ಬೆಂಗಳೂರು : ದಕ್ಷಿಣ ಆಫ್ರಿಕಾದ ಕ್ರಿಕೆಟಿಗ ಎಬಿಡಿ ವಿಲಿಯರ್ಸ್‌ ಹಾಗೂ ಕಿಂಗ್‌ ಕೊಹ್ಲಿ ಕುಚಿಕು ದೋಸ್ತ್‌ಗಳು. ಐಪಿಎಲ್‌ನ ಆರ್‌ಸಿಬಿ ತಂಡದ ಮೂಲಕ ಪರಿಚಿತರಾಗಿರುವ ಅವರು ಈಗ ಜೀವದ ಗೆಳೆಯರಾಗಿಬಿಟ್ಟಿದ್ದಾರೆ. ಅಫಘಾನಿಸ್ತಾನ ತಂಡದ ವಿರುದ್ಧ ವಿರಾಟ್ ಕೊಹ್ಲಿ ಗುರುವಾರ ಶತಕ ಬಾರಿಸಿದಾಗ ಅತಿ ಹೆಚ್ಚು ಸಂಭ್ರಮಿಸಿದವರಲ್ಲಿ ಎಬಿಡಿ ವಿಲಿಯರ್ಸ್‌ ಕೂಡ ಒಬ್ಬರು. ಶತಕ ಬಾರಿಸಿದ ತಕ್ಷಣ ಸತತವಾಗಿ ಎರಡು ಟ್ವೀಟ್‌ ಮಾಡಿ ಹರ್ಷ ವ್ಯಕ್ತಪಡಿಸಿದ ಅವರು ಗೆಳೆಯ ಫಾರ್ಮ್‌ಗೆ ಮರಳಿದ್ದನ್ನು ಖುಷಿಯಿಂದ ಹೇಳಿಕೊಂಡಿದ್ದರು. ಮುಂದುವರಿದ ಅವರೀಗ ಶತಕದ ಸಾಧನೆ ಮಾಡಿದ ಕೊಹ್ಲಿಗೆ ವಿಶೇಷ ಫೋಟೊವನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಆ ಚಿತ್ರ ನೋಡಿದ ವಿರಾಟ್ ಪತ್ನಿ ಅನುಷ್ಕಾ ಶರ್ಮ ಅವಕ್ಕಾಗಿದ್ದಾರೆ.
ವಿರಾಟ್ ಕೊಹ್ಲಿ ಹಾಗೂ ಎಬಿಡಿ ವಿಲಿಯರ್ಸ್‌ ರೆಟ್ರೊ ಸ್ಟೈಲ್‌ನಲ್ಲಿ ಫೋಟೊ ಒಂದನ್ನು ತೆಗೆಸಿಕೊಂಡಿದ್ದರು. ಅದರಲ್ಲಿ ತ್ರಿಚಕ್ರದ ಹಳೆ ರೆಟ್ರೊ ಸ್ಕೂಟರ್‌ನಲ್ಲಿ ವಿಲಿಯರ್ಸ್‌ ಮೇಲೆ ಕುಳಿತಿದ್ದರೆ, ವಿರಾಟ್ ಕೊಹ್ಲಿ ಕೆಳಗೆ ಕುಳಿತಿದ್ದಾರೆ. ಸುಂದರವಾಗಿರುವ ಆ ಚಿತ್ರವನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್‌ ಮಾಡಿರುವ ಎಬಿಡಿ, “”ಉತ್ತಮ ಪ್ರದರ್ಶನ ನೀಡಿದ ಗೆಳೆಯನಿಗೆ ಈ ಚಿತ್ರವನ್ನು ಶೇರ್‌ ಮಾಡುವ ಮೂಲಕ ಅಭಿನಂದಿಸುವೆ. ಇಂಥ ಇನಿಂಗ್ಸ್‌ಗಳೂ ಇನ್ನೂ ಬರಲಿ,” ಎಂದು ಬರೆದುಕೊಂಡಿದ್ದಾರೆ.
ಚಿತ್ರ ನೋಡಿದ ವಿರಾಟ್ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮ, ಅಯ್ಯೊ ದೇವರೇ ಎಂದು ಪ್ರತಿಕ್ರಿಯೆ ಕೊಟ್ಟಿದ್ದಾರೆ. ವಿರಾಟ್ ಕೊಹ್ಲಿ, ಹೃದಯದ ಚಿತ್ರಗಳನ್ನು ಪ್ರತಿಯಾಗಿ ಪೋಸ್ಟ್‌ ಮಾಡಿದ್ದಾರೆ. ಈ ಚಿತ್ರಕ್ಕೆ ಯಜ್ವೇಂದ್ರ ಚಹಲ್ ಸೇರಿದಂತೆ ಹಲವು ಕ್ರಿಕೆಟಿಗರ ಪ್ರತಿಕ್ರಿಯೆ ಕೊಟ್ಟಿದ್ದಾರೆ. ಒಟ್ಟಾರೆ ೧೮ ಲಕ್ಷ ಮಂದಿ ಎಬಿಡಿ ವಿಲಿಯರ್ಸ್‌ ಅವರ ಪೋಸ್ಟ್‌ಗೆ ಪ್ರತಿಕ್ರಿಯೆ ಕೊಟ್ಟಿದ್ದಾರೆ.
ಇದನ್ನೂ ಓದಿ | Virat kohli | ವಿರಾಟ್ ಕೊಹ್ಲಿಗೆ ಸ್ಮರಣೀಯವಾಗಲಿದೆ ದುಬೈ ಪಿಚ್‌, ಇಲ್ಲಿದೆ ನೋಡಿ ಕಾರಣಗಳು