ಕೌಂಟರ್ಗಳ ಬಗ್ಗೆ ತನಿಖೆ ನಡೆಸಲು ಸುಪ್ರೀಂಕೋರ್ಟ್ ನಿವೃತ್ತ ನ್ಯಾಯಮೂರ್ತಿ ನೇತೃತ್ವದ ಸಮಿತಿ ರಚಿಸಬೇಕು ಎಂದೂ ಬೇಡಿಕೆಯಿಟ್ಟಿದ್ದಾರೆ. ಈ ಅರ್ಜಿಯ ವಿಚಾರಣೆಯನ್ನು ನ್ಯಾಯಮೂರ್ತಿಗಳಾದ ಎಸ್.ರವೀಂದ್ರ ಭಟ್ ಮತ್ತು ದೀಪಾಂಕರ್ ದತ್ತಾ ಕೈಗೆತ್ತಿಕೊಂಡಿದ್ದಾರೆ.
ಇದನ್ನೂ ಓದಿ: Atiq Ahmad : ಅತೀಕ್ ಅಹ್ಮದ್ ಪರ ಘೋಷಣೆ ಕೂಗುವವರಿಗೆ ಕಂಡಲ್ಲಿ ಗುಂಡಿಕ್ಕಬೇಕು ಎಂದು ಖಂಡಿಸಿದ ಕೇಂದ್ರ ಸಚಿವ
ಇಂದು ನ್ಯಾಯಾಲಯದಲ್ಲಿ ಉತ್ತರಿಸಿದ ಉತ್ತರ ಪ್ರದೇಶ ಸರ್ಕಾರ ‘ಅತೀಕ್ ಮತ್ತು ಅಶ್ರಾಫ್ ಹತ್ಯೆ ಕೇಸ್ ತನಿಖೆ ನಡೆಸಲು ನ್ಯಾಯಾಂಗ ಆಯೋಗವನ್ನು ರಚಿಸಲಾಗಿದೆ. ಆದರೂ ಅರ್ಜಿದಾರರು ತನಿಖಾ ಆಯೋಗ ರಚಿಸಬೇಕು ಎಂದು ಆಗ್ರಹಿಸುತ್ತಿದ್ದಾರೆ. ಸರ್ಕಾರವನ್ನೇ ಅನುಮಾನಿಸುತ್ತಿದ್ದಾರೆ. ಕೋರ್ಟ್ನ ಆದೇಶದಂತೆ ಅತೀಕ್ ಅಹ್ಮದ್ ಮತ್ತು ಅಶ್ರಫ್ನನ್ನು ಎರಡು ದಿನಗಳಿಗೆ ಒಮ್ಮೆ ವೈದ್ಯಕೀಯ ತಪಾಸಣೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಲಾಗುತ್ತಿತ್ತು. ಈ ವಿಷಯ ಮಾಧ್ಯಮದವರಿಗೆ ಗೊತ್ತೇ ಇದೆ. ಅತೀಕ್ ಮತ್ತು ಅವನ ಇಡೀ ಕುಟುಂಬದವರು ಕಳೆದ 30ವರ್ಷಗಳಿಂದಲೂ ಹಲವು ಕ್ರೈಂಗಳನ್ನು ನಡೆಸಿದ್ದಾರೆ. ಆದರೂ ಅವರಿಬ್ಬರು ಹತ್ಯೆಗೀಡಾಗಿದ್ದು ದುರಂತ. ಶೂಟರ್ಗಳನ್ನು ನಾವೀಗಾಗಲೇ ಬಂಧಿಸಿದ್ದೇವೆ’ ಎಂದು ಉತ್ತರ ಪ್ರದೇಶ ಸರ್ಕಾರದ ಪರ ವಕೀಲ ಮುಕುಲ್ ರೋಹಟಗಿ ಕೋರ್ಟ್ನಲ್ಲಿ ವಾದಿಸಿದ್ದಾರೆ.