ಕೋಲ್ಕತ್ತ: ಧರ್ಮತಲಾದಲ್ಲಿ ದುರ್ಗಾಪೂಜೆ ಪೂರ್ವ ತಯಾರಿ ಜೋರಾಗಿ ನಡೆಯುತ್ತಿದೆ. ರಸ್ತೆಗಳ ಮೇಲೆ ಎಲ್ಲೆಲ್ಲೂ ಜನಸಂದಣಿ, ವಾಹನಗಳ ಸಂಚಾರ. ಇದೆಲ್ಲದರ ಮಧ್ಯೆ ಧರ್ಮತಲದ ವಿಕ್ಟೋರಿಯಾ ಹೌಸ್ನ ಚೌರಿಂಗ್ಘೀ ಚೌಕದ ಬಳಿ ಮಹಿಳೆಯೊಬ್ಬರು ಫೂಟ್ಪಾತ್ ಮೇಲೆಯೇ ಮಗುವಿಗೆ ಜನ್ಮ ನೀಡಿದ್ದಾರೆ. ಹೆರಿಗೆ ನೋವಿನಿಂದ, ನಡೆಯಲು ಸಾಧ್ಯವಾಗದೆ ರಸ್ತೆ ಪಕ್ಕದಲ್ಲಿ ಮಲಗಿದ್ದ ಮಹಿಳೆ ರಾಣಿ (35) ಸಹಾಯಕ್ಕೆ ಬಂದಿದ್ದು ಪೊಲೀಸರು ಮತ್ತು ಅಲ್ಲೇ ಇದ್ದ ಕೆಲವು ರಸ್ತೆ ಬದಿ ವ್ಯಾಪಾರಿಗಳು. ಫೂಟ್ಪಾತ್ ಮೇಲೆ ಬಿದ್ದು ನರಳುತ್ತಿದ್ದ ಮಹಿಳೆಯನ್ನು ನೋಡಿಕೊಂಡು ಅನೇಕರು ಓಡಾಡಿದ್ದು ಬಿಟ್ಟರೆ, ಯಾರೂ ಅವರ ನೆರವಿಗೆ ಬರಲಿಲ್ಲ.
ಹೀಗೆ ಮಹಿಳೆ ಫೂಟ್ಪಾತ್ ಮೇಲೆ ಬಿದ್ದು ಹೆರಿಗೆ ನೋವಿನಿಂದ ನರಳಾಡುತ್ತಿರುವುದನ್ನು ನೋಡಿದ ಯಾರೋ ಸ್ಥಳೀಯ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಲಗುಬಗೆಯಿಂದ ಬಂದ ಮಹಿಳಾ ಪೊಲೀಸರು ಆಕೆಯ ನೆರವಿಗೆ ನಿಂತರು. ಆ್ಯಂಬುಲೆನ್ಸ್ಗೆ ಕರೆಯನ್ನೂ ಮಾಡಲಾಗಿತ್ತು. ಆದರೆ ಆ್ಯಂಬುಲೆನ್ಸ್ ಬರುವಷ್ಟರಲ್ಲಿ ಮಹಿಳೆ ಅಲ್ಲೇ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದರು. ನಂತರ ತಾಯಿ-ಮಗು ಇಬ್ಬರನ್ನೂ ಸಮೀಪದ ಎನ್ಆರ್ಎಸ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಹಾಗೇ, ಮಹಿಳಾ ಪೊಲೀಸರು ಈ ತಾಯಿ-ಮಗುವಿನ ಜವಾಬ್ದಾರಿಯನ್ನು ಒಂದು ಶಿಶುಪಾಲನಾ ಎನ್ಜಿಒಕ್ಕೆ ಕೊಟ್ಟಿದ್ದರು. ಇವರಿಬ್ಬರ ಔಷಧಿ ಖರ್ಚಿಗಾಗಿ 500 ರೂಪಾಯಿ ನೀಡಿದ್ದರು.
ಆದರೆ ಆಸ್ಪತ್ರೆ ಕೂಡ ಮಹಿಳೆ ಮತ್ತು ಮಗುವಿಗೆ ಉಚಿತ ಚಿಕಿತ್ಸೆ ನೀಡಲು ಮುಂದಾಗಿದೆ. ಎನ್ಜಿಒ ಆಗಲೀ, ಪೊಲೀಸರಾಗಲೀ ಹಣ ಕೊಡುವುದು ಬೇಡ ಎಂದು ವೈದ್ಯರು ಹೇಳಿದ್ದಾರೆ. ಮುಂದಿನ ಮೂರ್ನಾಲ್ಕು ವಾರದವರೆಗೆ ನಮ್ಮ ಠಾಣೆಯ ಮಹಿಳಾ ಪೊಲೀಸರು ಆ ತಾಯಿ-ಮಗುವಿನ ಜವಾಬ್ದಾರಿ ತೆಗೆದುಕೊಳ್ಳುತ್ತಾರೆ ಎಂದು ಸ್ಥಳೀಯ ಎಎಸ್ಪಿ ಅಲೋಕ್ ಸಾನ್ಯಾಲ್ ತಿಳಿಸಿದ್ದಾರೆ.
ಇದನ್ನೂ ಓದಿ: ದಶಕದ ನಂತರ ದೇಶದಲ್ಲಿ ಪೋಲಿಯೋ ವೈರಸ್‌ ಪತ್ತೆ : ಕೋಲ್ಕತ್ತಾದಲ್ಲಿ ಹೈ ಅಲರ್ಟ್