ಹೋಬರ್ಟ್: ಐಸಿಸಿ ಟಿ20 ವಿಶ್ವ ಕಪ್ (T20 World Cup) 2022 ಕೂಟದ ಮೊದಲ ಸುತ್ತಿನ ಪಂದ್ಯಗಳು ಮುಗಿದಿದ್ದು, ಜಿಂಬಾಬ್ವೆ ತಂಡ ಸ್ಕಾಟ್ಲೆಂಡ್ ವಿರುದ್ಧ ಐದು ವಿಕೆಟ್ ಅಂತರದ ಗೆಲುವು ಸಾಧಿಸಿ ಕೊನೆಯ ತಂಡವಾಗಿ ಸೂಪರ್ 12 ಹಂತಕ್ಕೆ ಅರ್ಹತೆ ಪಡೆದಿದೆ.
ಬೆಲ್ಲೆರಿವ್ ಓವಲ್ ಮೈದಾನದಲ್ಲಿ ಶುಕ್ರವಾರ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಸ್ಕಾಟ್ಲೆಂಡ್ ನಿಗದಿತ 20 ಓವರ್ ಗಳಲ್ಲಿ ಆರು ವಿಕೆಟ್ ನಷ್ಟಕ್ಕೆ 132 ರನ್ ಗಳಿಸಿತು. ಬಳಿಕ ಗುರಿ ಬೆನ್ನಟ್ಟಿದ ಜಿಂಬಾಬ್ವೆ 18.3 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 133 ರನ್ ಗಳಿಸಿ ಗೆಲುವಿನ ನಗೆ ಬೀರಿತು. ಚೇಸಿಂಗ್ ವೇಳೆ ಜಿಂಬಾಬ್ವೆ ಆರಂಭದಲ್ಲೇ 7ರನ್ಗೆ ಎರಡು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಆದರೆ ನಾಯಕ ಇರ್ವಿನ್ ಮತ್ತು ಸಿಕಂದರ್ ರಾಜ ತಾಳ್ಮೆಯ ಆಟವಾಡಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಕ್ರೇಗ್ ಇರ್ವಿನ್ 58 ರನ್ ಗಳಿಸಿದರೆ, ರಾಜ ಕೇವಲ 23 ಎಸೆತಗಳಲ್ಲಿ 40 ರನ್ ಬಾರಿಸಿದರು.
ಸ್ಕಾಟ್ಲೆಂಟ್ ಪರ ಆರಂಭಿಕ ಆಟಗಾರ ಮುನ್ಸೆ 54 ರನ್, ಮೆಕ್ ಲಾಯ್ಡ್ 25 ರನ್ ಗಳಿಸಿದರು. ಜಿಂಬಾಬ್ವೆ ಪರ ಚತಾರ ಮತ್ತು ರಿಚರ್ಡ್ ನಗರ್ವಾ ತಲಾ ಎರಡು ವಿಕೆಟ್ ಕಿತ್ತು ಮಿಂಚಿದರು.
ಸ್ಕೋರ್ ವಿವರ:
ಸ್ಕಾಟ್ಲೆಂಡ್: 20 ಓವರ್ಗಳಲ್ಲಿ 6 ವಿಕೆಟ್ಗೆ 132 (ಮುನ್ಸೆ 54, ಮೆಕ್ ಲಾಯ್ಡ್ 25, ಚತಾರ 14ಕ್ಕೆ2, ಎನ್ ನಗರ್ವಾ 28ಕ್ಕೆ 2).
ಜಿಂಬಾಬ್ಬೆ: 18.3 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 133 ( ಕ್ರೇಗ್ ಇರ್ವಿನ್ 58, ಸಿಕಂದರ್ ರಜಾ 40, ಜೋಶ್ ಡೇವಿ 16ಕ್ಕೆ2). ಪಂದ್ಯಶ್ರೇಷ್ಠ: ಸಿಕಂದರ್ ರಜಾ
ಇದನ್ನೂ ಓದಿ | T20 World Cup | ಪಾಕ್ ಆಟಗಾರ ಶಾನ್ ಮಸೂದ್ ತಲೆಗೆ ಚೆಂಡು ಬಡಿದು ಆಸ್ಪತ್ರೆಗೆ ದಾಖಲು; ವಿಶ್ವ ಕಪ್ಗೆ ಅನುಮಾನ