ನವದೆಹಲಿ: ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಅಫಘಾನಿಸ್ತಾನ(Afghanistan vs Sri Lanka) ತಂಡ ತೋರುತ್ತಿರುವ ಶ್ರೇಷ್ಠ ಪ್ರದರ್ಶನದ ಬಗ್ಗೆ ಹಲವು ಕ್ರಿಕೆಟ್ ಪಂಡಿತರು ಇದೇ ವಿಚಾರದಲ್ಲಿ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ಈ ಸಾಲಿಗೆ ಟೀಮ್ ಇಂಡಿಯಾದ ಮಾಜಿ ಡ್ಯಾಶಿಂಗ್ ಓಪನರ್ ವೀರೇಂದ್ರ ಸೆಹವಾಗ್(Virender Sehwag) ಕೂಡ ಸೇರ್ಪಡೆಯಾಗಿದ್ದಾರೆ.
ಸೋಮವಾರದ ಪಂದ್ಯದಲ್ಲಿ ಶ್ರೀಲಂಕಾ ತಂಡವನ್ನು ಮಣಿಸಿ ಸೆಮಿಫೈನಲ್ ಆಸೆ ಜೀವಂತವಿರಿಸಿರುವ ಆಫ್ಘನ್ ಅತ್ಯಂತ ಕಡಿಮೆ ಅವಧಿಯಲ್ಲಿ ಹೆಚ್ಚಿನ ಸುಧಾರಣೆ ಕಂಡ ತಂಡ ಎಂದು ಸೆಹವಾಗ್ ಹೇಳಿದ್ದಾರೆ. “ಅಫ್ಘಾನಿಸ್ತಾನವು ವಿಶ್ವಕಪ್ ಟೂರ್ನಿಯಲ್ಲಿ ಬಲಿಷ್ಠ ತಂಡಗಳಾದ ಹಾಲಿ ವಿಶ್ವ ಚಾಂಪಿಯನ್ ಇಂಗ್ಲೆಂಡ್, ಪಾಕಿಸ್ತಾನ ಮತ್ತು ಶ್ರೀಲಂಕಾ ತಂಡಗಳನ್ನು ಸೋಲಿಸಿದೆ. ತಂಡದ ಆತ್ಮವಿಶ್ವಾಸವನ್ನು ನೋಡುವಾಗ ಸೆಮಿಫೈನಲ್ಗೇರುವ ವಿಶ್ವಾಸವಿದೆ. ಒಂದೊಮ್ಮೆ ಈ ಬಾರಿ ಸಾಧ್ಯವಾಗದಿದ್ದರೂ ಮುಂದಿನ ವಿಶ್ವಕಪ್ ಟೂರ್ನಿಯಲ್ಲಿ ಅಫಘಾನಿಸ್ತಾನವೂ ಕಪ್ ಗೆಲ್ಲುವ ಮತ್ತು ಬಲಿಷ್ಠ ತಂಡವಾಗಿ ಸಿದ್ಧಗೊಂಡಿರುತ್ತದೆ” ಎಂದು ವೀರೂ ಭವಿಷ್ಯ ನುಡಿದಿದ್ದಾರೆ.
Wow Afghanistan, what a performance. So much to learn from the spirit @ACBofficials have shown . Bangladesh has been around for 25 years and they haven’t beaten the big teams in a row so often as the Afghan boys have done in a much shorter span of time. The most improved side in…
— Virender Sehwag (@virendersehwag) October 30, 2023
ಪಾಕ್ ಆಟಗಾರನಿಂದಲೂ ಮೆಚ್ಚುಗೆ
ಅಫಘಾನಿಸ್ತಾನ ಕಳೆದ ಪಂದ್ಯದಲ್ಲಿ ಪಾಕಿಸ್ತಾನ ತಂಡವನ್ನು ಸೋಲಿಸಿದ್ದರೂ, ಲಂಕಾ ವಿರುದ್ಧದ ಪಂದ್ಯದಲ್ಲಿ ಗೆದ್ದ ಆಫ್ಘನ್ ತಂಡದ ಪ್ರದರ್ಶನಕ್ಕೆ ಪಾಕಿಸ್ತಾನದ ಮಾಜಿ ನಾಯಕ ಮತ್ತು ಆಟಗಾರ ಶಾಹೀದ್ ಅಫ್ರಿದಿ ಮೆಚ್ಚುಗೆ ಸೂಚಿಸಿದ್ದಾರೆ. “ತಂಡದ ಆಲ್ರೌಂಡರ್ ಪ್ರದರ್ಶನ ನಿಜಕ್ಕೂ ಮೆಚ್ಚಲೇ ಬೇಕು. ಇದೇ ಇದೇ ರೀತಿಯ ಪ್ರದರ್ಶನವನ್ನು ಮುಂದುವರಿಸಿ ಮುಂದಿನ ದಿನಗಳಲ್ಲಿ ಇನ್ನೂ ಕೂಡ ಬಲಿಷ್ಠರಾಗಿ” ಎಂದರು.
ICYMI: Here's how the cricketing fraternity reacted to Afghanistan's third win at the ICC Men's Cricket World Cup 2023. 🤩#AfghanAtalan | #CWC23 | #AFGvSL | #WarzaMaidanGata pic.twitter.com/veqq9KZgVd
— Afghanistan Cricket Board (@ACBofficials) October 31, 2023
ಸೆಮಿ ಆಸೆ ಜೀವಂತ
ಇಲ್ಲಿನ ಮಹಾರಾಷ್ಟ್ರ ಕ್ರಿಕೆಟ್ ಸಂಸ್ಥೆಯ ಸ್ಟೇಡಿಯಮ್ನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ದುಕೊಂಡ ಅಫಘಾನಿಸ್ತಾನ ತಂಡ ಲಂಕಾವನ್ನು ಅಲ್ಪ ಮೊತ್ತಕ್ಕೆ ಕಟ್ಟಿಹಾಕುವಲ್ಲಿ ಯಶಸ್ಸು ಸಾಧಿಸಿತು. ಬ್ಯಾಟಿಂಗ್ ಆಹ್ವಾನ ಪಡೆದ ಲಂಕಾ ಪಡೆ 49.3 ಓವರ್ಗಳಲ್ಲಿ 241 ರನ್ ಗಳಿಗೆ ಆಲ್ಔಟ್ ಆಯಿತು. ಜವಾಬಿತ್ತ ಆಪ್ಘನ್ 26 ಎಸೆತಗಳು ಬಾಕಿ ಇರುವಂತೆಯೇ 3 ವಿಕೆಟ್ ಕಳೆದುಕೊಂಡು 242 ರನ್ ಬಾರಿಸಿ ಜಯಶಾಲಿಯಾಯಿತು. ಈ ಗೆಲುವಿನೊಂದಿಗೆ ಆಫ್ಘನ್ ತಂಡದ ಸೆಮಿಫೈನಲ್ ಆಸೆ ಇನ್ನೂ ಜೀವಂತವಾಗಿದೆ.
ಇದನ್ನೂ ಓದಿ ICC World Cup 2023: ಆಫ್ಘನ್ ತಂಡದ ಸೆಮಿ ಫೈನಲ್ ಲೆಕ್ಕಾಚಾರ ಹೇಗಿದೆ?
ಅಫಘಾನಿಸ್ತಾನ ತಂಡದ ಸೆಮಿಫೈನಲ್ ಲೆಕ್ಕಾಚಾರ
ಸದ್ಯ ಅಫಘಾನಿಸ್ತಾನ ತಂಡ 6 ಪಂದ್ಯಗಳಲ್ಲಿ ಮೂರು ಪಂದ್ಯಗಳನ್ನು ಗೆದ್ದು 6 ಅಂಕದೊಂದಿಗೆ 5ನೇ ಸ್ಥಾನದಲ್ಲಿದೆ. ಇನ್ನು ಮೂರು ಪಂದ್ಯಗಳು ಬಾಕಿ ಇವೆ. ಎದುರಾಳಿಗಳು ಆಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾ ಮತ್ತು ನೆದರ್ಲೆಂಡ್ಸ್. ಈ ಮೂರು ಪಂದ್ಯಗಳನ್ನು ಆಫ್ಘನ್ ಗೆದ್ದರೆ 12 ಅಂಕ ಲಭಿಸಿಸಿ ಸೆಮಿಫೈನಲ್ ಪ್ರವೇಶ ಪಡೆಯಬಹುದು. ಆದರೆ ಇಲ್ಲೂ ಕೆಲ ಲೆಕ್ಕಾಚಾರಗಳಿವೆ.
4ನೇ ಸ್ಥಾನದಲ್ಲಿರುವ ಆಸ್ಟ್ರೇಲಿಯಾ ಸದ್ಯ 8 ಅಂಕ ಹೊಂದಿದ್ದು. ಈ ತಂಡಕ್ಕೂ ಮೂರು ಪಂದ್ಯ ಬಾಕಿ ಇದೆ. ಒಂದೊಮ್ಮೆ ಆಸ್ಟ್ರೇಲಿಯಾ ತಂಡ ಆಫ್ಘನ್ ವಿರುದ್ಧ ಸೋತರೂ ಆಸೀಸ್ಗೆ ಸೆಮಿ ರೇಸ್ನಿಂದ ಹೊರ ಬೀಳುವುದಿಲ್ಲ. ಮುಂದಿನ 2 ಪಂದ್ಯಗಳನ್ನು ಗೆದ್ದರೆ ಆಸೀಸ್ಗೂ 12 ಅಂಕ ಆಗಲಿದೆ. ಆಗ ಆಸೀಸ್ಗೂ ಸೆಮಿ ಅವಕಾಶವಿದೆ. ಆಸ್ಟ್ರೇಲಿಯಾ 2 ಪಂದ್ಯದಲ್ಲಿ ಸೋತು, ಆಫ್ಘನ್ ಮೂರರಲ್ಲಿ ಗೆದ್ದರೆ ಸೆಮಿ ಟಿಕೆಟ್ ಆಫ್ಘನ್ಗೆ ಸಿಗಲಿದೆ. ಒಂದೊಮ್ಮೆ ಆಸ್ಟ್ರೇಲಿಯಾ ಮೂರರಲ್ಲಿ ಒಂದು ಪಂದ್ಯ ಮಾತ್ರ ಗೆದ್ದು ಆಫ್ಘನ್ ಮೂರರಲ್ಲಿ 2 ಪಂದ್ಯ ಗೆದ್ದರೆ ಇತ್ತಂಡಗಳಿಗೂ ತಲಾ 10 ಅಂಕ ಆಗಲಿದೆ. ಆಗ ರನ್ ರೇಟ್ನಲ್ಲಿ ಯಾರು ಮುಂದಿರುತ್ತಾರೋ ಅವರಿಗೆ ಸೆಮಿಯ ಅದೃಷ್ಟ ದೊರಕಲಿದೆ.