ಇಸ್ಲಾಮಾಬಾದ್ : ಅಸ್ಥಿರತೆಯನ್ನೇ ಜೀವಾಳ ಮಾಡಿಕೊಂಡಿರುವ ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯಲ್ಲಿ ಮತ್ತೊಮ್ಮೆ ಅಲ್ಲೊಲ ಕಲ್ಲೋಲ ಉಂಟಾಗಿದೆ. ಕಳೆದ ವಾರವಷ್ಟೇ ಅಧ್ಯಕ್ಷ ರಮೀಜ್ ರಾಜಾ ಅವರನ್ನು ಏಕಾಏಕಿ ಅವರ ಸ್ಥಾನದಿಂದ ಕಿತ್ತೊಗೆದಿದ್ದ ಅಲ್ಲಿನ ಸರಕಾರ, ಇದೀಗ ಹಲವಾರು ಹೊಸ ನೇಮಕಗಳನ್ನೂ ಮಾಡಿಕೊಂಡಿದೆ. ಅಂತೆಯೇ ಪಾಕಿಸ್ತಾನ ತಂಡದ ಮಾಜಿ ಆಲ್ರೌಂಡರ್ ಶಾಹಿದ್ ಅಫ್ರಿದಿಗೆ ರಾಷ್ಟ್ರೀಯ ತಂಡ ಆಯ್ಕೆ ಸಮಿತಿಯ ಹಂಗಾಮಿ ಮುಖ್ಯಸ್ಥರ ಸ್ಥಾನ ಲಭಿಸಿದೆ.
ಶನಿವಾರ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಹೊಸ ನೇಮಕಗಳನ್ನು ಘೋಷಣೆ ಮಾಡಿದೆ. ಅಂತೆಯೇ ಅಫ್ರಿದಿ ರಾಷ್ಟ್ರೀಯ ತಂಡವನ್ನು ಆಯ್ಕೆ ಮಾಡಲಿದ್ದು, ಮಾಜಿ ವೇಗದ ಬೌಲರ್ ಅಬ್ದುಲ್ ರಜಾಕ್ ಹಾಗೂ ರಾವ್ ಇಫ್ತಿಕಾರ್ ಕೂಡ ಆಯ್ಕೆ ಮಂಡಳಿಯಲ್ಲಿ ಅವಕಾಶ ಪಡೆದುಕೊಂಡಿದ್ದಾರೆ.
ಪಾಕಿಸ್ತಾನ ಕ್ರಿಕೆಟ್ ತಂಡದಲ್ಲಿ 20 ವರ್ಷ ಆಡಿದ್ದ ಶಾಹಿದ್ ಅಫ್ರಿದಿ ಅವರು ಆ ತಂಡದ ಅತ್ಯಂತ ಜನಪ್ರಿಯ ಆಟಗಾರ ಎನಿಸಿಕೊಂಡಿದ್ದರು. 27 ಟೆಸ್ಟ್, 398 ಏಕ ದಿನ ಹಾಗೂ 99 ಟಿ 20 ಪಂದ್ಯಗಳಲ್ಲಿ ಅವರು ಆಡಿದ್ದರು. ನಿವೃತ್ತಿ ಬಳಿಕ ಅವರು ಕ್ರಿಕೆಟ್ ವಿಶ್ಲೇಷಕರಾಗಿ ಕಾರ್ಯ ನಿರ್ವಹಿಸಿದ್ದರು. ಇದೀಗ ಪಿಸಿಬಿಯಲ್ಲಿ ದೊಡ್ಡ ಹುದ್ದೆಯನ್ನು ಪಡೆದುಕೊಂಡಿದ್ದಾರೆ.
ಪಾಕಿಸ್ತಾನ ಸರಕಾರಕ್ಕೆ ಅಲ್ಲಿನ ಕ್ರಿಕೆಟ್ ಮಂಡಳಿಯಲ್ಲಿ ಅಧಿಕಾರವಿದೆ. ಪ್ರಧಾನಿ ಮಂಡಳಿಯ ಪೋಷಕರಾಗಿರುತ್ತಾರೆ. ಮಾಜಿ ಕ್ರಿಕೆಟಿಗ ಇಮ್ರಾನ್ ಖಾನ್ ಅವರು ಪಾಕ್ ಪ್ರಧಾನಿಯಾಗಿದ್ದ ವೇಳೆ ಆತ್ಮೀಯರಾಗಿದ್ದ ರಮೀಜ್ಗೆ ಪಿಸಿಬಿ ಹುದ್ದೆ ಕಲ್ಪಿಸಿದ್ದರು. ಅವರ ಅಧಿಕಾರ ಕಳೆದುಕೊಂಡ ಬಳಿಕ ಶಹಬಾಜ್ ಶರೀಫ್ ಸಿಎಂ ಆದ ಬಳಿಕ ರಮೀಜ್ ಅವರನ್ನು ಹುದ್ದೆಯಿಂದ ಕಿತ್ತೊಗೆದು ನಜಮ್ ಸೇಥ್ ಅವರನ್ನು ಅಧ್ಯಕ್ಷ ಹುದ್ದೆಗೇರಿಸಿದ್ದರು.
ಇದನ್ನೂ ಓದಿ | Pakistan Cricket Board | ಭಾರತ ತಂಡವನ್ನು ಟೀಕಿಸುತ್ತಿದ್ದ ಪಿಸಿಬಿ ಅಧ್ಯಕ್ಷ ರಮೀಜ್ ಸ್ಥಾನಕ್ಕೇ ಕುತ್ತು!