ಬೆಂಗಳೂರು: ಕಿಚ್ಚ ಸುದೀಪ್ ಹುಟ್ಟುಹಬ್ಬಕ್ಕೆ ಅವರ ಅಭಿಮಾನಿಗಳು ಭರ್ಜರಿ ತಯಾರಿಯನ್ನೇ ಮಾಡಿಕೊಂಡಿದ್ದು, ಈ ಬಾರಿ ಬಹಳ ವಿಶೇಷವಾಗಿ ಆಚರಿಸಲಾಗುತ್ತಿದೆ. ಏಕೆಂದರೆ ಅತ್ತ ವಿಕ್ರಾಂತ್‌ ರೋಣ ಸಿನಿಮಾ ಬ್ಲಾಕ್‌ ಬಸ್ಟರ್‌ ಹಿಟ್‌ ಆಗಿದ್ದರೆ, ಮತ್ತೊಂದು ಕಡೆ ಕಿಚ್ಚ ಸುದೀಪ್ ಹುಟ್ಟುಹಬ್ಬಕ್ಕೆ (Sudeep birthday) ಉಡುಗೊರೆಯ ಮೇಲೆ ಉಡುಗೊರೆ ಸಿಗುತ್ತಿದೆ. ಇದೀಗ ಅಂತಹದ್ದೇ ಮತ್ತೊಂದು ಸ್ಪೆಷಲ್‌ ಗಿಫ್ಟ್ ಸಿಕ್ಕಿದ್ದು, ನಟ ಕಿಚ್ಚ ಸುದೀಪ್ ದೂರದ ಒಡಿಶಾ ಕಡಲ ತೀರದಲ್ಲಿ ಮಿಂಚುತ್ತಿದ್ದಾರೆ.
ಕರುನಾಡಿನಾದ್ಯಂತ ಸುದೀಪ್ ಅವರ ಹುಟ್ಟುಹಬ್ಬವನ್ನು ಸಂಭ್ರಮದಿಂದ ಆಚರಿಸಲು ಅಭಿಮಾನಿಗಳು ಸಜ್ಜಾಗುತ್ತಿದ್ದಾರೆ. ಮತ್ತೊಂದು ಕಡೆ ದೂರದ ಒಡಿಶಾ ಕಡಲ ತೀರ ಸುದೀಪ್ ಹುಟ್ಟುಹಬ್ಬಕ್ಕೆ ಶುಭಾಶಯ ಕೋರಿದೆ. ಹೆಸರಾಂತ ಮರಳುಶಿಲ್ಪಿ ಮಾನಸ್ ಕುಮಾರ್ ನಟ ಸುದೀಪ್ ಅವರ ಕಲಾಕೃತಿಯನ್ನು ಮರಳಿನಲ್ಲಿ ಮೂಡಿಸಿದ್ದಾರೆ. ಇದು ಸುದೀಪ್ ಹುಟ್ಟುಹಬ್ಬಕ್ಕೆ ಅಭಿಮಾನಿಗಳಿಗೆ ಸಿಗುತ್ತಿರುವ ಮತ್ತೊಂದು ಉಡುಗೊರೆಯಾಗಿದೆ.
7 ಅಡಿ ಎತ್ತರ..!
ಮರಳಿನಲ್ಲಿ ಅರಳಿರುವ ನಟ ಕಿಚ್ಚ ಸುದೀಪ್ ಎಲ್ಲರ ಗಮನ ಸೆಳೆಯುತ್ತಿದ್ದಾರೆ. ಪ್ರಮುಖ ಸಂಗತಿ ಏನೆಂದರೆ ಮರಳುಶಿಲ್ಪಿ ಮಾನಸ್ ಕುಮಾರ್ ಅವರು ಕಲಾಕೃತಿಯಲ್ಲಿ ‘ಕನ್ನಡವೇ ನಮ್ಮಮ್ಮ’ ಎಂಬ ಪದವನ್ನೂ ಕೆತ್ತಿ ಕನ್ನಡ ಪ್ರೇಮ ಮೆರಿದಿದ್ದಾರೆ. ಕಲಾಕೃತಿ 20 ಅಡಿ ಅಗಲ, 7 ಅಡಿ ಎತ್ತರವಿದೆ. ಈ ಕಲಾಕೃತಿಗಾಗಿ ಸುಮಾರು 20 ಟನ್‌ನಷ್ಟು ಮರಳು ಬಳಸಲಾಗಿದೆ ಎಂದು ಶಿಲ್ಪಿ ತಿಳಿಸಿದ್ದಾರೆ. ಸುದೀಪ್‌ರ ಆಪ್ತ ವೀರಕಪುತ್ರ ಶ್ರೀನಿವಾಸ್‌ ಮರಳುಶಿಲ್ಪಿ ಮಾನಸ್ ಕುಮಾರ್ ಅವರಿಗೆ ಈ ಕಾರ್ಯದಲ್ಲಿ ನೆರವಾಗಿದ್ದರು.
ಈಗಾಗಲೇ ಅಂಚೆ ಇಲಾಖೆ ಕೂಡ ಸುದೀಪ್ ಅವರ ಹುಟ್ಟುಹಬ್ಬಕ್ಕೆ ಒಂದು ಉಡುಗೊರೆ ನೀಡಿದೆ. ಮತ್ತೊಂದು ಕಡೆ ವಿಕ್ರಾಂತ್‌ ರೋಣ ಒಟಿಟಿಗೆ ಎಂಟ್ರಿ ಕೊಡುತ್ತಿದೆ. ಇದರ ಜೊತೆಗೆ ಸುದೀಪ್ ಅವರ ಮರಳು ಕಲಾಕೃತಿ ಬರ್ತ್‌ ಡೇ ಸೆಲೆಬ್ರೇಷನ್‌ಗೆ ಮತ್ತಷ್ಟು ಮೆರಗು ತಂದಿದ್ದು, ಅಭಿಮಾನಿಗಳು ಫುಲ್‌ ಖುಷ್‌ ಆಗಿದ್ದಾರೆ. ಇನ್ನು ದಕ್ಷಿಣ ಭಾರತದಲ್ಲಿ ಮರಳು ಕಲಾಕೃತಿಯ ಗೌರವಕ್ಕೆ ಪಾತ್ರವಾಗುತ್ತಿರುವ 2ನೇ ಕಲಾವಿದ ನಟ ಸುದೀಪ್ ಅವರು. ಈ ಹಿಂದೆ 2020ರಲ್ಲಿ ಡಾ.ವಿಷ್ಣುವರ್ಧನ್ ಅವರ 70ನೇ ಜನ್ಮದಿನದ ಪ್ರಯುಕ್ತ ಮರಳು ಕಲಾಕೃತಿಯ ಮೂಲಕ ಗೌರವ ಸಲ್ಲಿಸಲಾಗಿತ್ತು.
ಇದನ್ನೂ ಓದಿ: Kichcha Sudeep | ಕಿಚ್ಚ ಸುದೀಪ್ ಬರ್ತ್‌ ಡೇಗೆ ಅಂಚೆ ಇಲಾಖೆಯಿಂದ ಸ್ಪೆಷಲ್‌ ಗಿಫ್ಟ್!